کہتے ہیں کہ 10 فیصد غیر رجسٹرڈ خواتین کا فرق ختم کرنے کیلئے نادرا ہنگامی بنیادوں پر اقدامات اٹھا رہا ہے
پاکستان الیکشن کمیشن میں ایک تقریب سے خطاب کرتے ہوئے چیئرمین نیشنل ڈیٹابیس این رجسٹریشن اتھارٹی (نادرا) طارق ملک نے کہا کہ جمعہ کو مختص کردہ 258 نادرا دفاتر میں صرف خواتین کی رجسٹریشن کی جائے گی، خواتین کو رجسٹریشن میں پہلا شناختی کارڈ مفت فراہم کیا جائیگا، ملک بھر میں موجود 688 نادرا رجسٹریشن دفاتر میں خواتین کیلئے ون ونڈو کاؤنٹر قائم کئے جائیں گے۔
انہوں نے کہا کہ خواتین کی رجسٹریشن کیلئے نادرا موبائل رجسٹریشن وینز کی تعداد میں بھی اضافہ کیا جائے گا، دور دراز علاقوں میں موبائل رجسٹریشن وینز کے ذریعے خواتین کو ان کی دہلیز پر رجسٹر کیا جائے گا۔
چیئرمین نادرا کے مطابق سماجی رکاوٹوں کو مدنظر رکھتے ہوئے خواتین کی رجسٹریشن کو بڑھانے کیلئے خواتین عملے پر مبنی نادرا کے دفاتر بنائے جائیں گے، نادرا میں ترجیحی بنیادوں پر خواتین کو نوکریاں دی جائیں گی، روزگار کی فراہمی میں خواتین کی شمولیت کو یقینی بنایا جائے گا۔
طارق ملک نے یہ بھی کہا کہ ملک بھر کے 154 اضلاع کی 430 تحصیلوں میں نادرا دفاتر قائم ہیں، مزید 66 تحصیلوں میں 14 اگست تک نئے نادرا دفاتر بھی کھول دیئے جائیں گے۔
