اکشے کمار کی نئی فلم ’رکشا بندھن‘ کا ٹریلر جاری

ممبئی: (ویب ڈیسک) بالی ووڈ کے معروف اداکار اکشے کمار کی آنے والی فلم ’رکشا بندھن‘ کا ٹریلر جاری کر دیا گیا ہے۔
اکشے کمار بالی ووڈ کے سب سے مصروف اداکاروں میں سے ایک ہے جن کی ہر دوماہ میں کوئی نئی فلم ریلیز ہوتی ہے تاہم اس فلم کی کہانی تھوڑی منفرد ہے اس میں کوئی ایکشن یا رومانوی سین نہیں بلکہ ایک بھائی کا اپنی بہنوں کے لئے پیار اور ان کے لئے دی گئی قربانیوں کو بہترین انداز میں پیش کیا گیا ہے۔
رکشا بندھن میں جہاں اکشے کو بہنوں کی شادی کرنے کے لیے مسائل درپیش ہیں تو وہیں ان کی اپنی بچپن کی محبت سے شادی کرنے کا خواب بھی ٹوٹتا نظر آرہا ہے۔
فلم کے ٹریلر کو اکشے کمار کے مداحوں کی جانب سے بےحد پسند کیا جا رہا ہے اور مداح فلم کی ریلیز کا بےصبری سے انتظار کر رہے ہیں۔
سوشل میڈیا پلیٹ فارمز پر بھی اداکار کی اس فلم کے خوب چرچے ہو رہے ہیں اور مداح اپنے ردِعمل کا اظہار کر رہے ہیں۔
ٹوئٹر پر ایک صارف نے لکھا کہ ’کافی دنوں بعد کسی ٹریلر کو دیکھ کر رونا آگیا‘۔
اکشے پٹیل نامی ایک صارف لکھتے ہیں کہ ’ٹریلر دل چھو گیا ہے۔ اس میں کامیڈی، جذبات، جدوجہد، لو سٹوری، سب ملے گا‘۔
واضح رہے آنند ایل رائی کی ہدایتکاری میں بننے والی فلم میں اداکارہ بھومی پدنیکر نے ہروئن کا کردار ادا کیا ہے فلم رکشا بندھن 11 اگست کو ریلیز کی جائے گی۔