سب کچھ ٹھیک، میں اور رنویر ساتھ ہیں، طلاق کی خبروں پر دیپکا کی تردید

لندن: (ویب ڈیسک) بالی وڈ کی معروف اداکارہ دیپکا پڈوکون نے شوہر اداکار رنویر سنگھ سے طلاق کی خبروں پر خاموشی توڑ دی۔
دیپکا امریکی اداکارہ اور برطانوی شاہی خاندان کی چھوٹی بہو میگھن مارکل کی پوڈ کاسٹ میں بطور مہمان شریک ہوئیں جہاں انہوں نے ذاتی زندگی کے حوالے سے گفتگو کی۔
پوڈ کاسٹ کے دوران دیپکا نے کئی دنوں سے گردش کرتی افواہوں پر اظہار خیال کرتے ہوئے کہا کہ "میں اور رنویر دونوں اپنے پروجیکٹس میں مصروف ہیں، ہم کام کر رہے ہیں اور رنویر اپنے ایک پروجیکٹ کے سبب ہی ان سے ایک ہفتے سے دور ہیں”۔
اداکارہ کا کہنا تھا کہ "رنویر سنگھ ایک ہفتے کے لیے میوزک فیسٹیول میں مصروف تھے اور آج وہ واپس آئے ہیں، وہ مجھ سے مل کر، میرا چہرہ دیکھ کر بہت خوش ہوں گے”۔
دیپکا نے تمام افواہوں کو بے بنیاد قرار دیتے ہوئے کہا "ہم دونوں کے درمیان سب ٹھیک ہے اور ہم ایک ساتھ ہیں”۔