فٹبال لیجنڈ پیلے کا انتقال ، برازیل میں تین روزہ سوگ کا اعلان

برازیلیا : (ویب ڈیسک) فٹبال کے لیجنڈ کھلاڑی پیلے کے انتقال پر برازیل کے صدر جیئر بولسونارو نے ملک میں تین روزہ سوگ کا اعلان کیا ہے ۔
82 سالہ عظیم فٹبالر پیلے کی آخری رسومات پیر اور منگل کو سینٹوس میں ان کے گھر میں ادا کی جائیں گی ، عوام پیلے کو ان کے آبائی شہر کی سڑکوں پر پریڈ کر کےخراج تحسین پیش کرسکیں گے۔
رپورٹس کے مطابق برازیل کے آئیکون فٹ بالر پیلے نے اپنے 21 برس کے کیریئر میں 1363 میچوں میں 1281 گول کیے، انہوں نے برازیل کے لیے 92 میچوں میں 77 گول کیے۔
پیلے 1958، 1962 اور 1970 میں ورلڈ کپ جیتنے والی برازیل کی ٹیم کا حصہ بھی تھے اور ان کا 3 ورلڈ کپ جیتنے والی ٹیم کا حصہ ہونا بھی ایک عالمی ریکارڈ ہے، سال 2000 پیلے کو فیفا کے صدی کے بہترین کھلاڑی ہونے کے اعزاز سے نوازا گیا ۔
خیال رہے کہ لیجنڈری کھلاڑی بڑی آنت کے کینسر میں مبتلا تھے اورچند ہفتوں سے ہسپتال میں زیر علاج تھے ، گزشتہ رات 82 برس کی عمر میں انتقال کرگئے ۔