”سیاسی جماعتوں کو قومی امور پر سودے بازی نہیں کرنی چاہیے“ نامور تجزیہ کار ضیا شاہد کی چینل ۵کے مقبول پروگرام میں گفتگو

لاہور (مانیٹرنگ ڈیسک) چینل فائیو کے تجزیوں اور تبصروں پر مشتمل پروگرام ”ضیاشاہد کیساتھ“ میں گفتگو کرتے ہوئے سینئر صحافی اور تجزیہ کار ضیاشاہد نے کہا ہے کہ قومی معاملات پر سیاسی جماعتوں کا متحد ہونا ضروری ہوتا ہے۔ 1971کی جنگ میں بھی سیاسی جماعتیں متحد نہیں تھیں جس کا قوم کو خمیازہ بھگتنا پڑا۔ ہمارے یہاں جائز بات پر بھی ناجائز مطالبات منوائے جاتے ہیں۔ حکومت کو اگر کسی مسئلہ پر سیاسی جماعتوں کی تائید چاہیے ہو تو مطالبات سامنے آ جاتے ہیں۔ سودے بازی شروع ہو جاتی ہے جو انتہائی مذموم امر ہے۔ سینئر صحافی نے کہا کہ کئی بار بلائی گئی اے پی سی میں ثابت ہو چکا ہے کہ سول عدالتیں کئی وجوہات کی بنا پر دہشتگردوں کو سزا نہیں دے پاتیں۔ تمام سیاسی جماعتیں یہ مانتی ہیں کہ بادل نخواستہ ہی سہی فوجی عدالتوں کا قیام وقت کی ضرورت ہیں تو اس پر بارگیننگ نہیں کی جانی چاہیے۔ پیپلز پارٹی فوجی عدالتوں کے مسئلہ پر بارگیننگ کر رہی ہے۔ آصف زرداری پوائنٹ سکورنگ کا کوئی موقع ہاتھ سے نکلنے نہیں دیتے۔ فوجی عدالتوں کی بھی حتمی منظوری تو سینٹ نے دینی ہے جہاں پی پی کی اکثریت ہے۔ پیپلز پارٹی اس معاملہ پر اس وقت تک اختلاف جاری رکھے گی جب تک اس کے اعلانیہ یا خفیہ مطالبات تسلیم نہ کئے جائینگے۔ آصف زرداری سینٹ میں اکثریت کو ضرور کیش کروائیں گے۔ ایک نجی چینل پر دہشتگردوں اور فوجی عدالتوں کے حوالے سے میزبان کی جانب سے عجیب منطقیں پیش کرنے پر بات کرتے ہوئے سینئر صحافی نے کہا کہ کیا دہشتگرد جو خود کش حملہ کرنے کےلئے آتے ہیں کو سزا کے بجائے پھر قومی ایوارڈ دیا جانا چاہیے۔ ریاست کو اپنی رٹ قائم کرنے کےلئے لازمی ایسے اقدامات اٹھانا پڑتے ہیں کہ دہشتگردی جیسے مذموم جرائم کا ارتکاب کرنے والے کو سخت سے سخت سزا دی جائے۔ فوجی عدالتوں پر بحث سے پہلے دیکھنا ضروری ہے کہ پہلے قائم کی جانے والی فوجی عدالتوں نے کیا کیا۔ اگر انہوں نے 161 دہشتگردوں کو پھانسی کی سزا سنائی جن میں سے صرف 12 کو لٹکایا گیا اور باقی کو سول عدالتوں نے سٹے دیکر عملدرآمد سے روک لیا تو ایسی فوجی عدالتوں کے قیام کا اب کیا فائدہ ہوگا۔ سینئر صحافی نے کہا کہ فوجی عدالتیں وقت کی ضرورت ہیں قائم کی جانی چاہئیں اور وہ جو فیصلے دیں ان پر بھی فوری عملدرآمد کیا جانا ضروری ہے۔ اگر سول عدالتوں نے ان کے فیصلوں پر عملدرآمد ہی نہیں ہونے دینا تو ایسی فوجی عدالتیں بنانے کا کوئی فائدہ نہیں ہے۔ سینئر تجزیہ کار نے کہا کہ عمران خان نے پی ایس ایل فائنل کے حوالے سے اپنی رائے کا اظہار کیا اگر ان کے رہنماﺅں یا کارکنوں نے اس رائے سے اختلاف کیا ہے تو یہ جمہوریت کےلئے نیک شگون ہے۔ کارکنوں کا شعور اس حد تک بڑھانا کہ وہ اپنے لیڈر سے بھی اختلاف رائے کر سکیں ایک مثبت سوچ ہے۔ سینئر صحافی نے کہا کہ کسی کو کرکٹ میچ دیکھنے کےلئے مجبور نہیں کیا جا سکتا۔ آصف زرداری کو کرکٹ میچ پر پوائنٹ سکورنگ نہیں کرنی چاہیے۔ پیپلز پارٹی کے کئی رہنماﺅں اور کارکنوں کو کرکٹ پسند ہے وہ اگر میچ دیکھنا چاہتے ہیں تو یہ اچھی بات ہے۔ کئی اپوزیشن لیڈروں سے بات ہوئی تو ان کا کہنا تھا کہ وزیراعظم اگر میچ دیکھنے آ رہے ہیں تو ان کی سکیورٹی بھی تو دیکھیں کیا ہمیں بھی کسی نے سکیورٹی دینی ہے۔ کرکٹ میچ کے حوالے سے اصولی بات یہ ہے کہ اگر میچ لاہور میں کرانے کا فیصلہ کر ہی لیا ہے تو پاکستانی قوم ایک بہادر اور نڈر قوم ہے وہ ہر صورت میچ دیکھنے کےلئے جائے گی جو لوگ بھی ان حالات میں میچ دیکھنے سٹیڈیم پہنچیں گے ان کی جرا¿ت کو سلام کرنا چاہیے۔ پٹھانوں کے خلاف پمفلٹس بانٹنے والے انتشار پھیلانا چاہتے ہیں پنجاب حکومت کا ان کےخلاف ایکشن میں آنا خوش آئند ہے۔ پاکستان میں اقتصادی تعاون تنظیم کا اجلاس بلانے پر حکومت مبارکباد کی مستحق ہے۔ سارک بھی بڑی مشترکہ تنظیم تھی لیکن بھارت نے اپنی سطحی سوچ اور تعصب کے تحت ہمیشہ اسے ناکام بنانے کےلئے رکاوٹیں کھڑی کیں۔ اسی پس منظر میں موجودہ اقتصادی تعاون تنظیم کی کانفرنس میں زیادہ وسیع تر اتحاد سامنے آیا ہے۔