اسلام آباد: اقدام قتل کے مقدمے میں 16 سال سے مطلوب اشتہاری ملزم کو سعودی عرب سے گرفتار کرلیا گیا۔
ترجمان ایف آئی اے کے مطابق ایف آئی اے این سی بی انٹرپول نے کارروائی کرتے ہوئے خطرناک اشتہاری ملزم کو 16 سال بعد سعودی عرب سے گرفتارکرلیا۔ ملزم علی زمان کو سعودی عرب سے گرفتار کرکے اسلام آباد ائیرپورٹ منتقل کردیا گیا۔
ملزم گزشتہ 16 سال سے خیبر پختونخواہ پولیس کو مطلوب تھا۔ ملزم کے خلاف سال 2008 میں تھانہ واری اپر دیر میں مقدمہ درج ہوا تھا اور ملزم بیرون ملک فرار ہو گیا تھا۔ ایف آئی اے این سی بی انٹرپول نے ملزم کی گرفتاری کے لئے ریڈ نوٹس جاری کیا تھا۔ ملزم کو بعد ازاں ایف آئی اے امیگریشن اسلام آباد نے کے پی پولیس حکام کے حوالے کر دیا۔
ایف آئی اے کے مطابق ملزم کی حوالگی انٹرپول اسلام آباد کی انٹرپول ریاض کے ساتھ قریبی رابطہ کاری کی وجہ سے ممکن ہوئی۔ جدید ٹیکنالوجی سے آراستہ این سی بی انٹرپول 24 گھنٹے پوری دنیا کے ساتھ رابطے میں ہے۔ ملزمان کی گرفتاری کے لئے تمام تر وسائل کو بروئے کار لایا جا رہا ہے۔
