نئے صوبوں کے قیام کی حمایت میں اضافہ، سندھ سے بڑی تعداد سروے میں شریک

اسلام آباد’کراچی(این این آئی) پاکستان میں بہتر طرز حکمرانی، انتظامی امور میں بہتری اور عوامی مسائل کے فوری حل کے لیے نئے صوبوں اور انتظامی یونٹس کے قیام کی حمایت میں اضافہ سامنے آیا ہے، ملک گیر سروے میں 75.52 فیصد پاکستانیوں نے نئے صوبوں کے قیام کی حمایت کردی۔ ملک گیر سروے کے مطابق 72.48 فیصد شرکاء نے نئے صوبوں کے قیام کو عوامی مسائل کے حل کا بنیادی ذریعہ قرار دیا، جبکہ صوبوں کی تعداد اور حدود کے تعین کے لیے ماہرین کی مشاورت کو ترجیح دینے کا رجحان بھی نمایاں رہا۔سروے میں مجموعی طور پر 4 ہزار 18 افراد نے حصہ لیا، جن میںسندھ سے 35.52 فیصد افراد شامل تھے، جو صوبائی سطح پر پنجاب کے بعد دوسری بڑی نمائندگی ہے۔ پنجاب سے 40.49 فیصد، خیبرپختونخوا سے 14.09 فیصد اور بلوچستان سے 2 فیصد افراد نے اپنی رائے کا اظہار کیا۔نئے صوبوں کی تعداد کے حوالے سے 40 فیصد سے زائد شرکاء نے رائے دی کہ اس بارے میں فیصلہ ماہرین کی مشاورت سے کیا جانا چاہیے۔ سروے کے مطابق 26.40 فیصد افراد نے 24 نئے صوبوں، 21.95 فیصد نے 12 صوبوں جبکہ 11.45 فیصد نے 6 نئے صوبوں کے قیام کی حمایت کی۔سروے کے نتائج سے ملک میں انتظامی بنیادوں پر نئے صوبوں کے قیام کی بحث کو تقویت ملتی ہے۔