لاہور (جنرل رپورٹر) انٹرمیڈیٹ کے امتحانات میں لاہور بورڈ میں نمایاں پوزیشن حاصل کرنے والی طالبات نے محنت، مستقل مزاجی اور والدین و اساتذہ کی رہنمائی کو اپنی کامیابی کا راز قرار دیتے ہوئے کہا ہے کہ کامیابی صرف زیادہ گھنٹے پڑھنے سے نہیں بلکہ درست منصوبہ بندی، وقت کے مثر استعمال اور اپنے مقصد پر مسلسل توجہ سے حاصل ہوتی ہے۔ پوزیشن ہولڈرز نے خبریں ڈیجیٹل سے گفتگو کرتے ہوئے کہا کہ ان کی کامیابی کا اصل سہرا ان کے والدین اور اساتذہ کے سر ہے جنہوں نے ہر مرحلے پر حوصلہ افزائی اور رہنمائی فراہم کی۔ طالبات کا کہنا تھا کہ موجودہ امتحانی اور تعلیمی نظام انہیں اپنی صلاحیتیں اجاگر کرنے کے مواقع فراہم کر رہا ہے اور وہ مستقبل میں مصنوعی ذہانت ، میڈیکل اور انجینئرنگ کے شعبوں میں ملک و قوم کی خدمت کرنا چاہتی ہیں۔ پوزیشن ہولڈرز نے وزیراعلی پنجاب مریم نواز شریف اور صوبائی وزیر تعلیم رانا سکندر حیات کے تعلیمی وژن کو سراہتے ہوئے کہا کہ نوجوانوں کو جدید تعلیم، ٹیکنالوجی اور پیشہ ورانہ میدانوں میں آگے بڑھنے کے زیادہ مواقع فراہم کرنے کی ضرورت ہے۔ طالبات نے کہا کہ طلبہ کو کامیابی کے لیے شارٹ کٹ تلاش کرنے کے بجائے اپنی پڑھائی پر توجہ، وقت کی پابندی اور مسلسل محنت کو اپنا معمول بنانا چاہیے۔
