راولپنڈی تعلیمی بورڈ کے زیر اہتمام انٹرمیڈیٹ سالانہ نتائج کا اعلان

فتح جنگ(بیورو رپورٹ)بورڈ آف انٹرمیڈیٹ اینڈ سیکنڈری ایجوکیشن راولپنڈی کے زیر اہتمام انٹرمیڈیٹ پہلا سالانہ امتحان 2026 کے
نتائج اور پوزیشن ہولڈرز کے اعزاز میں پروقار تقریب بورڈ میں منعقد ہوئی۔ تقریب کے مہمانِ خصوصی راجہ محمدحنیف، رکن صوبائی اسمبلی و چیئرمین سی ایم آئی ٹی پنجاب، اور ملک افتخار احمد، ایم پی اے و پارلیمانی سیکرٹری زکو و عشر پنجاب تھے۔ تقریب میں چیف ایگزیکٹو آئی بی سی سی اسلام آباد ڈاکٹر غلام علی ملاح، چیئرمین تعلیمی بورڈ راولپنڈی پروفیسر ڈاکٹر اقبال محمود، کنٹرولر امتحانات تنویر اصغر اعوان، سیکرٹری بورڈ پروفیسر امجد اقبال خٹک، بورڈ افسران، پوزیشن ہولڈر طلبہ و طالبات، ان کے والدین، اساتذہ کرام اور دیگر معزز مہمانان نے شرکت کی۔انٹرمیڈیٹ پہلا سالانہ امتحان 2026 میں راولپنڈی بورڈ کا مجموعی کامیابی کا تناسب 60.8 فیصد رہا۔ طلبہ کی کامیابی کی شرح 46.52فیصد جبکہ طالبات کی کامیابی کی شرح 67.56فیصد رہی۔تقریب سے خطاب کرتے ہوئے چیئرمین تعلیمی بورڈ راولپنڈی پروفیسر ڈاکٹر اقبال محمود نے کامیاب طلبہ و طالبات، ان کے والدین اور اساتذہ کرام کو مبارکباد پیش کی۔ انہوں نے کہا کہ طلبہ کی کامیابی ان کی محنت، والدین کی حوصلہ افزائی اور اساتذہ کی رہنمائی کا نتیجہ ہے۔ انہوں نے کہا کہ راولپنڈی تعلیمی بورڈ امتحانات کے عمل میں شفافیت، میرٹ اور معیار کو یقینی بنانے کے لیے بھرپور اقدامات کر رہا ہے۔ انہوں نے پوزیشن ہولڈرز کو مبارکباد دیتے ہوئے کہا کہ یہ باصلاحیت نوجوان ملک و قوم کا قیمتی سرمایہ ہیں۔چیف ایگزیکٹو آئی بی سی سی اسلام آباد ڈاکٹر غلام علی ملاح نے خطاب کرتے ہوئے پوزیشن ہولڈر طلبہ و طالبات کو شاندار کامیابی پر مبارکباد پیش کی۔ انہوں نے کہا کہ تعلیمی میدان میں نمایاں کامیابی طلبہ کی محنت، والدین کی حوصلہ افزائی اور اساتذہ کی رہنمائی کا ثمر ہے۔ انہوں نے طلبہ پر زور دیا کہ وہ اپنی تعلیمی محنت کو جاری رکھتے ہوئے اعلی تعلیم کے حصول پر توجہ مرکوز رکھیں۔مہمانِ خصوصی ملک افتخار احمد، ایم پی اے و پارلیمانی سیکرٹری زکو و عشر پنجاب نے خطاب کرتے ہوئے کامیاب طلبہ و طالبات کو مبارکباد پیش کی اور کہا کہ یہ ہونہار نوجوان قوم کا قیمتی سرمایہ ہیں۔ انہوں نے کہا کہ پوزیشن حاصل کرنے والے طلبہ نے اپنی انتھک محنت اور عزم کے ذریعے نمایاں کامیابی حاصل کی ہے۔ انہوں نے والدین اور اساتذہ کرام کو بھی مبارکباد پیش کی اور ان کی کاوشوں کو سراہا۔مہمانِ خصوصی راجہ محمدحنیف، رکن صوبائی اسمبلی و چیئرمین سی ایم آئی ٹی پنجاب نے خطاب کرتے ہوئے پوزیشن ہولڈر طلبہ و طالبات کو گارڈ آف آنر پیش کیے جانے کی روایت کو ان کی حوصلہ افزائی کا موثر ذریعہ قرار دیا۔ انہوں نے کہا کہ یہ روایت میاں محمد شہباز شریف کے دورِ وزارتِ اعلی پنجاب سے جاری ہے اور اس کا مقصد تعلیمی میدان میں نمایاں کارکردگی دکھانے والے طلبہ کی حوصلہ افزائی کرنا ہے۔ انہوں نے طلبہ و طالبات پر زور دیا کہ وہ اپنی تمام تر توجہ تعلیم پر مرکوز رکھیں اور موبائل فون سمیت غیر ضروری سرگرمیوں میں اپنا قیمتی وقت ضائع کرنے سے گریز کریں۔سیکرٹری تعلیمی بورڈ راولپنڈی پروفیسر امجد اقبال خٹک نے تقریب میں شرکت کرنے والے تمام معزز مہمانان، والدین، اساتذہ اور طلبہ و طالبات کا شکریہ ادا کیا۔ کنٹرولر امتحانات تنویر اصغر اعوان نے بھی کامیاب طلبہ و طالبات اور ان کے والدین کو مبارکباد پیش کی۔تقریب کے اختتام پر انٹرمیڈیٹ پہلا سالانہ امتحان 2026 کے پوزیشن ہولڈر طلبہ و طالبات میں انعامات اور اعزازات تقسیم کیے گئے