نارووال، جنگلی بندر کا گھرمیں گھس کر حملہ، خاتون سمیت2افراد زخمی

نارووال (این این آئی) بندر نے گھر میں گھس کر خاتون سمیت دو افراد کو زخمی کر دیا، ریسکیو اہلکاروں نے ایک گھنٹے کی جدوجہد کے بعد پکڑ کر
محکمہ وائلڈ لائف کے حوالے کر دیا۔ بتایا گیا ہے کہ شکرگڑھ کے نواحی گائوں مردووال میں جنگلی بندر نے گھر میں داخل ہوکر خاتون سمیت دو افراد کو زخمی کر دیا۔ جن میں 35 سالہ طیبہ اور 23 سالہ ارسلان شامل ہیں۔ اطلاع ملتے ہی ریسکیو 1122 نارووال نے فوری کارروائی کرتے ہوئے بروقت موقع پر پہنچ کر زخمیوں کو ابتدائی طبی امداد فراہم کی۔ واقعے کے دوران بندر گھر کی چھت پر موجود تھا، جسے قابو کرنے کے لیے ریسکیو ٹیم نے تقریباً ایک گھنٹے تک مسلسل اور محتاط ریسکیو آپریشن کیا۔ کامیاب آپریشن کے بعد ریسکیو اہلکاروں نے بندر کو بحفاظت پکڑ لیا اور اسے ریسکیو اسٹیشن شکرگڑھ منتقل کر دیا۔ بعدازاں وائلڈ لائف حکام کو اطلاع کر دی گئی، بندر کو محکمہ وائلڈ لائف کے حوالے کرنے کے انتظامات مکمل کرلیے گئے۔ ڈسٹرکٹ ایمرجنسی آفیسر انجینئر اورنگزیب نے شہریوں سے اپیل کی کہ جنگلی یا آوارہ جانور گھر میں داخل ہونے کی صورت میں خود اسے پکڑنے یا قریب جانے کی کوشش نہ کریں کیونکہ جانور کے حملے سے نقصان ہوسکتا ہے اور بچوں کو ایسے جانوروں سے دور رکھیں۔