ہائیکورٹ نے کسٹمز کے رات گئے چھاپے غیرقانونی قرار دیدیئے

لاہور (این این آئی) لاہور ہائیکورٹ نے ٹائر
مارکیٹ کے تاجروں کی آئینی درخواست منظور کرتے ہوئے کسٹمز حکام کی جانب سے رات گئے دکانوں اور گوداموں پر چھاپے مارنے، تالے توڑنے اور سامان ضبط کرنے کی کارروائی غیرقانونی قرار دے دی۔ لاہور ہائیکورٹ کے جسٹس مزمل اختر شبیر اور جسٹس سید احسن رضا کاظمی نے عطا اللہ سمیت 10 دیگر تاجروں کی کسٹمز کارروائی کے خلاف درخواست پر فیصلہ جاری کیا۔ عدالت نے قرار دیا کہ مالک کی عدم موجودگی میں دکانوں کے تالے توڑ کر سامان ضبط کرنا قانون کی سنگین خلاف ورزی ہے، قانونی کارروائی کے بغیر تالے توڑ کر سامان اٹھانا کسٹمز حکام کا اختیار نہیں۔ فیصلے میں کہا گیا کہ ایف بی آر کے ایس او پیز کی خلاف ورزی پر کسٹمز کی کارروائی بلاجواز اور غیر قانونی ہے جبکہ رات گئے گوداموں اور دکانوں پر چھاپے قانونی ضوابط کے منافی ہیں۔ عدالت کے مطابق رات میں چھاپے کے لیے چیف کلکٹر یا ڈائریکٹر جنرل کی پیشگی اجازت ضروری ہے ،کسٹمز ایکٹ کی دفعہ 163 اور ضابطہ فوجداری کی دفعہ 103 کی خلاف ورزی پر کی گئی کارروائی بھی کالعدم قرار دی جائے گی۔ فیصلے میں مزید کہا گیا کہ مالک اور آزاد گواہان کی موجودگی کے بغیر تیار کی گئی ضبطگی فہرست کی کوئی قانونی حیثیت نہیں، تاجروں کو قانونی دستاویزات پیش کرنے کا موقع دیئے بغیر کارروائی کرنا بھی غیرقانونی ہے۔ لاہور ہائیکورٹ نے قرار دیا کہ قانون کے مقررہ طریقہ کار سے ہٹ کر کسٹمز کی ہر کارروائی غیرقانونی تصور ہوگی اور تاجروں کی دکانوں سے کسٹمز کی جانب سے کی گئی ضبطگی بھی کالعدم قرار دے دی۔