پیرس(ویب ڈیسک)فرانس میں مہنگائی، تعلیمی نظام اور عوامی سہولیات سے متعلق حکومتی پالیسیوں
کے خلاف ملک گیر احتجاج نے شدت اختیار کرلی۔خبر رساں ادارے رائٹرز کے مطابق ہفتے کے روز پیرس سمیت مختلف شہروں میں مظاہرے کیے گئے، جبکہ حکام نے گزشتہ ہفتے ہونے والے پرتشدد واقعات اور لوٹ مار روکنے کے لیے سکیورٹی کے غیر معمولی انتظامات کیے ہیں۔ملک بھر میں تقریبا 70 ہزار پولیس اہلکار اور جنڈارم تعینات کیے ہیں۔ وزیر داخلہ لوراں نونیز نے پولیس کو ہدایت دی ہے کہ تشدد، توڑ پھوڑ اور لوٹ مار میں ملوث افراد کے خلاف فوری کارروائی کی جائے۔ حکام کے مطابق ہفتے کی دوپہر تک 135 افراد کو گرفتار کیا جا چکا تھا۔مظاہروں میں طلبہ، مزدوروں اور مختلف ٹریڈ یونینز کے کارکنوں کی بڑی تعداد شریک ہے۔ مظاہرین بہتر تعلیمی سہولیات، اساتذہ کی تعداد میں اضافے، اجرتوں میں بہتری، پنشن کے معاملات میں اصلاحات اور بڑھتی ہوئی مہنگائی سے ریلیف کا مطالبہ کر رہے ہیں۔پیرس میں مظاہرے کے مجوزہ راستے میں پولیس کی جانب سے آخری وقت میں تبدیلی پر بھی تنازع پیدا ہوا۔متعدد دکانوں کو ممکنہ توڑ پھوڑ سے بچانے کے لیے بند کردیا گیا جبکہ لوور میوزیم، میوزیم دے اورسے اور اوپیرا ہاس سمیت اہم ثقافتی مقامات بند رہے۔ شہر کی 20 سے زائد میٹرو اسٹیشنوں پر بھی بندش کی اطلاعات ہیں۔لیون میں پولیس نے مظاہرین کو منتشر کرنے کے لیے آنسو گیس استعمال کی جبکہ بعض دیگر شہروں میں احتجاج پر پابندیاں اور اجتماعات سے متعلق سخت شرائط نافذ کی گئیں۔انسانی حقوق کی تنظیموں اور ٹریڈ یونینز نے ان اقدامات پر تنقید کرتے ہوئے احتجاج کے حق پر ممکنہ اثرات کے بارے میں تشویش ظاہر کی ہے۔دوسری جانب صدر ایمانوئل میکرون کی حکومت نے تعلیمی نظام میں اصلاحات اور عوامی مسائل پر بات چیت کا عندیہ دیا ہے۔تاہم طلبہ تنظیموں کا کہنا ہے کہ واضح اور عملی اقدامات سامنے آنے تک احتجاج جاری رہ سکتا ہے۔فرانس کے وزیر داخلہ کے مطابق ہفتے کے روز ہونے والے احتجاجی مظاہروں کے دوران پولیس نے مختلف اقسام کے ہتھیار ضبط کیے، جب کہ 135 افراد کو گرفتار کرلیا گیا۔یلو ویسٹس تحریک، مزدور تنظیموں اور طلبہ کی جانب سے ملک بھر میں 700 سے زائد مظاہروں کا اعلان کیا گیا ہے، مارسیے میں احتجاج پر عائد پابندی واپس لیتے ہوئے مزدور تنظیموں کو ریلی نکالنے کی اجازت دے دی گئی، جب کہ سٹراسبرگ میں بھی مظاہرے شیڈول ہیں۔دوسری جانب نینسی، میتز، بیزانسوں، بیلفور، روآن، لی آوور، ٹولون اور لیموژ سمیت کئی شہروں میں احتجاج پر پابندیاں برقرار ہیں، حکام نے خدشہ ظاہر کیا ہے کہ نئے مظاہروں کے دوران گزشتہ ہفتے جیسے پرتشدد واقعات دوبارہ رونما ہوسکتے ہیں، جس کے باعث سکیورٹی انتظامات مزید سخت کردیے گئے ہیں۔واضح رہے کہ گزشتہ ہفتے فرانس میں ہونے والے پرتشدد مظاہروں کے دوران پولیس اہلکاروں سمیت متعدد افراد زخمی ہوئے تھے، جب کہ 3 ہزار سے زائد دکانوں کو نقصان پہنچانے اور لوٹ مار کے واقعات بھی پیش آئے تھے
فرانس مظاہرے
