کراچی، رینجرز اور ایس آئی یو پولیس کا پاک کالونی میں مشترکہ آپریشن، 2 مبینہ بھتہ خور زخمی حالت میں گرفتار

کراچی(این این آئی)پاکستان رینجرز سندھ اور اسپیشل انویسٹی گیشن یونٹ (ایس آئی یو) پولیس نے خفیہ اطلاعات کی بنیاد پر کراچی کے علاقے پاک کالونی، سائٹ ٹاؤن میں مشترکہ کارروائی کرتے ہوئے فائرنگ کے تبادلے کے بعد دو مبینہ بھتہ خوروں کو زخمی حالت میں گرفتار کر لیا۔ گرفتار ملزمان کی شناخت جہانزادہ عرف سلیم اور فواد علی کے نام سے ہوئی ہے۔ ملزمان کے قبضے سے اسلحہ اور ایمونیشن بھی برآمد کر لیا گیا۔ترجمان رینجرز کے مطابق ابتدائی تفتیش میں انکشاف ہوا ہے کہ زخمی ملزم جہانزادہ عرف سلیم نے اپنے دیگر ساتھیوں کے ہمراہ اکتوبر 2026 میں ایم پی آر روڈ پر واقع فیضان اسٹیل کے مالک کو مبینہ طور پر فتنہ الخوارج کے نام پر بھتے کی وصولی کے لیے دھمکی آمیز فون کالز کیں اور رقم ادا نہ کرنے کی صورت میں سنگین نتائج کی دھمکیاں دیں۔ واقعے کا مقدمہ تھانہ اورنگی میں درج ہے۔ترجمان کے مطابق گرفتار ملزمان مبینہ طور پر بھتہ خوری، منشیات فروشی اور اسٹریٹ کرائم کی متعدد وارداتوں میں ملوث رہے ہیں۔