کراچی(شوبز ڈیسک) نامور پاکستانی اداکارہ ماہرہ خان اور بالی وڈ کنگ شاہ رخ خان کی فلم رئیس کو ایک
سال مکمل ہونے پر ماہرہ نے کنگ خان کے ساتھ فلم کے دوران حسین اور یادگار لمحوں کو ٹوئٹر پر شیئر کرایا۔پاکستان کی خوبرو اداکارہ ماہرہ خان اور بالی وڈ کے بادشاہ شاہ رخ خان کی ایک برس قبل ریلیز ہونے والی فلم رئیس نے شائقین کی خوب داد سمیٹی تھی۔ راہول ڈھولکیا کی ہدایت کاری میں بننے والی فلم میں شاہ رخ خان گینگسٹر کے روپ میں نظر آئے تھے جب کہ ماہرہ خان کی خوبصورتی اور اداکاری کی بھی بے تحاشہ تعریف کی گئی تھی۔ بلاشبہ فلم رئیس ماہرہ خان کے کیرئیر کے لیے اہم سنگ میل ثابت ہوئی۔رئیس کے بعد ماہرہ خان کا شمار پاکستان کی صف اول کی اداکاراں میں ہونے لگا، یہاں تک کہ ماہرہ دنیا بھر میں گلوبل آئیکون بن گئیں۔ فلم رئیس کو ریلیز ہوئے ایک برس بیت چکا ہے لیکن ماہرہ خان ابھی تک اس کے سحر سے باہر نہیں نکل سکی ہیں ۔
فلم میں ماہرہ کا ڈائیلاگ بیٹری سالا بہت مشہور ہواتھا ماہرہ نے یہی ڈائیلاگ دہراتے ہوئے فلم کی شوٹنگ کے دوران لی گئیں تصاویر بھی شیئر کیں۔فلم رئیس پر پاکستان میں چند وجوہات کی بنا پر پابندی عائد کی گئی تھی جس پر ماہرہ خان کا کہنا تھا کہ یہ ان کی شاہ رخ خان کے ساتھ بالی وڈ میں پہلی فلم تھی اور وہ چاہتی تھیں کہ ان کے پاکستانی مداح بھی یہ فلم دیکھیں۔واضح رہے کہ فلم رئیس 2017 کی پہلی کامیاب فلم تھی جس نے ہریتھیک روشن کی قابل کو پیچھے چھوڑتے ہوئے 100 کروڑ سے زائد کا بزنس کیا تھا۔
