اسلام آباد(ویب ڈیسک)آپ نے بغیر شرمندگی کے زمین پر قبضہ کیا یہاں کوئی ٹماٹر نہیں بک رہے۔ یہ پیشکش معقول نہیں ہے۔ بحریہ ٹاﺅن کو پیشکش پر دوبارہ غور کرنے کا موقع دے رہے ہیں۔ جسٹس عظمت سعید کے ریمارکس۔بحریہ ٹاﺅن کراچی ہاﺅسنگ منصوبے کو قانونی دائرہ کار میں لانے کے لیے 16ہزار ایکڑ زمین کے عوض 358ارب روپے دینے کو تیار ہو گیا۔تفصیلات کے مطابق سپریم کورٹ میں بحریہ ٹاﺅن عدالتی فیصلے پر عمل درآمد کیس کی سماعت ہوئی۔جسٹس شیخ عظمت سعید کی سربراہی میں تین رکنی عمل درآمد بنچ نے کیس کی سماعت کی۔میڈیا رپورٹس میں بتایا گیا ہے کہ دوران سماعت جسٹس عظمت سعید نے ریمارکس دئیے کہ عدالت نے سرکاری زمین کی خرید و فروخت پر پاپندی عائد کی تھی۔اگر زمین فروخت کی گئی تو پولیس پرچے درج کرے۔ڈپٹی کمنشنر نے عدالت کو بتایا کہ سرکاری زمین کا قبضہ واپس لینے کے لیے پولیس اور رینجرز کو ہدایات جاری کر دی ہیں۔عدالت نے کہا کہ آپ کسی کی بھی مدد لے سکتے ہیں۔دورانِ سماعت بحریہ ٹاﺅن کے وکیل علی طفر نے عدالت کو کہا کہ 16896 ایکڑ زمین کے بدلے بحریہ ٹاﺅن 282 ارب روپے دے سکتا ہے۔زمین کا نرخ جے آئی ٹی نے 20 لاکھ فی ایکڑ لگایا تھا۔جسٹس عظمت سعید نے ریمارکس دئیے کہ جے آئی ٹی پر بھی جے آئی ٹی بنانے کی ضرورت ہے۔اب تک 492 ارب روپے بحریہ ٹاﺅن نے وصول کیے ہیں۔جسٹس عظمت سعید نے ریمارکس دئیے کہ پہلے آپ کو کہا تھا کہ زمین کے ٹھیک نرخ بتائیں اب آپ نے ٹرین مس کر دی ہے۔2019ءکا ریٹ 3کروڑ فی ایکڑ سے زائد ہے۔2014ء میں عدالت نے 225 ارب روپے جرمانہ عائد کیا تھا اب اس میں 40 فیصد اضافہ کریں۔جس کے بعد بحریہ ٹاﺅن کے وکیل نے کہا کہ یہ 315 ارب روپے بنتے ہیں۔بحریہ ٹاﺅن کے وکیل نے کہا کہ ہم 16 ہزار ایکڑ کے لیے 315 ارب روپے دینے کو تیار ہیں۔جسٹس عظمت سعید نے کہا کہ آپ نے بغیر شرمندگی کے زمین پر قبضہ کیا۔وکیل نے عدالت میں کہا کہ بحریہ ٹاﺅن زیادہ سے زیادہ 350 ارب روپے دے سکتا ہے۔جسٹس عظمت سعید نےریمارکس دئیے کہ یہاں کوئی ٹماٹر نہیں بک رہے۔بحریہ ٹاﺅن کے وکیل نے کہا کہ 7068 ایکڑ کے لیے 150ارب روپے دینے کو تیار ہیں جب کہ 9 ہزار ایکڑ زمین کے لیے 208 ارب روپے دے سکتے ہیں۔ جسٹس عظمت سعید نے ریمارکس دئیے کہ ٹرانسفر آف پراپرٹی ایکٹ کے تحت غیر قانونی قابض زمین نہیں بیچ سکتا۔اس پر وکیل نے کہا کہ بحریہ ٹاﺅن 600ارب روپے کا وعدہ نہیں کر سکتا۔وہ وعدہ کریں گے جس پر عمل کر سکیں۔16ہزار ایکڑ کے لیے 358ارب روپے دے سکتے ہیں اور 8 سال میں ادائیگی کریں گے۔جسٹس عظمت سعید نے کہا کہ یہ پیشکش معقول نہیں ہے۔ بحریہ ٹاﺅن کو پیشکش پر دوبارہ غور کرنے کا موقع دے رہے ہیں،آئندہ سماعت پر تمام فریقین کو سن کر فیصلہ کریں گے۔جس کے بعد مذکورہ کیس کی سماعت 29 جنوری تک ملتوی کر دی گئی۔

لاہور(ویب ڈیسک)وزیراعلیٰ پنجاب عثمان بزدار کی زیرصدارت ایوانِ وزیراعلیٰ میں اعلیٰ سطح کا اجلاس جاری ہے جس میں سینئر وزیر علیم خان، وزیر قانون راجہ بشارت، چیف سیکریٹری، ایڈیشنل چیف سیکریٹری داخلہ، آئی جی پولیس، متعلقہ ایجنسیز کے اعلیٰ افسران سمیت جے آئی ٹی کے ارکان بھی موجود ہیں۔ذرائع کے مطابق مشترکہ تحقیقاتی ٹیم نے واقعے سے متعلق ابتدائی رپورٹ وزیراعلیٰ کو پیش کردی جس پر غور و خوض جاری ہے۔
جے آئی ٹی سربراہ کا جائے وقوعہ کا دورہ
اس سے قبل جے آئی ٹی سربراہ نے ممبران کے ہمراہ جائے وقوعہ کا دورہ کیا جہاں تین سے چار عینی شاہدین کے بیانات قلمبند کیے گئے۔اس موقع پر انہوں نے میڈیا سے گفتگو کی اور وزیراعلیٰ پنجاب کی جانب سے حتمی رپورٹ آج دینے کے حکم پر کہا کہ آج حتمی رپورٹ نہیں دی جاسکتی اور آج ابتدائی رپورٹ دینا بھی ممکن نہیں، سائنٹیفک بنیادوں پر تفتیش کر کے حقائق معلوم کریں گے۔انہوں نے کہا کہ جب تک ساری چیزیں کلئیر نہ ہوجائیں اس وقت تک کچھ نہیں کہا جاسکتا، فائرنگ کرنے والے سی ٹی ڈی کے 6 اہلکار حراست میں ہیں جن کے بیانات ریکارڈ کر لیے ہیں اور ابتدائی طور پر ہم شہادتیں اکٹھی کررہے ہیں۔جے آئی ٹی سربراہ نے مزید کہا کہ ابتدائی شہادتوں اور لیبارٹری سے تجزیہ آنے کے بعد ہی کسی نتیجے پر پہنچیں گے اور لیبارٹری تجزیہ آنے کے بعد ہی رپورٹ وزیراعلیٰ کو پیش کریں گے۔واقعے کے وقت موجود شہریوں نے بھی میڈیا سے بات کرتے ہوئے کہا کہ جے آئی ٹی نے آنے سے پہلے کوئی اطلاع نہیں دی، واقعے کی جگہ درجنوں افراد موجود تھے اور صرف تین سے چار لوگوں کے بیانات لیے گئے۔
’ادھوری چیزیں فرانزک کیلئے دی گئیں‘
علاوہ ازیں ذرائع نے بتایا کہ تفتیش کے لیے فرانزک سائنس ایجنسی کو ادھوری چیزیں بھیجی گئی ہیں، ایجنسی کو ایس ایم جی سے چلی ہوئی 45 گولیوں کے خول بھیجے گئے جب کہ ایس ایم جی سے چلی ہوئی اور پوسٹ مارٹم سے ملی گولیاں نہیں دی گئیں۔ذرائع نے بتایا کہ فرانزک ایجنسی کو 9 ایم ایم کی 5 گولیاں بھی بھیجی گئیں، ایس ایم جی نہ بھیجنے کی وجہ سے تجزیہ کرنا مشکل ہے، ایس ایم جی کے بھیجے گئے 45 خول کا تجزیہ کرکے صرف محفوظ کرسکتے ہیں۔پولیس ذرائع کا کہنا ہےکہ سی ٹی ڈی اور پولیس کے استعمال میں ایس ایم جی ہی ہوتی ہیں۔واضح رہے کہ 19 جنوری کی سہہ پہر سی ٹی ڈی نے ساہیوال کے قریب جی ٹی روڈ پر ایک گاڑی پر اندھا دھند فائرنگ کی جس کے نتیجے میں میاں بیوی اور ان کی ایک بیٹی سمیت 4 افراد جاں بحق ہوئے جب کہ کارروائی میں تین بچے بھی زخمی ہوئے۔واقعے کے بعد سی ٹی ڈی کی جانب سے متضاد بیانات کی آمد کا سلسلہ جاری ہے، واقعے کو پہلے بچوں کی بازیابی سے تعبیر کیا بعدازاں ویڈیو منظر عام پر آنے کے بعد مارے جانے والوں میں سے ایک کو دہشت گرد قرار دیا گیا۔

لاہور (ویب ڈیسک ) سانحہ ساہیوال پر تشکیل دی جانے والی جوائنٹ انوسٹی گیشن ٹیم کی رپورٹ آج شام ۵بجے پیش کی جائے گی۔ جے آئی ٹی رپورٹ آنے کے بعد آئی جی پنجاب کو تبدیل کیے جانے کا امکان ظاہر کیا جارہا ہے۔ تفصیلات کے مطابق سانحہ ساہیوال کو مس ہینڈل کرنے پر وزیراعظم عمران خان نے آئی جی پنجاب کی کارکردگی پر اظہار برہمی کیا۔ذرائع نے بتایا کہ آئی جی پنجاب کی کارکردگی پر اظہار برہمی کرتے ہوئے وزیراعظم عمران خان نے وزیراعلیٰ عثمان بزدار کو ہدایت جاری کی کہ آئی جی پنجاب کو تبدیل کردیا جائے۔ ذرائع کے مطابق وزیراعظم عمران خان آئی جی پنجاب کی کارکردگی پر مطمئن نہیں ہیں۔ وزیراعظم عمران خان نے سانحہ ساہیوال پر ہی آئی جی پنجاب کو تبدیل کرنے کا فیصلہ کیا تھالیکن وزیراعظم عمران خان کے قریبی ساتھیوں نے انہیں مشورہ دیا کہ جے آئی ٹی رپورٹ آنے تک کا انتظار کر لیں۔میڈیا رپورٹ کے مطابق سانحہ ساہیوال کی جے آئی ٹی کی رپورٹ آنے پر وزیراعلیٰ پنجاب سردار عثمان بزدار کی زیر صدارت ایک اجلاس ہوگا جس میں چیف سیکرٹری ، آئی جی پنجاب اور ایڈشنل سیکرٹری داخلہ بھی شریک ہوں گے۔ جے آئی ٹی کی رپورٹ آنے کے بعد آئی جی پنجاب کو تبدیل کیے جانے کا قوی امکان ہے۔ دوسری جانب سانحہ ساہیوال کی جے آئی ٹی رپورٹ سامنے آنے پر کئی اعلیٰ افسران کو عہدوں سے ہٹائے جانے کا امکان ظاہر کیا جا رہا ہے جس پر پولیس کے اعلیٰ افسران اور سی ٹی ڈی افسران میں بے چینی پیدا ہو گئی ہے۔گذشتہ روز موصول ہونے والی اطلاعات میں پولیس کے اعلیٰ افسران کا محکمہ داخلہ پر دباﺅ ڈالے جانے کا انکشاف بھی ہوا۔ ذرائع نے بتایا کہ اعلیٰ پولیس افسران نے پیٹی بھائیوں کو بچانے کے کوششوں کا آغاز کر دیا ہے جس کے لیے اعلیٰ پولیس افسران کی جانب سے بار بار محکمہ داخلہ کو فون کیے جا رہے ہیں۔ پولیس افسران نے محکمہ داخلہ سے کیے رابطے میں موقف اپنایا کہ اگر ہمارے دس آپریشن درست اور ایک غلط ہو گیا تو کیا ہوا۔