اسلام آباد(ویب ڈیسک)ذرائع کے مطابق پاک فوج کے نئے سربراہ جنرل قمر جاوید باجوہ کی بطور آمی چیف تعیناتی کے بعد سینئر تین جنرلز لیفٹیننٹ جنرل اشفاق ندیم، لیفٹیننٹ جنرل نجیب اللہ اور لیفٹیننٹ جنرل جاوید اقبال رمدے سے کہا گیا تھا کہ وہ نئی تقرریوں تک کام جاری رکھیں۔ آرمی چیف جنرل قمر جاوید باجوہ کی جانب سے 7 میجر جنرل کو لیفٹیننٹ جنرل کے عہدے پر ترقی دینے کے بعد مذکورہ تینوں جنرل نے ریٹائرمنٹ کا اعلان کردیا۔پاک فوج کو ممکنہ طور پر خیرباد کہنے والے لیفٹیننٹ جنرل اشفاق ندیم کور کمانڈر ملتان جب کہ لیفٹیننٹ جنرل جاوید اقبال رمدے کور کمانڈر بہاولپور اور لیفٹیننٹ جنرل نجیب اللہ ڈی جی جوائنٹ اسٹاف سروسز ہیڈ کوارٹر کی خدمات انجام دے رہے ہیں۔واضح رہے کہ آرمی چیف جنرل قمر جاوید باجوہ سینیارٹی لسٹ میں چوتھے نمبر پر تھے جب کہ لیفٹیننٹ جنرل اشفاق ندیم دوسرے اور لیفٹیننٹ جنرل جاوید اقبال رمدے تیسرے سینئر ترین افسر تھے اور پاک فوج کی روایات کے مطابق اگر جونیئر افسر بڑے عہدے پر تعینات ہوتو سینئر سپرسیڈ ہوجاتا ہے تاہم یہ فوج کا قانون نہیں۔

گلگت (خصوصی رپورٹ)حساس اداروں نے پاکستان چین اقتصادی راہداری منصوبہ کے خلاف سازشوں میں مصروف نیٹ ورک پکڑ لیا۔ شمالی علاقہ جات سے 18 بھارتی ایجنٹوں کو ان کے ہینڈلرز اور سہولت کاروں سمیت گرفتار کر لیا گیا۔ ذرائع کے مطابق دہشت گردوں کو پاکستان چین اقتصادی راہداری کے منصوبوں کو تباہ کرنے کا ٹاسک دیا گیا تھا مگر حساس اداروں نے بروقت کارروائی کر کے دشمن کے ناپاک عزائم کو خاک میں ملا دیا۔ گرفتار بھارتی ایجنٹوں کے قبضہ سے دھماکہ خیز مواد، حساس مقامات کی تصاویر اور نقشے بھی پکڑے گئے۔ دہشت گردوں سے بعض انتہائی حساس دستاویزات بھی برآمد ہوئی ہیں جن سے پتہ چلتا ہے کہ وہ متعدد اہم مقامات اور تنصیبات کو نشانہ بنانا چاہتے تھے۔ ذرائع کے مطابق دشمن کے ایجنٹوں نے اپنے مقامی ایجنٹوں کے نام اگل دیئے ان کے خلاف کارروائی شروع کر دی گئی ہے۔ واضح رہے کہ اس سے قبل بھارتی سفارتخانہ میں سفارتکاروں کے روپ میں را کے ایجنٹوں کی نشاندہی ہوئی تھی۔