لاہور (خصوصی رپورٹ) نیب اور ایف آئی اے نے مولانا طاہر اشرفی کے خلاف امریکی اور جرمن این جی اوز سے رقم لینے کی درخواستوں پر ابتدائی کارروائی شروع کر دی۔ نیب ذرائع کے مطابق مولانا طاہر اشرفی کے خلاف جرمن این جی او سے لاکھوں روپے لے کر سوشل میڈیا اور مدارس میں انتہاپسندی کے خلاف اقدامات کرنے کا پراجیکٹ شروع کرنے کا الزام ہے۔ اس کے علاوہ امریکہ سے تعلق رکھنے والے ادارے دی انٹرنیشنل سنٹر فار ریلی جن اینڈ ڈپلومیسی سے لاکھوں روپے وصول کر کے فرقہ وارانہ انتہاپسندی کے خلاف ریپڈ ٹیم تیار کر کے دینے کا الزام ہے۔ ذرائع نے بتایا کہ پاکستان علماءکونسل کے سیکرٹری جنرل صاحبزادہ زاہد محمود اور ان کے ساتھیوں کی جانب سے مولانا طاہر اشرفی پر مالی بے ضابطگیوں کے حوالے سے ایف آئی اے کو درخواست دی گئی ہے۔ ذرائع نے بتایا کہ ایف آئی اے اور نیب میں ان شکایات پر فوری کوئی بڑی کارروائی نہیں کی جائے گی بلکہ ابتدائی کارروائی کے بعد شواہد دیکھ کر فیصلہ کیا جائے گا کہ انکوائری کیلئے ایف آئی اے اور نیب کے تفتیشی افسران کو کیس سونپ دیا جائے۔
طاہراشرفی‘ تحقیقات
