پنجاب حکومت نے شہریوں کو جدید اور ماحول دوست سفری سہولیات فراہم کرنے کیلئے ایک اور بڑے منصوبے آٹو میٹڈ ریل ٹرانزٹ (اے آر ٹی) سسٹم کو آپریشنل کرنے کا فیصلہ کر لیا ہے۔
وزیراعلیٰ پنجاب کی منظوری کے بعد اس میگا منصوبے کو تقریباً 6 ارب روپے کی لاگت سے مکمل کیا جائے گا، جبکہ ہدف رکھا گیا ہے کہ اسے جون سے قبل فعال کر دیا جائے۔
حکام کے مطابق اے آر ٹی سسٹم سی بی ڈی کلمہ چوک سے شروع ہو کر استنبول چوک تک جائے گا، جبکہ اس کا روٹ مین بلیوارڈ گلبرگ سے جیل روڈ کینال تک پھیلا ہوگا۔
منصوبے کے تحت چلنے والی ٹرین تین بوگیوں پر مشتمل ہوگی جس میں بیک وقت 270 مسافروں کے سفر کی گنجائش ہوگی۔ یہ ٹرین 15 سے 20 منٹ کے وقفے سے مختلف اسٹاپس پر پہنچے گی اور یومیہ تقریباً 18 ہزار مسافر اس سہولت سے مستفید ہوں گے۔
اے آر ٹی سسٹم کیلئے ٹرینیں CRRC فراہم کرے گی، جبکہ مقامی ٹرانسپورٹ کمپنی اس منصوبے کو آپریٹ کرے گی۔
حکام کا کہنا ہے کہ یہ منصوبہ نہ صرف شہریوں کو جدید، تیز اور آرام دہ سفر فراہم کرے گا بلکہ ماحولیاتی آلودگی میں کمی لانے میں بھی اہم کردار ادا کرے گا۔
