اسلام آباد (خصوصی رپورٹ) پنجاب میں جاری آپریشن کی گونج اسلام آباد میں سنائی دینے لگی۔ وفاقی دارالحکومت میں داعش کے منظم نیٹ ورک کا انکشاف ہوا ہے اس حوالے سے حساس اداروں نے نورین لغاری کی گرفتاری کے بعد اسلام آباد میں مبینہ طور پر نیٹ ورک سے رابطوں کی اطلاعات پر یاک لڑکی کی تلاشی کے ساتھ ساتھ اس کے غیر ملکی شوہر کی اسلام آباد میں حرکات و سکنات بھی نوٹ کانا شروع کر دی ہیں۔ باوثوق ذرائع کے مطابق ہائر ایجوکیشن کمیشن کی ٹاپ رینکنگ میں موجود اسلام آباد کی تین اہم یونیورسٹیوں میں داعش کے منظم نیٹ ورک کا انکشاف ہوا ہے، غیر ملکی طلبہ یونیورسٹیوں میں بڑی تعداد میں موجود ہیں اور رہائشی علاقوں میں بنائے گئے ہاسٹلز میں رہائش پذیر ہیں۔ مبینہ طور پر داعش کے نیٹ ورک سے منسلک لڑکی کے حوالے سے ذرائع نے بتایا سروادہ نامی یوگنڈا کا رہائشی انٹرنیشنل اسلامی یونیورسٹی میں گزشتہ 13 سال سے زیر تعلیم ہے۔ ویزہ ختم ہونے کے خوف سے اس نے گزشتہ سال ایک پاکستانی لڑکی سے شادی کر لی۔ ذرائع نے اس حوالے سے مزید بتایا کہ موصوف نائیجرین سفارت کار کے گھر میں غیر قانونی طور پر رہائش پزیر ہے۔
لاہور(خصوصی رپورٹ) حساس اداروں کے ہاتھوں گرفتار ہونے والی لڑکی نورین لغاری کے سنسنی خیز انکشافات کے بعد تحقیقاتی اداروں نے گرفتارلڑکی کے قریبی رشتے داروں ، فیس بک ، واٹس ایپ اور ٹیلی فون پر رابطہ کرنے والے عزیزوں، کلاس فیلو اور دوست لڑکیوں سمیت متعدد خاندانوں کو شامل تفتیش کرنے کا فیصلہ کر لیا ہے۔ ذرائع کا کہنا ہے کہ تحقیقاتی ٹیم نے حیدرآباد سے بھی متعد د خاندانوں کو تفتیش کے لیے طلب کیا ہے۔ دوسری جانب خاتون ڈاکٹر نورین لغاری کے والد اور بھائی کے بیانات کی روشنی میں بھی تحقیقاتی ٹیموں کو آگے بڑھایا ہے اور خاتون ڈاکٹر نورین لغاری سے اب تک کی ہونیوالی تفتیش کا ان بیانات کو بھی حصہ بنالیا ہے ۔ ذرائع نے یہ بھی بتایا ہے خاتون ڈاکٹر نورین لغاری سے تھانہ بیدیاں روڈ اور چیئرنگ کراس میں ہونے والے واقعات کی بھی الگ الگ تفتیش کی جارہی ہے۔
اسلام آباد کی 3یونیورسٹیوں میں ”داعش“ نیٹ ورک کی موجودگی کا انکشاف
