ٹیکسلا (خصوصی رپورٹ) سنگدل سوتیلی ماں نے 10 سالہ بچے کو تشدد سے مار کر نعش کنویں میں پھینک دی۔ تفصیلات کے مطابق ٹیکسلا کے گاﺅں ٹاس میں سوتیلی ماں نے 10 سال کے بیٹے کو محض اس لیے تشدد سے مار ڈالا کر اس کا خاوند اس کے بچوںکی بجائے سوتیلی بیٹے کو زیادہ پیار کرتا تھا۔ پولیس کے مطابق بچہ ہفتہ کو لاپتہ ہوا تھا لیکن اس کی نعش قریبی گاﺅں کے کنویں سے ملی جس پر تشددکے نشان تھے، بچے کے ہاتھوں پاﺅں اور گردن پر رسی کے نشانات تھے۔ پہلے تو مقدمہ نامعلوم افراد کے خلاف درج ہوا لیکن بعدمیں پولیس نے شک کی بنا پر ماں کو گرفتار کرلیا، تفتیش کے دوران ملزمہ نے بتایا کہ اس نے ہی بچے کو تشدد سے مارا تھا، مارنے کے بعد بچے کی نعش قریبی کنویں میں پھینک آئی، اس کا شوہر دوسری بیوی کے بیٹے کو زیادہ پیارکرتا تھا اور مجھ سے برداشت نہ ہوتا تھا۔

لاہور(خصوصی رپورٹ)سنگین جرائم میں ملوث ملک بھر کے 38خطرناک ملزموں کی گرفتاری کیلئے بیرونی ممالک سے رابطہ کر لیا گیا ہے جبکہ وفاقی تحقیقاتی ادارے اور قانون نافذ کرنے والے اداروں نے غیر ملکی خفیہ اداروں کے افسروں اور انٹر پول کیلئے انتہائی مطلوب ملزموں کے مکمل کوائف ،انکی تصاویر وغیرہ متعلقہ سفارتحانوں میں ارسال کردی ہیں ۔پنجاب میں انتہائی مطلوب ملزمان کی تعداد پندرہ ،سندھ میں گیارہ ،کے پی کے میں آٹھ جبکہ صوبہ بلوچستان کے چار ملزمان شامل ہیں جن پر ملکی فراڈ ،دہشت گردی ،تحریب کاری ،قتل ،بھتہ خوری، اغوا برائے تاوان، سرکاری عمارتوں پر حملے اور دیگر سنگین نوعیت کے مقدمات درج ہیں۔ ذرائع کے مطابق انتہائی خطرناک ملزم گل شبیر خان (بلوچی (جس کا تعلق کوئٹہ سے ہے جس پر دہشت گردی اور سرکاری عمارتوں پر حملے اور سنگین نوعیت کے مقدمات درج ہیں۔ اس کا نیٹ ورک افغانستان میں ہے جہاں وہ چند روز قیام کرنے کے بعد دوسرے ممالک میں جعلی دستاویزات پر چلا جاتا ہے ۔ سندھ کراچی سے تعلق رکھنے والے سیاسی جماعت کے سرگرم کارکن فیصل بھائی عرف گرینڈ کے خلاف بھی کراچی ناظم ساﺅتھ میں فراڈ، بھتہ خوری،20سے زائد افراد کے قتل ، دہشت گردی سمیت سنگین نوعیت کے مقدمات درج ہیں۔ ذرائع کا کہنا ہے کہ وہ کراچی میں رینجرز آپریشن کے دوران کوئٹہ سے ایران سرحد پار کرکے ترکی چلا گیا اور اب وہ انقرہ میں موجود ہے جہاں سے وہ اپنا نیٹ ورک چلا رہا ہے ۔ کراچی سے تعلق رکھنے والے فیصل عرف بھائی کے بڑے بھائی ادریس پر الزام تھا کہ اس نے اپنی سیاسی جماعت کے لیڈر کے حکم پر 30سال قبل اپنے پانچ ساتھیوں کے ہمراہ لاہورکے علاقہ اسلام پورہ میں 15 افراد کو قتل کیا تھا۔ پنجاب کاانتہائی مطلوب ملک منصور(کالیا )جو کہ جعلی ناموں سے وارداتیں کرتا تھا اسکے خلاف الزامات ہیں کہ اس نے ملکی و غیر ملکی مالیاتی اداروں سے فراڈ کیا۔ویزا کریڈٹ کارڈ ،اے ٹی ایم سے بھاری رقم نکلوائی۔ اسکے تین ساتھیوں کو وفاقی تحقیقاتی اداروں نے کچھ عرصہ قبل گرفتار کیا ہے ۔ منصور کالیا کا نیٹ ورک روس میں ہے ۔ منصور کی گرفتاری کیلئے وفاقی تحقیقاتی ادارے اور خفیہ ایجنسی نے تیاریاں شروع کر دی ہیں۔ ذرائع کا کہنا ہے کہ قانون نافذ کرنے والے ادارے وزارت داخلہ نے دبئی ،ملائیشیا،ایران ،ترکی،بنکاک ،افغانستان ،نیپال ،روس و دیگر ملکوں کے سفارتخانوں میں انتہائی مطلوب ملزموں کے کوائف بھجوا دیئے ہیں جبکہ ملکی خصوصی ٹیم اور غیر ملکی خفیہ اداروں کی ٹیم ملزموں کی گرفتاری کیلئے مشترکہ آپریشن کریں گی ۔وفاقی تحقیقاتی ادارے کے ترجمان ڈپٹی ڈائریکٹر حماد نے کہا ہے کہ ملزمان پولیس ،خفیہ اداروں اور ایف آئی اے کو عرصہ سے مطلوب ہیں اور ان ملزموں کا مکمل ریکارڈ ملک بھر کے تمام ایئر پورٹس پر موجود ہے ۔ 38 خطرناک ملزم

اسلام آباد (مانیٹرنگ ڈیسک) سیاسی رہنما غلام مصطفی کھر نے تحریک انصاف میں شمولیت کا اعلان کر دیاہے۔ نجی ٹی وی کے مطابق سیاسی رہنما غلام مصطفی کھر نے بن گالا میں پاکستان تحریک انصاف کے چیئرمین عمران خان سے ملاقات کی۔ اس موقع پر جہانگیر ترین، پرویز خٹک اور اسحاق خاکوانی بھی موجود تھے۔ غلام مصطفیٰ کھر نے عمران خان کے نظریات اور موقف کی تائید کرتے ہوئے تحریک انصاف میں شمولیت کا اعلان کیا۔

لاہور (خصوصی رپورٹ) نیو انارکلی کے محافظ پلازہ میں آتشزدگی سے 30 دکانوں میں کروڑوں روپے کا سامان خاکسترہوگیا ،بے بس تاجر عمربھر کی کمائی جلتی دیکھ کرروتے رہے ۔تفصیلات کے مطابق نیو انارکلی کے محافظ پلازہ میں گزشتہ علی الصبح آگ بھڑک اٹھی جس نے دیکھتے ہی دیکھتے پلازے میں موجود دکانوں کو لپیٹ میں لے لیا،پلازہ سے دھویں کے بادل بلند ہو رہے تھے ،7 گھنٹے سے زائد لگی رہنے والی آگ سے تہہ خانہ کی تمام 26 اور گرانڈ فلور کی 2دکانیں جل گئیں ،۔اطلاع ملنے پر ریسکیو 1122 اور سٹی ڈسڑکٹ فائر بریگیڈ کی 8گاڑیاں موقع پر پہنچیں اور امدادی کارروائیوں شروع کیں، تاہم آگ کی شدت زیادہ ہونے کے باعث مزید گاڑیوں کو طلب کیا گیا جنہوں نے کئی گھنٹوں کی بھرپور جدوجہد کے بعد آگ پر قابو پا لیا۔آگ کے بعد پلازہ میں دھواں بھر گیا جس سے امدادی کاموں میں دشواری کا سامنا رہا ۔آتشزدگی کی اطلاع ملتے ہی دکاندار پریشانی کے عالم میں موقع پر پہنچے اور ریسکیو ٹیموں سے تلخ کلامی کرتے رہے اور امدادی ٹیموں کی غفلت پر شدید برہم بھی ہو ئے ۔تاجروں کا کہنا تھا کہ ریسکیو عملہ کے پاس آگ بجھانے کے مکمل آلات نہ ہونے کے باعث آگ پر قابو پانے میں تاخیر ہوئی،5منزلہ پلازہ میں مردوں اور بچوں کے تیار ملبوسات کے گودام اور دکانیں موجود تھیں۔ کئی تاجر بے بسی کے عالم میں روپڑے اور وزیر اعلیٰ پنجاب سے نقصان کے ازالے کی بھی اپیل کرتے رہے ۔ریسکیو عملہ کا کہنا ہے کہ ابتدائی معلومات کے مطابق آگ شارٹ سرکٹ کے باعث لگی ۔ بروقت کارروائی کے باعث آگ پلازے کے دیگر فلورز تک نہ پہنچ سکی۔ایس پی سٹی کے مطابق صبح کے وقت پلازہ خالی تھا، اس لیے جانی نقصان نہیں ہوا، تاہم مالی نقصان کا اندازہ لگایا جا رہا ہے ۔اے سی کے مطابق واقعہ شارٹ سرکٹ کا نتیجہ ہے ،تجاوزات کے باعث آگ زیادہ پھیلی،آتشزدگی سے متاثر ہونے والا پلازہ پولیس فانڈیشن کی ملکیت ہے ۔ تاجروں کا کہنا ہے کہ پلازے کی ساری رقم پولیس فانڈیشن کو جاتی ہے مگر پلازے میں سہولیات اور انتظامات ناکافی ہیں۔ دوسری جانب وزیر اعلی پنجاب محمد شہباز شریف نے آتشزدگی کے واقعے کا نوٹس لیتے ہوئے رپورٹ طلب کر لی ۔ واضح رہے کہ لاہور میں رواں مہینے بھڑکنے والی یہ تیسری بڑی آگ ہے ، اس سے قبل یکم اپریل کو انارکلی سے ملحقہ گنپت روڈ کے پلازہ اور آٹھ اپریل کو راوی روڈ کی ٹمبر مارکیٹ میں آتشزدگی سے لاکھوں روپے کا سامان جل کرراکھ ہوگیا تھا ۔ جبکہ محافظ پلازہ انارکلی میں لگنے والی آگ کے دوران ایک تاجر ریسکیو اہلکاروں کی بہادری اورایمانداری کی وجہ سے ایک بڑے نقصان سے بچ گیا۔ ریسکیو اہلکاروں نے فرسٹ فلور پر واقع ایک دکان پر نہ صرف آگ پر کامیابی سے قابو پایا بلکہ دکان میں موجود تجوری سے ملنے والے اسی لاکھ روپے دکان مالک کے حوالے کردیئے۔ ڈسٹرکٹ ایمرجنسی آفیسر ریسکیو 1122 ڈاکٹر احمد رضا کے مطابق رقم پلازہ اور مارکیٹ عہدیداروں کی نشاندہی اور تصدیق کے بعد دکان مالک کے حوالے کی گئی۔

اسلام آباد (خصوصی رپورٹ) وزارت پٹرولیم نے حال ہی میں وفاقی کابینہ کی طرف سے صنعتی اور کمرشل گیس صارفین کے گیس کنکشن پر عائد پابندی ختم کرنے کے بارے میں باقاعدہ نوٹیفکیشن جاری کردیا ہے۔ سوئی ناردرن اور سوئی سدرن گیس کمپنیوں کو دیئے گئے احکامات کے مطابق صنعتی‘ کمرشل اور کیپٹو صارفین کے پرانے اور نئے گیس کنکشن پر عائد پابندی ختم کردی ہے۔ نوٹیفکیشن کے مطابق اس پابندی کے خاتمہ سے گیس کمپنیاں نئی ہاﺅسنگ سوسائٹیوں یا کالونیوں کیلئے درآمد کردہ ایل این جی کے صارفین کو گیس پائپ لائن بچھانے کی لاگت برداشت کرنا ہوگی۔

لاہور (خصوصی رپورٹ) لاہور پولیس نے پہلی بار تھانوں میں نفری کا آڈٹ کروانے کا فیصلہ کرلیا۔ ڈی آئی جی آپریشنز ڈاکٹر حیدر اشرف نے کہا ہے کہ تھانوں میں آبادی اور جرائم کے تناسب سے نفری مہیا کی جائے گی۔ پروٹوکول اور سکیورٹی کے لیے تھانوں سے نفری بھجوانے پر بھی پابندی عائد کر دی گئی ہے۔ نفری کو جرائم کی روک تھام کیلئے استعمال کیا جائے گا۔ انہوں نے کہا کہ نفری کے آڈٹ کیلئے ٹیمیں تشکیل دے دی گئی ہیں جو تھانوں کے گزشتہ دس سال کے دوران ہونے والے جرائم اور بڑھتی ہوئی آبادی کا تناسب دیکھے گئی۔ اس کمیٹی کی رپورٹ پر تھانوں میں نفری کو تعینات کیا جائے گا۔

کراچی(خصوصی رپورٹ) اردو بازار میں کالعدم تنظیم کے ہشت گردوں اور رینجرز کے درمیان مقابلہ جاری ہے، جس کے دوران فائرنگ اور دھماکے جاری ہیں، فائرنگ کے نتیجے میں ایک دہشت گرد ہلاک ہوا ہے جبکہایککو گرفتار کرلیا گیا ہے۔ترجمان رینجرز کے مطابق دہشت گردوں نے پہلے رینجرز پر دستی بم پھینکے اور پھر فائرنگ کی، جس کے نتیجے میں 4رینجرز اہلکار زخمی ہوگئے،زخمی اہلکاروں میں سلمان، انعام اللہ اور واحد شامل ہیں جنہیں طبی امداد کے لیے فوری طور پر ہسپتال منتقل کیا گیا ہے۔جوابی فائرنگ کے بعد دہشت گردوں نے خود کو ایک فلیٹ میں بند کرلیا، دہشت گردوں کی جانب سے فلیٹ سے چھپ کر فائرنگ کی جارہی ہے۔رینجرز حکام کا کہنا ہے کہ دہشت گردں نے رینجرز کو دیکھ کر خودکار ہتھیاروں سے حملہ کیا، ابھی کہا نہیں جا سکتا کہ فلیٹ میں کتنے دہشت گرد موجود ہیں۔ذرائع کے مطابق اب تک 4 دھماکے بھی ہو چکے ہیں، پورا علاقہ فائرنگ سے گونج رہا ہے، لوگ گھروں میں محصور ہو کر رہ گئے ہیں، جبکہ گلیوں میں رینجرز اہلکاروں نے پوزیشنیں سنبھال رکھی ہیں۔سندھ رینجرز حکام کے مطابق چھاپہ مشتبہ ملزمان کی موجودگی کی اطلاع پرمارا گیا تھا۔
لاہور(خصوصی رپورٹ)سی ٹی ڈی نے گوجرانوالہ میں کارروائی کرتے ہوئے جماعت الاحرار کے 3دہشتگرد گرفتار کرکے دہشتگردی کا منصوبہ ناکام بنا دیا۔تفصیلات کے مطابق کاونٹرٹیررازم ڈیپارٹمنٹ(سی ٹی ڈی )نے گوجرانوالہ میں چھاپہ مارکارروائی کے دوران 3دہشتگردوں کو حراست میں لے لیا جن کا تعلق کالعدم تنظیم جماعت الاحرارسے ہے، گرفتار ملزمان کے قبضے سے ڈیٹونیٹرز اور بارودی مواد بھی برآمد ہواہے۔ ابتدائی تحقیقات میں ملزمان نے انکشاف کیا ہے کہ وہ حساس تنصیبات اور مقامات پر حملے کی منصوبہ بندی کر رہے تھے۔تاہم پولیس نے زیرحراست ملزمان کیخلاف مقدمہ درج کرتے ہوئے نامعلوم مقام پر منتقل کردیا۔