اسلام آباد (خصوصی رپورٹ) کمرہ عدالت میں وزراءنوازشریف اور مریم نواز کو پستے‘ بادام اور سبز الائچی پیش کرتے نظر آئے جبکہ کوئی چیونگم آفر کرتا رہا۔ سابق وزیراعظم کے داماد کیپٹن صفدر اکیلے ہی بیٹھے رہے۔ صحافیوں سے غیرمسمی گفتگو کے دوران نوازشریف نے جیب سے لکھی ہوئی تقریر نکالی اور اس میں سے بھی کچھ حصہ پڑھا۔ حاضری اور انگوٹھے کا نشان لگوانے کے لئے جب عدالتی رجسٹر نوازشریف کے سامنے رکھا گیا تو اس پر انہوں نے دستخط کردیئے لیکن یہ کہہ انگوٹھے کا نشان لگانے سے انکار کردیا کہ انگوٹھا بعد میں لگا دوں گا۔ چونکہ انگوٹھا لگانے سے ہاتھ کے گندا ہونے کا ڈر تھا اس لئے کمرہ عدالت میں موجود وفاقی وزراءٹشو پیپر ڈھونڈتے رہے اور آخر کار وہ ٹشو لے آئے جس کے بعد ایک مقدمے میں نوازشریف کے ضمانتی وزیر طارق فضل چودھری نے کہا کہ عدالتی کارروائی کے لئے ایسا کرنا ضروری ہے جس کے بعد سابق وزیراعظم نے عدالتی رجسٹرڈ پر انگوٹھا لگایا۔
