کوالالمپور (اے پی پی) ویمنز ٹی ٹونٹی ایشیا کپ میں پاکستانی ٹیم کو بنگلہ دیش کے ہاتھوں شکست کا سامنا کرنا پڑا، بھارت اور سری لنکا نے مسلسل دوسری کامیابی حاصل کر لی۔ ملائیشیا میں جاری ایونٹ کے دوسرے روز کھیلے گئے ایک میچ میں بنگلہ دیش ویمن نے پاکستان ویمن کو 7 وکٹوں سے شکست دی، پاکستانی ویمن ٹیم نے پہلے کھیلتے ہوئے مقررہ اوورز میں 5 وکٹوں کے نقصان پر 95 رنز بنائے، ثناءمیر 21 اور ندا ڈار 17 رنز بنا کر ناٹ آﺅٹ رہیں، جویریہ خان 18، ناہیدہ خان 13، منیبہ علی 7 کپتان بسمعہ معروف 11 اور کائنات امتیاز 3 رنز بنا کر آﺅٹ ہوئیں، ناہیدہ اختر نے 2 وکٹیں لیں، جواب میں بنگلہ دیشی ویمن ٹیم نے مطلوبہ ہدف 17.5 اوورز میں 3 وکٹوں پر پورا کیا، نیگر سلطانہ 31 اور فہمیدہ خاتون 23 رنز بنا کر ناقابل شکست رہیں، انعم امین، ناشرہ اور ندا نے ایک، ایک وکٹ لی، ایک اور میچ میں بھارت ویمن نے تھائی لینڈ ویمن کو 66 رنز سے ہرا کر مسلسل دوسری کامیابی سمیٹی، سری لنکا ویمن نے میزبان ملائیشیا ویمن کو 90 رنز سے زیر کر کے مسلسل دوسری کامیابی حاصل کی۔ویمنز ٹی ٹونٹی ایشیا کپ کرکٹ ٹورنامنٹ میں آج کوئی میچ نہیں کھیلا جائیگا جبکہ کل مزید تین میچ کھیلے جائینگے۔ اس سلسلے میں پہلا میچ پاکستان اور سری لنکا کی ویمنز ٹیموں کے درمیان کھیلا جائیگا، دوسرا میچ ملائیشیا اور تھائی لینڈ کی ویمنز ٹیموں کے درمیان کھیلا جائیگا جبکہ تیسرا اور آخری میچ بنگلہ دیش اور بھارتی ویمنز ٹیموں کے درمیان کھیلا جائیگا۔
ویمنز ایشیا ٹی 20:بنگالیوں کے ہاتھوں پاکستان کو اپ سیٹ شکست
