لاہور(شوبزڈیسک) بالی وڈ میں فنکاروں کی نئی جنریشن انٹری کیلئے تیار، سری دیوی کی بیٹی جھانوی کپور 20جولائی کوپاکستانی شائقین کے دل دھڑکائیں گی ۔نئی فنکارہ کی پہلی فلم ”دھڑک“ میں شاہد کپور کے چھوٹے بھائی ایشان کھتر نے رومانوی ہیرو کا کردار ادا کیا ہے ۔بالی وڈ میں عالیہ بھٹ ، ورون دھون ، سدرھاتھ ملہوترا جیسے سپر سٹار متعارف کروانے کیلئے سٹار پروڈیوسر کرن جوہر کی نئی پیشکش ” دھڑک“ 20جولائی کو پاکستان سمیت دنیا بھرکے سنیماﺅں میں نمائش کیلئے پیش کی جائے گی ۔ سری دیوی کی 21سالہ بیٹی جھانوی کی ” دھڑک“ کے ٹریلر میں شامل ایک سین میں جھانوی کی ماں سری دیوی کے ساتھ مشابہت بھی فلمی حلقوں میں موضوع گفتگو بنی ہوئی ہے ۔ جھانوی کپور کے والد بونی کپور بالی وڈ کے نامور فلم پروڈیوسرزہیں لیکن جھانوی کے کیرئیر کا آغاز کرن جوہر کے پروڈکشن ہاﺅس سے ہونا اسکے سیلف میڈ آرٹسٹ ہونے کی نشاندہی کرتا ہے ۔ ڈائریکٹر شاشانک کھیتن کی زیر ہدایت بننے والی فلم ” دھڑک“ مکمل رومانوی فلم ہے جس میں جھانوی اور ایشان نے دو مختلف برادریوں سے تعلق رکھنے والے ایسے نوجوان طلبا کا کردار ادا کیا ہے جو محبت کے آفاقی رشتے میں مبتلا ہوجاتے ہیں ۔
