دبئی(آئی این پی) 1000ویں ٹیسٹ تک رسائی نے انگلش دھڑکنیں تیز کردیں۔انگلش ٹیم بھارت کے خلاف بدھ کے روز پہلے ٹیسٹ کیلیے میدان میں اترتے ہی نئی تاریخ رقم کردے گی۔ یہ اس کا ایک ہزارواں ٹیسٹ ہوگا، مارچ 1877میں میلبورن کرکٹ گرانڈ پر آسٹریلیا کے خلاف ٹیسٹ ڈیبیو سے اب تک کھیلے گئے 999ٹیسٹ میچز میں انگلش ٹیم کو 357میں فتح حاصل ہوئی، 297میں ناکامی کا منہ دیکھنا پڑا جبکہ 345کا اختتام ڈرا پر ہوا۔ بھارت سے پہلے ٹیسٹ کے میزبان وینیو ایجبسٹن پر انگلش ٹیم 50 میچز کھیل چکی، یہاں پر اس کا پہلا مقابلہ مئی 1902میں آسٹریلیا کے خلاف ہوا تھا۔ اس اسٹیڈیم میں انگلش ٹیم کو 27 فتوحات اور 8 ناکامیاں ہوئیں جبکہ 15میچز ڈرا ہوئے۔انگلش ٹیم نے بھارت سے پہلا ٹیسٹ جون 1932میں کھیلا تھا جس کے بعد اب تک کھیلے گئے 117طویل طرز کے مقابلوں میں اسے 43میں فتح، 25میں شکست ہوئی ہے۔

اپنے ملک میں انگلش ٹیم نے اس حریف کے خلاف 30میچز جیتے جبکہ بھارتی سورما صرف 6بار ہی یہاں پر کامیابی حاصل کرپائے جبکہ 21ڈرا ہوئے۔ یہ اعدادوشمار 5ٹیسٹ میچز کی سیریز کیلیے انگلش ٹیم کو فیورٹ قرار دے رہے ہیں، اس وقت ٹیسٹ رینکنگ میں کوہلی الیون ٹاپ اور انگلش ٹیم پانچویں نمبر پر موجود ہے۔اگر میزبان ٹیم 5-0سے کلین سوئپ کرنے میں کامیاب ہوجاتی ہے تو پھر وہ سیدھی 10پوائنٹس اضافے کے ساتھ دوسرے نمبر پر پہنچ جائے گی جبکہ اس کا بھارت سے 28پوائنٹس کا فاصلہ صرف 5پوائنٹس تک سمٹ آئے گا لیکن دوسری جانب اگر بھارت نے اپنی پوری قوت کا مظاہرہ کرتے ہوئے کلین سوئپ کیا تو پھر اس کی ٹاپ پوزیشن مزید مستحکم ہوجائے گی اور اس کے پوائنٹس کی تعداد 129تک پہنچ جائے گی۔اس صورت میں انگلش ٹیم کو 3 پوائنٹس کی کٹوتی کا سامنا کرنا پڑے گا اور وہ سری لنکا کی جگہ 94پوائنٹس کے ساتھ پانچویں سے چھٹے نمبر پر چلا جائے گا۔ اس تنزلی کے باوجود اس کو ساتویں نمبر پر موجود پاکستان پر 6پوائنٹس کی برتری حاصل رہے گی۔ٹیسٹ ٹیم رینکنگ میں اس وقت بھارت کے پوائنٹس 125ہیں، دوسرے نمبر کی جنوبی افریقی ٹیم کے آسٹریلیا کے برابر ہی 106پوائنٹس ہیں تاہم وہ اعشاریائی فرق کی وجہ سے کینگروز سے آگے ہے۔ نیوزی لینڈ 102پوائنٹس کے ساتھ چوتھا نمبر سنبھالے ہوئے ہے۔ انگلینڈ اور سری لنکا فی الحال 97، 97پوائنٹس کے ساتھ بالترتیب پانچویں اور چھٹے نمبر پر موجود ہیں، اعشاریائی فرق ہی انگلینڈ کو ایک قدم آگے رکھے ہوئے ہے۔ساتویں نمبر پرموجود پاکستان کے 88پوائنٹس جبکہ اس سے نیچے آٹھویں پوزیشن کا حامل ویسٹ انڈیز اس سے 11پوائنٹس پیچھے ہیں۔ بنگلہ دیش کے 67اور دسویں نمبر کی ٹیم زمبابوے کے صرف دو پوائنٹس ہیں۔

لاہور(آئی این پی) پاکستان ہاکی ٹیم نے واجبات کی عدم ادائیگی پر پی ایچ ایف کے خلاف اعلان بغاوت واپس لے لیا۔کپتان رضوان سینئرسمیت دیگرسینئرزکے ہمراہ قومی کھلاڑیوں نے 24گھنٹے کے اندر ہی پریس کانفرنس میں اپنا فیصلہ واپس لینے کا اعلان کردیا۔ ایشین گیمزکے لیے پاکستان ہاکی ٹیم کا اعلان ہوتے ہی ان کھلاڑیوں نے واجب الادا رقم کے لیے بھرپوراحتجاج کرتے ہوئے ایونٹ میں شرکت نہ کرنے کا فیصلہ کیا تھا۔پریس کانفرنس میں اظہار خیال کرتے ہوئے کپتان رضوان سینئر نے کہا کہ صدر پی ایچ ایف بریگیڈیر (ر)خالد کھوکھر نے معاملات سلجھانے کی یقین دہانی کرائی ہے اوریہاں تک کہہ دیا ہے کہ میں اپنے گھر کا سامان بیچ کر بھی کھلاڑیوں کے واجبات ادا کروں گا۔ قومی کپتان نے کہا کہ ہم نے بائیکاٹ نہیں کیا تھا بلکہ اپنا حق مانگ رہے تھے، اسی لے ٹریننگ جاری رکھی ہوئی ہے لیکن اگر وعدے کے مطابق پیسے نہ ملے تو ہمارا متفقہ فیصلہ ہے کہ ایشین گیمز میں شرکت نہیں کی جائے گی۔انہوں نے کہا کہ ہربڑے ایونٹ سے قبل ٹریننگ کیمپ اوراس کے بعد پی ایچ ایف نے ڈیلی الاونس ادا نہیں کیا، جس سے کھلاڑیوں ذہنی مسائل سے دوچارہیں، یہ عمل درست نہیں، انہوں نے کہا کہ یہ درست نہیں کہ ہم نے یہ سب کچھ پی ایچ ایف کی جانب سے حکومت پردبا ڈالنے کے لیے کیا، قومی کپتان نے کہا کہ یہ پاکستان ہاکی فیڈریشن ہی سے پوچھا جائے کہ اس نے 50 کروڑ روپے کہا خرچ کرڈالے۔

غیرملکی دروں پرغیرضروری لوگوں کو سرکاری خرچ پرلے جانے کا جواب بھی فیڈریشن ہی دے سکتی ہے لیکن حکومت روکے جانے والی 20 کروڑ روپے کی خصوصی گرانٹ جاری کرے۔اس موقع پرعرفان سینئیر اورعمران بٹ نے بھی اپنے خیالات کا اظہارکرتے ہوئے کہا کہ ہماری رینکنگ تنزلی کی جانب بڑھ رہی ہے۔

، دباو میں آکر نہیں ہم نے قدم نہیں اٹھایا تھا,مشترکہ فیصلے کے بعد ہم نے پریس کانفرس کی ہے,ملک ریاض سے گزارش ہے کہ وہ پہلے کے اعلان کردہ انعام بھی جاری کریں، ہمارا جو حق ہے وہ ادا کردیں یہی سب کی درخواست ہے، 6 ماہ سے ہمیں ایک پیسہ نہیں دیا گیا۔واضح رہے کہ عام خیال ہے کہ پی ایچ ایف کے سیکریٹری سابق اولمپئین شہباز سینئر کی ایما پر قومی ہاکی کھلاڑیوں نے اس فیصلہ کا اعلان کیا تھا جسے سرعت کے ساتھ واپس بھی لے لیا گیا، 22 برس قبل 1996 کے اٹلانٹا اولپمپکس سے قبل شہباز احمد ہی کی قیادت میں پاکستان ہاکی ٹیم نے پیسوں میں اضافہ کے لیے بغاوت کی تھی، پریس کانفرنس سے قبل شہباز احمد کے دست راست اولمپئین کامران اشرف کھلاڑیوں کے ساتھ موجود تھے۔

آکلینڈ(آئی این پی) نیوزی لینڈ کرکٹ بورڈ نے پاکستان کر کٹ بورڈ(پی سی بی) کی ٹی ٹوئنٹی سیریز پاکستان میں کھیلنے کی پیشکش کو مسترد کرتے ہوئے ٹیم بھیجنے سے معذرت کرلی۔تفصیلات کے مطابق پاکستان اور نیوزی لینڈ کے مابین 3ٹیسٹ،3ون ڈے اور3ٹی ٹوئنٹی میچز کی سیریز متحدہ عرب امارات (یو اے ای) میں شیڈول ہیں جس پر پاکستان کر کٹ بورڈکی جانب سے اصرار کیا گیا تھا کہ نیوزی لینڈ ٹیم کم از کم 3ٹی ٹوینٹی میچز کی سیریز پاکستان آکر کھیلے تاہم نیوزی لینڈ میڈیا کے مطابق پاکستان میں سیریزکھیلنے کےلئے مشاورت کی گئی جس کے بعد نیوزی لینڈکرکٹ نے پی سی بی کی درخواست پر معذرت کرلی ۔ اب اکتوبر2018میں یواے ای میں ہی3ٹیسٹ،3ون ڈے اور3ٹی ٹوینٹی میچزکھیلے جائیں گے۔نیوزی لینڈ کرکٹ بورڈ کے چیئرمین گریگ بارکلے کا کہنا تھا کہ پاکستان نے نیوزی لینڈ جیسی ایک بڑی ٹیم کا دورہ پاکستان سوچ رکھا تھا جس سے ملک میں بین الاقوامی کرکٹ کی واپسی میں مزیدمدد ملتی اور ہمارے انکار سے انہیں مایوسی ہو گی لیکن کچھ مشکل اوقات میں ایسے فیصلے کرنے پڑتے ہیں۔چیئرمین نیوزی لینڈ کرکٹ بورڈ کرس مولر کے مطابق سیکیورٹی رپورٹ کی بنیاد پر ٹیم پاکستان نہیں بھیج رہے۔ نیوزی لینڈ کے انکار کے بعد پاکستان متحدہ عرب امارات میں کیویز ٹیم کی میزبانی کرےگا۔یاد رہے کہ پاکستان اور نیوزی لینڈ کے درمیان فیوچر ٹور پروگرام کے تحت رواں سال اکتوبر سے دسمبر تک متحدہ عرب امارات میں 3ایک روزہ میچز پر مشتمل سیریز، 3 ٹیسٹ اور 3ٹی ٹوئنٹی میچز پر مشتمل سیریز شیڈول ہے۔ واضح رہے کہ 2003میں نیوزی لینڈ کرکٹ ٹیم نے پاکستان کا دورہ کیا تھا اور گزشتہ 15سال میں نیوزی لینڈ کو یہ پہلی بار دورہ پاکستان کی پیشکش کی گئی تھی جسے نیوزی لینڈ کرکٹ بورڈ نے مسترد کر دیا ہے ۔