سعودی وزیر پٹرولیم ریفائزی اور آئل سٹی کے قیام کیلئے گوادر پہنچ گئے

گوادر، اسلام آباد (آئی این پی، وقائع نگار) سعودی وزیر پٹرولیم وتوانائی خالد بن عبد العزیز الفالح آئل ریفائنری کی جگہ دیکھنے گوادر پہنچ گئے ، وزیر پٹرولیم غلام سرور خان غلام سرور خان نے کہا ہے کہ عنقریب گوادرمیں اسٹیٹ آف آرٹ ریفائنری بنائی جائے گی۔تفصیلات کے مطابق سعودی وزیر پٹرولیم وتوانائی اپنے وفد کے ہمراہ گوادر پہنچ گئے، وفاقی وزرا غلام سرور اور علی زیدی نے مہمانوں کا استقبال کیا جبکہ اسکول کے بچوں نے سعودی مہمانوں کو گلدستہ پیش کیا۔وفاقی و صوبائی سیکریٹریز، وزرا بھی ایئرپورٹ پر موجود تھے ، سعودی وزیراور وفدگوادر پورٹ کا دورہ کرے گا۔ وزیر پیٹرولیم غلام سرور خان نے کہا کہ سعودی وزیرگوادر میں آئل ریفائنری کی جگہ دیکھنے آ ئے ہیں ، عنقریب گوادرمیں اسٹیٹ آف آرٹ ریفائنری بنائی جائے گی، منصوبہ سعودی عرب کی پاکستان میں سب سے بڑی سرمایہ کاری ہے۔وزیر پیٹرولیم نے مزید کہاکہ آئندہ ماہ سعودی شہزادے کی آمد پردستخط متوقع ہیں، پاکستان کے سعودی عرب سے خصوصی تعلقات ہیں۔ ہفتہ کو چائینہ بزنس کمپلیکس میں اجلاس ہوا جس میں جی پی اے کے چیئرمین دوستین خان جمالدینی اور جی ڈی اے کے ڈی جی ڈاکٹر سجاد بلوچ نے وفد کو گوادر پورٹ اور ترقیاتی کاموں کے حوالے بریفنگ دی۔شہزادہ خالد بن عبد العزیز نے کہاکہ پاکستان میں سعودی عرب تاریخ کی سب سے بڑی سرمایہ کاری کرے گی۔شہزادہ خالد بن عبد العزیز نے کہاکہ پاکستان اور سعودی عرب خطے کے امن اور استحقام کیلیئے دو اہمیت کے حامل ممالک ہیں۔انہوںنے کہاکہ گوادر پورٹ ایک اہم خطے میں واقع ہے۔انہوںنے کہاکہ پاکستان ، چین اور سعودی عرب کی دوستی اور باہمی اشتراک عالمی مثال ہوگا۔وفاقی وزیر پٹرولیم غلام سرو ر خان نے کہا کہ سعودی عرب کی شمولیت سے سی پیک منصوبے کی اہمیت مزید بڑھ جائے گی۔غلام سرور خان نے کہاکہ پاکستان میں ایگریکلچر کے شعبے میں سرمایہ کاری کرنے کے وسیع مواقع موجود ہیں۔انہوںنے کہاکہ سعودی عربیہ کو پاکستان میں ایگریکلچر میں سرمایہ کاری کرنے کی دعوت دیتے ہیں۔انہوںنے کہاکہ پاکستان اور سعودیہ گوادر میں آئل سٹی کے قیام کیلئے اگلے ماہ معاہدے پر دستخط کریں گے۔