لاہور (مانیٹرنگ ڈیسک) چینل فائیو کے تجزیوں و تبصروں پر مشتمل پروگرام ”کالم نگار“ میں گفتگو کرتے ہوئے تجزیہ کار ضمیر آفاقی نے کہا ہے کہ نظریاتی کونسل مشورہ دے سکتی ہے۔ قانون سازی نہیں کر سکتی۔ ریاست مدینہ کا مطلب یہ نہیں کہ لوگوں کو مفت حج کرایا جائے۔ حج صاحب استطاعت کیلئے کسی غریب آدمی کیلئے نہیں۔ انہوں نے مزید کہاکہ حج سبسڈی پہلے عوام کو دوسرے ریلیف ملنے چاہئیں۔ حج اور زکٰوة دو ایسی چیزیں ہیں جو صاحب استطاعت ادا کرتے ہیں۔ انہوں نے کہاکہ سانحہ ساہیوال پر جو جے آئی ٹی بنی اس میں بندے باہر سے نہیں آئے‘ وہ کیا انصاف کریں گے۔ انہوں نے کہا ہمارے ہاں جو ادویات کی قیمتیں ہیں وہ دوسرے ممالک کی نسبت بہت زیادہ ہیں۔ یہ ایک مافیا ہے جس میں حکومتی لوگ بھی ملوث ہیں۔ تجزیہ کار آغا باقر نے کہا ہے کہ نظریاتی کونسل ایک آئینی ادارہ ہے اس کے منع کرنے کے باوجود حکومت نے حج اخراجات میں اضافہ کر دیا۔ غریب لوگ اپنے زیورات‘ زمینیں‘ مویشی بیچ کر حج پر جاتے ہیں۔ حج کیلئے غریب جتنا بے چین ہوتا ہے اتنا صاحب استطاعت بھی فکر نہیں کرتے۔ حکومت نے غریب کیلئے حج کرنا ناممکن بنا دیا‘ غریبوں کو سہولت ملنی چاہئے۔ انہوں نے مزید کہاکہ حکومت سانحہ ساہیوال کی ابتک کی تحقیقات میں کچھ بھی سامنے نہیں لا سکی۔ انہوں نے کہا حکومت نے پٹرولیم مصنوعات کی قیمتوں میں معمولی کمی کرکے عوام کے ساتھ مذاق کیا ہے۔ تجزیہ کار مریم ارشد نے کہا ہے کہ حج صاحب استطاعت لوگوں پر فرض ہے۔ پہلے دوسری ضروریات پوری کرنی چاہئیں۔ ہم یہ نہیں چاہتے کہ غریب حج پر نہ جائے‘ حکومت کو غور کرنا چاہئے کہ کہاں آسانیاں فراہم کر سکتے ہیں۔ اللہ صبر کرنے والوں کے ساتھ ہے۔ یہ غریب کے حق میں ہے۔ انہوں نے مزید کہاکہ سانحہ ساہیوال کی جتنی مذمت کریں وہ کم ہے۔ بچوں کو بار بار تحقیقات میں ملوث کرنا ظلم ہے‘ اگر اب بھی بچوں کو انصاف نہ ملا تو کبھی نہیں ملے گا۔ سانحہ ساہیوال کے ذمہ داران کو منطقی انجام تک پہنچانا چاہئے۔ تجزیہ کار میاں افضل نے کہا ہے کہ حج اخراجات میں اچانک 4لاکھ 36ہزار روپے کا اضافہ‘ اسکی تاریخ میں مثال نہیں ملتی۔ حکومت کو اقلیتوں کی طرح مسلمانوں کو بھی حج اخراجات میں سہولتیں دینی چاہئیں‘ کم سے کم پی آئی اے کا کرایہ ہی کم کر دے۔ انہوں نے مزید کہاکہ روزانہ کی بنیاد پر بینکوں کو 14کروڑ روپے سود دیا جا رہا ہے۔ بینکوں سے قرض لیکر ساری کی ساری گندم خریدی ہوئی ہے اس طرف کسی کا دھیان نہیں جاتا۔ اسلام کہتا ہے آسانیاں پیدا کریں یہاں حج کے اخراجات میں اضافہ کر دیا جاتا ہے۔ مائیں آخری عمر میں بچوں کو کہتی ہیں کہ مجھے حج پر بھیج دو۔ انہوں نے کہاکہ سانحہ ساہیوال پر جوڈیشل کمشن بننا چاہئے۔ سانحہ کے حقائق حکومت جانتی ہے اسی لئے تاخیر کرتی جا رہی ہے۔ فائرنگ کرنے والوں کا کوئی ریمانڈ نہیں ہوا‘ عوام کے جان و مال کی ذمہ داری ریاست کی ہوتی ہے۔ حکومت کے پہلے 6ماہ کے دوران 42 فیصد مہنگائی میں اضافہ ہوا۔
ریاست مدینہ کا مطلب یہ نہیں کہ لوگوں کو مفت حج کرایا جائے :ضمیر آفاقی ، حج کے اخراجات میں اچانک 4لاکھ 36ہزار روپے کے اضافہ کی مثال نہیں ملتی: میاں افضل ، اسلامی نظریاتی کونسل ایک آئینی ادارہ ہے اسکے روکنے کے باوجود حکومت نے حج اخراجات بڑھا دئیے: آغا باقر ، سانحہ ساہیوال کی جتنی مذمت کریں وہ کم ہے ، ذمہ داروں کو منطقی انجام تک پہنچنا چاہئے: مریم ارشد ، چینل ۵ کے پروگرام ” کالم نگار “ میں گفتگو
