تازہ تر ین

ملک میں 6 ماہ بعد تھیٹر بحال، کراچی آرٹس کونسل کا تھیٹر میلے کا اعلان

(ویب ڈیسک)ملک میں کورونا کیسز میں نمایاں کمی کے بعد اگرچہ حکومت نے ایک ماہ قبل ہی زیادہ تر پابندیاں اور سختیاں ختم کردی تھیں تاہم اس کے باوجود تاحال ملک بھر میں مکمل طور پر معمولات زندگی بحال نہیں ہوسکے۔

حکومت نے سخت احتیاطی تدابیر کے ساتھ سینما ہالز اور تھیٹرز کو بھی کھولنے کی اجازت دی تھی تاہم اس کے باوجود تاحال ملک میں سینما نہیں کھولے جا سکے اور نہ ہی تھیٹرز کا مکمل آغاز ہوا ہے۔

تاہم اب ملک کے سب سے بڑے شہر اور صوبہ سندھ کے دارالحکومت کراچی کے آرٹس کونسل نے باضابطہ طور پر آئندہ ہفتے سے تھیٹر فیسٹیول منعقد کرنے کا اعلان کردیا۔

محمد احمد شاہ نے بتایا کہ کراچی آرٹس کونسل میں رواں ماہ 18 ستمبر سے ‘عوامی تھیٹر فیسٹیول’ کا آغاز ہوگا، جو آئندہ ماہ 4 اکتوبر تک جاری رہے گا۔

‘عوامی تھیٹر فیسٹیول’ 17 روز تک جاری رہے گا اور اس دوران یومیہ ایک تھیٹر ڈراما پیش کیا جائے گا۔

تقریباً تین ہفتوں تک جاری رہنے والے تھیٹر فیسٹیول میں سندھی، پنجابی، سرائیکی اور میمنی زبان میں تھیٹر ڈراما پیش کیا جائے گا، جب کہ باقی تمام 13 ہی ڈرامے اردو زبان میں پیش کیے جائیں گے۔

‘عوامی تھیٹر فیسٹیول’ میں صوبہ سندھ میں بولی جانے والی دیگر زبانوں سمیت بلوچی اور پشتو زبان میں بھی کوئی تھیٹر ڈراما پیش نہیں کیا جائے گا۔

‘عوامی تھیٹر فیسٹیول’ میں پیش کیے جانے والے ڈراموں کو شائقین مفت دیکھ سکیں گے اور شائقین تھیٹر ڈرامے کے ٹکٹس آرٹس کونسل کے کاؤنٹر سے ایک دن قبل بھی حاصل کرسکتے ہیں۔

یہ بھی پڑھیں: تھیٹر بند ہونے سے فنکار فاقہ کشی پر مجبور ہیں، نسیم وکی

‘عوامی تھیٹر فیسٹیول’ میں ڈرامے دیکھنے کے لیے آنے والے شائقین کو ہدایات کی گئی ہیں کہ وہ فیس ماسک پہن کر آئیں اور سماجی فاصلے کا خاص خیال رکھیں۔

خیال رہے کہ کراچی آرٹس کونسل ماضی میں ‘عوامی تھیٹر فیسٹیول’ محکمہ ثقافت سندھ کے تعاون سے منعقد کرتا آیا ہے، جس وجہ سے ماضی میں سندھی سمیت دیگر زبانوں کے تھیٹرز بھی پیش کیے جاتے رہے ہیں۔

خیال کیا جا رہا ہے کہ کراچی آرٹس کونسل میں تھیٹر فیسٹیول کے انعقاد کے بعد سینما ہاؤسز بھی کھل جائیں گے اور ملک کے دیگر شہروں میں بھی تھیٹرز کا آغاز ہوگا۔


اہم خبریں
   پاکستان       انٹر نیشنل          کھیل         شوبز          بزنس          سائنس و ٹیکنالوجی         دلچسپ و عجیب         صحت        کالم     
Copyright © 2016 All Rights Reserved