لاہور(ویب ڈیسک) کورونا وائرس کے بعد حالات نارمل ہونے پر پی ایس ایل کا آخری مرحلہ جب بھی ممکن ہوگا اس میں سیمی فائنلز نہیں ہوں گے بلکہ پہلے سے طے شدہ فارمولے کے مطابق ایک ایلیمنٹر میچ، دو پلے آف اور ایک فائنل میچ کھیلاجائے گا۔
کورونا وائرس کے بڑھتے ہوئے واقعات کے بعد پی سی بی نے پی ایس ایل کا شیڈول تبدیل کرتے ہوئے پلے آف اور ایلیمینٹر راو¿نڈ کے بجائے براہ راست سیمی فائنل کروانے کا اعلان کیا تھا جس کے تحت ملتان سلطانز اور پشاور زلمی کے درمیان پہلا سیمی فائنل، لاہور قلندرز اور کراچی کنگز کے درمیان دوسرا سیمی فائنل ہونا تھا تاہم کراچی کنگز کے غیرملکی کھلاڑی الیکس ہیلز میں کورونا وائرس کے خدشات کے پیش نظر سیمی فائنل سے اڑھائی گھنٹے قبل ہی بورڈ کی جانب سے ان مقابلوں کو اچانک ملتوی کرنے کا اعلان کیا گیا۔ اب دوبار مقابلے جب بھی ممکن ہوں گے، وہ ایونٹ کے پرانے طریقہ کار کے تحت ہوں گے، پہلے نمبرپر موجود ٹیم ملتان سلطانز اور دوسری پوزیشن والی کراچی کنگز کے پاس فائنل تک رسائی کے لیے دو مواقع ہوں گے۔ ملتان سلطانز اور کراچی کنگز دونوں ٹیمیں ایلی مینیٹر میچ میں آمنے سامنے ہوں گی، فاتح ٹیم ڈائریکٹ فائنل میں رسائی پائے گی جب کہ ہارنے والی پہلے پلے آف لاہور قلندرز اور پشاور زلمی کے میچ کی فاتح ٹیم سے کھیلے گی۔اس دوسرے پلے آف میں جو ٹیم کامیابی پائےگی، وہ فائنل کھیل سکے گی۔

لاہور(ویب ڈیسک)نیوزی لینڈ کے بولر مچل میکلینگن نے شرجیل خان کی حمایت میں بیان جاری کردیا۔کراچی کنگز کے بولر کا کہنا ہے کہ پی ایس ایل 5 کے دوران اوپنر کو سخت ٹریینگ کرتے دیکھا، انہوں نے خود کو فٹ رکھنے کیلیے بہت کم آرام کیا، یہ بھی سوچتا رہا کہ وہ پاکستان ٹیم میں واپسی کیلیے ضرورت سے زیادہ محنت تو نہیں کر رہے جس کی وجہ سے ان کی بیٹنگ پرفارمنس میں تسلسل کی کمی نظر آتی ہے، تھوڑا آرام بھی کرتے تو شاید کارکردگی مزید بہتر ہوتی۔ شرجیل خان کی فٹنس میں کمزوریوں کو نظر انداز کرکے رواں سال آسٹریلیا میں ہونے والے ٹی ٹوئنٹی ورلڈ کپ میں صلاحیتوں کے اظہار کا موقع دیا جائے یا نہیں۔ مچل میکلینگان نے اس کا جواب دیتے ہوئے شرجیل خان کی حمایت کی ہے۔

لاہور(ویب ڈیسک) پشاور زلمی کے ہیڈ کوچ ڈیرن سیمی نے سینٹ لوسیا پہنچ کر قرنطینہ کرلیا،ان کا کہنا ہے کہ دوران سفر لوگوں سے فاصلہ برقرار رکھا، ہاتھ اچھی طرح دھوئے ہیں، میں نے منہ، آنکھوں اور ناک کو چھونے سے بھی گریز کیا،دوسرے ویسٹ انڈین کرکٹر چیڈوک والٹن نے بھی خود کو 14روز کیلیے تنہا کرلیا، ان کا کہنا ہے کہ گھر واپسی ہمیشہ ہی بڑی خوشی اور اطمینان کی بات ہوتی ہے، اس بار ملے جلے جذبات ہیں۔ کورونا وائرس کی وجہ سے پی ایس ایل 5 کے سیمی فائنلز اور فائنل کو ملتوی کر دیا گیا تھا،گذشتہ روز وطن واپس پہنچنے والے پشاور زلمی کے ہیڈ کوچ ڈیرن سیمی نے قرنطینہ کرتے ہوئے خود کو 14 روز تک عزیز و اقارب سے الگ رکھنے کا فیصلہ کیا ہے، سینٹ لوشیا پہنچنے کے بعد انھوں نے کہا کہ میں نے دوران سفر لوگوں سے فاصلہ برقرار رکھا، ہاتھ اچھی طرح دھوئے، منہ، آنکھوں اور ناک کو چھونے سے بھی گریز کیا،انھوں نے کہا کہ اگرچہ پاکستان سے روانہ ہونے سے ایک روز قبل ہونے والے کورونا ٹیسٹ کا نتیجہ منفی آیا، اس کے باوجود میں عزیز و اقارب سے میل جول کیلیے 14 دن انتظار کروں گا۔دوسری جانب پی ایس ایل میں کراچی کنگز کی نمائندگی کرنے والے چیڈوک والٹن بھی جمیکا واپس پہنچ گئے،اپنے پیغام میں انھوں نے کہا کہ گھر واپسی ہمیشہ ہی بڑی خوشی اور اطمینان کی بات ہوتی ہے لیکن اس بار ملے جلے جذبات ہیں، میں 14 روز تک از خود قرنطینہ میں رہوں گا، انھوں نے کہا کہ پاکستان میں سخت سیکیورٹی انتظامات کی وجہ سے عام لوگوں سے زیادہ میل جول کا موقع نہیں ملا، کم رابطے کی وجہ سے وائرس کا خطرہ بھی کم ہوتا ہے،بہرحال خیر و عافیت سے وطن واپسی ہوگئی، پی ایس ایل میں چند کرکٹرز کے لیگ مرحلے میں ہی دستبردار ہونے کے باوجود چیڈ وکٹ والٹن کی خدمات کراچی کنگز کو حاصل رہیں،پی سی بی کی جانب سے سیمی فائنلز اور فائنل ملتوی کرنے کے فیصلے پر تمام غیر ملکی کرکٹرز کی واپسی ہوگئی تھی۔

لاہور(ویب ڈیسک) پی سی بی نے 24 مارچ کو دفاتر دوبارہ کھولنے کا اعلان کرتے ہوئے تمام ملازمین کو نیا ہدایت نامہ جاری کیا ہے۔
پی سی بی کے مطابق پاکستان سپر لیگ کے التوا کے بعد بہت سے اہم معاملات پر کام ہونا ہے، جس کے لیے ضروری حاضری ہی برقرار رکھنے کا فیصلہ کیا گیا ہے۔ ذرائع کے مطابق وبا کے پھیلاو کی روک تھام کے لیے ڈاکٹر سہیل سلیم کی سربراہی میں ایک مانیٹرنگ ٹیم تشکیل دی گئی ہے جو دفاتر آنے والے ضروری اسٹاف کا ٹمپریچر باقاعدگی سے چیک کیا کرے گی۔پی سی بی نے کہا کہ ڈاکٹر ریاض، مقدس عمر،علی بخاری، وقاص ملک اور عامر اشفاق کو اس ٹیم کا حصہ بنایا گیا ہے، ملازمین کی اکثریت کو گھرپر ہی کام کرنےکو کہاگیاہے جبکہ دفاتر آنے والے اسٹاف کو سختی سے احتیاطی تدابیر اختیارکرنے کی ہدایت کی گئی ہے۔