اسلام آباد (نامہ نگار خصوصی) امریکی وزیردفاع ڈاکٹر مارک ایسپر نے آرمی چیف جنرل قمرجاویدباجوہ سے ٹیلیفونک رابطہ کرکے افغان امن معاہدے کو حتمی شکل دینے کیلئے پاکستان کے تعاون کوسراہا ۔تفصیلات کے مطابق امریکی محکمہ دفاع پینٹاگون کے چیف ترجمان جوناتھن ہوف مین نے کہا ہے کہ امریکی وزیر دفاع ڈاکٹر مارک ایسپر نے آرمی چیف جنرل قمر جاوید باجوہ سے ٹیلی فونک رابطہ کیا، بات چیت کےدوران دونوں ممالک کے مابین سیکیورٹی تعاون اور دیگر امور پر بات چیت ہوئی۔ امریکی وزیر دفاع ڈاکٹر مارک ایسپر نے افغان مفاہمتی عمل کیلئے 29 فروری کو ہونے والے امن معاہدے کو حتمی شکل دینے کیلئے پاکستان کے تعاون کی تعریف کی۔ امریکی وزیر دفاع مارک ایسپڑنے آرمی چیف جنرل قمر جاوید باجوہ سے ٹیلی فونک رابطہ کیا ہے جس میں مارک ایسپر نے پاکستان کے ساتھ جاری طویل مدتی تعاون پر اعتماد کا اظہار کیا۔امریکی محکمہ دفاع پینٹاگون کے ترجمان کے مطابق وزیر دفاع مارک ایسپر نے پاکستانی آرمی چیف جنرل قمر جاوید باجوہ سے ٹیلی فونک گفتگو کی ہے۔ ایسپر نے پاکستانی حکومت کے ساتھ طویل المدتی محکمہ جاتی تعاون اور باہمی فائدے کے لیے سیکیورٹی شراکت داری کی تائید کی۔امریکی وزیر دفاع نے افغان امن مذاکرات میں پاکستان کے تعاون کو بھی سراہا۔ مارک ایسپر کا کہنا تھا کہ پاکستان کے ساتھ قریبی تعاون مستقبل میں بھی جاری رہے گا۔

پیرس‘ واشنگٹن‘ اسلام آباد (نیٹ نیو) کیمبرج یونیورسٹی کے شعبہ سیاست وبین الاقوامی مطالعے کے سینئر فیلو مارٹن جیکوئس نے کہا ہے کہ ان کے خیال میں وبا سے نمٹنے کے لئے چین میں حکومتی صلاحیت کسی بھی مغربی ملک کی جانب سے حاصل کی جانے والی استعداد سے کہیں زیادہ ترقی یافتہ اور کہیں زیادہ قابل ہے۔یہ بات انہوں نے گلوبل ٹائمز کے نمائندوں سے گفتگو کرتے ہوئے کہی۔انہوں نےکہا کہ میرے خیال میں شروع کے ایک یا دوماہ کے لئے مغربی ممالک میں بہت زیادہ تنقید ہوئی جو اب بھی جوں کی توں ہے۔ لیکن چین کی جانب سے کرونا وائرس سے انتہائی موثر انداز سے نمٹنے کی وجہ سے مغرب کے اس موقف کوپذیرائی ملنا ختم ہو رہی ہے۔ فرانسیسی سائنس دانوں نے دعوی کیا ہے کہ ملیریا کے علاج کےلیے استعمال ہونے والی دوا اور اینٹی بائیوٹک دوا azithromycin ملاکر استعمال کی جائیں تو کرونا کی شدت میں کمی آسکتی ہے۔غیر ملکی خبر رساں ادارے کی رپورٹ کے مطابق چین کے انڈسٹریل شہر ووہان سے پھیلنے والی والی ہلاکت خیز وبا کرونا نے ساری دنیا کو اپنی لپیٹ میں لے رکھا ہے جس کے باعث اب تک 10 ہزار سے زائد افراد لقمہ اجل بن چکے ہیں۔فرانسیسی سائنس دانوں اور طبی ماہرین نے نئی تحقیق میں دعوی میں کیا ہے کہ ملیریا کے علاج کےلیے استعمال ہونے والی دوا Hydroxychloroquine اور اینٹی بائیوٹک دوا azithromycin کا امتزاج وائرس کی شدت کو کم کرسکتا ہے۔یہ تحقیقی رپورٹ جریدے انٹرنیشنل جرنل آف اینٹی مائیکروبیل ایجنٹس میں شائع ہوئی ہے جس میں بتایا گیا ہے کہ فرانس میں وائرس کے 30 مریضوں پر اس کا تجربہ کیا گیا جس میں کچھ مریضوں کو صرف ملیریا کی دوا کھلائی گئی جبکہ کچھ مریضوں کو دونوں ادویات ملاکر کھلائی گئی اور 6 مریضوں کو کوئی دوا نہیں کھلائی گئی۔میڈیا رپورٹس کے مطابق یہ تحقیق اس وقت شروع ہوئی تھی جب چین میں ان دونوں ادویات کے امتزاج سے کوویڈ 19 کی شدت میں کمی آرہی تھی اور مریضوں کی حالت بہتر ہورہی تھی۔تحقیق میں دریافت کیا گیا کہ انسداد ملیریا والی دوا بھی علاج کے طور پر موثر ہے مگر جب دونوں ادویات کو ایک ساتھ استعمال کرایا گیا تو وہ زیادہ موثر ثابت ہوئیں۔ امریکہ نے ملیریا کی دوا کلوروکین کی نئے مہلک کرونا وائرس کے علاج کے لئے استعمال کرنے کی منظوری دے دی ہے۔ انتہائی متعدی نول کرونا کووڈ 19وائرس چھینکنے اور کھانسنے سے پیدا ہونے والی ہوائی بوندوں کے اندر کئی گھنٹوں اور سطحوں پر کئی روز تک قابل عمل اور متعدی رہ سکتا ہے۔یو ایس نیشنل انسٹی ٹیوٹ آف ہیلتھ کے ادارہ برائے متعدی امراض اور الرجی(این آئی اے آئی ڈی)کے سائنسدانوں کی ایک نئی تحقیق کے مطابق کرونا کووڈ 19وائرس ہوا میں بوندوں (مائیکرو سکوپک ڈراپلیٹس) میں کئی گھنٹوں اور سطحوں پر کئی روز تک متحرک اور متعدی رہ سکتا ہے۔سائنسدانوں نے ایک خصوصی آلہ استعمال کیا جس نے کھانسی یا چھینکنے میں پیدا ہونے والے خوردبینی بوندوں کی نقل تیار کی گئی اور ہوا میں انہیں چھوڑا گیا۔نیو انگلینڈ جرنل آف میڈیسن میں شائع ہونے والی اس تحقیق کے مطابق وائرس، ائر ڈراپلیٹس جو کہ کھانسے اور چھینکنے سے بنتے ہیں میں کم از کم تین گھنٹے ہوا میں ہی متعدی اور متحرک شکل میں رہ سکتا ہے تاہم سائنسدانوں کے مطابق وائرس کے آدھے ذرات کو اگر وہ ایروسول بوندوں میں ہوں تو ان کے اپنے افعال کو کھونے (ڈی فنکشن ہونے) میں تقریبا 66 منٹ لگتے ہیں۔روکی ماو¿نٹین لیبارٹریز میں نیلجے وین ڈورملین کی سربراہی میں ہونے والی تحقیق کے مطابق ،اس کا مطلب یہ ہے کہ مزید ایک گھنٹہ اور چھ منٹ کے بعد ، وائرس کے تین چوتھائی ذرات لازمی طور پر غیر فعال ہوجائیں گے لیکن 25 فیصد پھر بھی قابل عمل رہیں گے۔  تیسرے گھنٹے کے اختتام پر قابل عمل وائرس کی مقدار کم ہوکر 12.5 فیصد رہ جائے گی۔ سٹینلیس سٹیل پر ، وائرس کے آدھے ذرات کو غیر فعال ہونے میں 5 گھنٹے 38 منٹ لگتے ہیں۔ پلاسٹک پر ،ان کی نصف حیات 6 گھنٹے 49 منٹ کی ہے ، محققین کے مطابق گتے یا کارڈ بورڈ پر اس کی نصف زندگی ساڑھے تین گھنٹے ہوتی ہے، لیکن محققین کا کہنا تھا کہ ان نتائج میں بہت زیادہ تغیر موجود ہے “لہذا ہم احتیاط کا مشورہ دیتے ہیں” ۔ تحقیق کے دوران وائرس کے زندہ رہنے کا سب سے کم وقت تانبے پر تھا ، جہاں آدھے وائرس 46 منٹ میں ہی غیر فعال ہو گئے تھے۔

اسلام آباد (نامہ نگار خصوصی) وزیراعظم عمران خان نے کہا ہے کہ کرونا وائرس کیخلاف جنگ میں پوری قوم کو ساتھ دینا ہو گا، ملکی معیشت اور غریب عوام مکمل لاک ڈاﺅن کے متحمل نہیں ہو سکتے، ہمیں چین کی طرح سماجی ڈسپلن کا مظاہرہ کرنا ہو گا، موجودہ حالات میں معاشی توازن قائم رکھنے کیلئے آئندہ ہفتے پیکیج کا اعلان کیا جائے گا، عوام افراتفری کا شکار ہونے کی بجائے احتیاطی تدابیر اختیار کریں، میڈیا کو اس سلسلے میں سنسنی پھیلانے سے گریز کرتے ہوئے ذمہ دارانہ کردار اداکرنا چاہئے، عالمی برادری ایران سے پابندیاں اٹھائے تاکہ وہ اس آفات پر قابو پا سکے۔ وہ جمعہ کو یہاں سینئر صحافیوں کے ساتھ کرونا وائرس کے حوالے سے ایک نشست میں اظہار خیال کر رہے تھے۔ وزیراعظم کے مشیر برائے صحت ڈاکٹر ظفر مرزا، مشیر خزانہ ڈاکٹر حفیظ شیخ، وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان اور چیئرمین این ڈی ایم اے لیفٹیننٹ جنرل محمد افضل بھی اس موقع پر موجود تھے۔ وزیراعظم نے کہا کہ چین میں کرونا وائرس کے پھیلاﺅ سے پیدا ہونے والی صورتحال کے پیش نظر 15 جنوری سے اقدامات شروع کر دیئے تھے، اس دوران 9 لاکھ لوگوں کی سکریننگ کی گئی ہے۔ ہم نے دنیا کے ردعمل کو سامنے رکھتے ہوئے وائرس سے بچاﺅ کے اقدامات کئے، جب ملک میں کرونا کے متاثرین کی تعداد 20 تک پہنچی تو ہم نے فوراً قومی سلامتی کمیٹی کا اجلاس بلایا اور وائرس کو پھیلنے سے روکنے کے لئے اجتماعات پر پابندی لگا دی، سکول، کالج، یونیورسٹیاں اور مدارس بند کر دیئے، اس سے بہتر اور بروقت ردعمل اور کیا ہو سکتا تھا۔ وزیراعظم نے کہا کہ ابتداءمیں تفتان میں سہولیات کا فقدان رہا تاہم بعد میں صورتحال کو قابو کر لیا تھا، وزیراعلیٰ بلوچستان کو مورد الزام ٹھہرانا زیادتی ہو گی۔ انہوں نے کہا کہ چین سے طلباءکو لانے کیلئے دباﺅ تھا لیکن چین نے ہمیں ان کا خیال رکھنے کی یقین دہانی کرائی تھی، پاکستان میں چین سے کرونا کا ایک بھی کیس نہیں آیا جس پر چین کی قیادت کے عزم کو داد دیتا ہوں۔ وزیراعظم نے کہا کہ بدقسمتی سے تہران سے وائرس آنے سے صورتحال خراب ہوئی، ایران پابندیوں کا شکار ہے اور ان حالات میں یہ ظلم ہے، عالمی برادری ایران سے پابندیاں اٹھائے تاکہ وہ اس آفات پر قابو پا سکے۔ انہوں نے کہاکہ دنیا کے تجربات سے ثابت ہو گیا ہے کہ کرونا وائرس کے پھیلاﺅ کو روکنے کا سب سے موثر طریقہ احتیاط ہے، ہماری قوم کو اس حوالے سے ڈسپلن کا مظاہرہ کرناہوگا، عام میل جول اور اجتماعات سے گریز کریں، وائرس سے متاثرہ افراد خود کو الگ تھلگ رکھیں اور صفائی کا خاص خیال رکھیں، ان اقدامات سے وائرس کے پھیلنے کے امکانات کم ہو جائیں گے۔ انہوں نے کہا کہ اس حوالے سے درکار آلات اور دیگر ضروری سامان حاصل کر لیا گیا ہے۔ موجودہ ضروریات کے پیش نظر انتظامات موجود ہیں جبکہ مزید انتظامات کیلئے بھی تیزی سے کام جاری ہے۔ وزیراعظم نے کہا کہ کرونا و ائرس اپنی جگہ خطرناک ہے لیکن اس کے خوف سے افراتفری بہت نقصان دہ ثابت ہوسکتی ہے۔ میڈیا کو اس حوالے سے سنسنی پھیلانے کی باجئے ذمہ دارانہ کردار ادا کرنا چاہئے۔ اس سلسلے میں رہنما اصول وضع کئے جا رہے ہیں جو میڈیا مالکان، اینکرز اور صحافیوں کو فراہم کئے جائیں گے۔ انہوں نے کہا کہ افراتفری اور خوف کے باعث لوگ اشیاءذخیرہ کرنا شروع کر دیں گے جس سے دیگر مسائل پیدا ہو سکتے ہیں، آج کرونا وائرس سے ہنگامی صورتحال پیدا ہوئی ہے جس کا مقابلہ پورے معاشرے نے مل کر کرنا ہے۔ انہوں نے کہا کہ یہ جنگ حکومت اکیلے نہیں جیت سکتی، اس کیلئے پوری قوم کو ساتھ دینا پڑے گا، ہم چین کی طرح ڈسپلن کا مظاہرہ کر کے اس پر قابو پا سکتے ہیں۔ وزیراعظم نے کہا کہ ہم سمجھتے ہیں کہ مکمل لاک ڈاﺅن مسئلہ کا حل نہیں، ہم نے اجتماعات جیسے عوامل کو روکنے کیلئے اقدامات کئے ہیں تاکہ وائرس کا پھیلاﺅ نہ ہو سکے تاہم مکمل لاک ڈاﺅن سے غریب اور روزانہ اجرت پر کام کرنے والا طبقہ شدید متاثر ہو گا جس سے نیا بحران جنم لے سکتا ہے۔ انہوں نے کہا کہ اس طبقہ کا روزگار برقرار رکھنے کیلئے تعمیراتی شعبہ کیلئے سہولیات کا اعلان کریں گے جس سے صنعتیں چلیں گی، کاروبار بڑھے گا، لوگوں کو روزگار ملے گا جبکہ معیشت بھی توازن برقرار رکھ سکے گی۔ وزیراعظم نے کہا کہ ہم ایک مکمل اقتصادی پیکیج کی تیاری پر کام کر رہے ہیں جس کا اعلان آئندہ منگل کو کیا جائے گا جس میں معیشت اور صنعت کو چلانے کے ساتھ ساتھ غریب اور کمزور طبقہ کے تحفظ کیلئے بھی اہم اقدامات کئے جائیں گے۔ انہوں نے کہا کہ اس پیکیج میں ٹیکسوں میں کمی اور سبسڈیز میں اضافہ جیسے اقدامات شامل ہوں گے۔ ہمارا مقصد کرونا وائرس پر قابوپانے کے علاوہ اپنے عوام کے معاشی تحفظ کو بھی یقینی بنانا ہے۔ ایک سوال کے جواب میں وزیراعظم نے کہا کہ درست معلومات کی فراہمی ہمامرے اپنے مفاد میں ہے، اس حوالے سے روزانہ کی بنیاد پر لوگوں کو آگاہی دی جائے گی۔ میڈیا ایسی صورتحال ظاہر نہ کرے جس سے لوگوں میں بے جا خوف اور افراتفری پیدا ہو۔ انہوں نے کہا کہ مکمل لاک ڈاﺅن کے نقصانات ہوں گے تاہم ہم صورتحال پر مسلسل نظر رکھے ہوئے ہیں، آنے والے دنوں میں حالات کو مدنظر رکھ کر مناسب اوربروقت اقدامات کئے جائیں گے۔ اس موقع پر ڈاکٹر ظفر مرزا نے کہا کہ قومی رابطہ کمیٹی نے کرونا کی وباءکے پیش نظر بعض امور کو قومی سطح پر سرانجام دینے کی ضرورت پر زور دیا ہے۔ انہوں نے کہا کہ معلومات اور اعداد و شمار قومی سطح پر مرتب کر کے لوگوں تک پہنچائے جائیں گے، اس مقصد کیلئے روزانہ کی بنیاد پر صوبوں سے ڈیٹا لیا جائے گا۔