لاہور(آئی این پی) فضائی آلودگی کے اعتبار سے بدھ بھی لاہور دنیا کے آلودہ ترین شہروں میں پہلے نمبر پر آگیا ہے۔ایئر کوالٹی انڈیکس کے مطابق لاہور کی فضاﺅں میں آلودہ ذرات کی مقدار 224 پرٹیکیولیٹ میٹرز ریکارڈ کی گئی، چینی شہر ووہان آلودہ ترین شہروں میں دوسرے جبکہ دہلی تیسرے نمبر پر ہے۔درجہ بندی کے مطابق 151سے200 درجے تک آلودگی مضر صحت ہے، 201سے 300 درجے تک آلودگی انتہائی مضر صحت ہے، 301سے زائد درجہ ، خطرناک آلودگی کو ظاہر کرتا ہے۔فضائی آلودگی ہوا میں موجود وہ مادے یا ذرات ہوتے ہیں جو کہ انسانی سرگرمیوں کی بدولت فضا کا حصہ بنتے ہیں۔ فضائی آلودگی گیسوں کی زیادتی، زہریلی گیسوں، تابکاری شعاعوں، کیمیائی مادوں، ٹھوس ذرات، مائع قطرات، گرد و غبار اور دھویں وغیرہ کی وجہ سے پیدا ہوتی ہے اور یہ انسانی صحت اور ماحول دونوں کو نقصان پہنچانے کا باعث بنتے ہیں۔دوسری جانب محکمہ موسمیات کا کہنا ہے کہ اگلے 24 گھنٹے میں شہر کا موسم سرد اور خشک رہےگا۔
لاہور کی فضا زہریلی، دنیا کا آلودہ ترین شہر قرار، ائیر کوالٹی انڈیکس 224 ریکارڈ
