جاوید افضل
دوسری جنگ عظیم کے بعد مغربی دانشوروں کے ایک گروپ نے ایک کتاب(Next hundred years) اگلے سو سال لکھی یعنی دنیا میں 2045ء تک کیا ہوگا علاوہ تحقیق کے امریکہ کی سربراہی میں اتحادی مغربی ممالک کی طرف سے ایک پالیسی بیان اپنایا گیا کہ جرمنی اور جاپان کی طرح کوئی نظریہ(تھیوری) دنیامیں عروج حاصل نہ کرسکے گی نہ ہی کوئی ملک اور علاقہ تعصباتی طورپر منظم ہو کر مغربی سرمایہ داری نظام کو چیلنج کرسکے گا اس وقت روس میں کمیونزم نظام ان کے لئے خطرہ تھا جن کے لئے ان ممالک نے امریکی سربراہی میں مشرق بعید میں جنگ کی اور چین‘ویٹ نام‘ کوریا اورلاؤس کمبوڈیا دیگر ممالک میں بھی تباہی کی اسی پالیسی کے تحت امریکہ نے پاکستان اور افغان مجاہدین سے مل کر روس کے ٹکڑے کردئیے یہ امریکہ کی ایک جارحانہ پالیسی ہے یعنیFragmentation of worldدنیا کو ٹکڑوں میں تقسیم کرنا اور کمزور ملکوں کے ان کے وسائل پر قبضہ کرنا جیساکہ لیبیا‘ عراق شام کے گیس اور تیل کے وسائل افریقی اور لاطینی ممالک میں امریکی مداخلت وغیرہ امریکہ افغانستان میں مزید گروہ بندی پیدا کرکے خانہ جنگی کو تیز کردے گا خود داعش جیسی دہشت گرد تنظیموں اور افغان اتحادی کوSafe haven فضائی تحفظ مہیا کرے گا اس خطے میں جو علاقائی ہم آہنگی چین کے بیلٹ اینڈروڈ منصوبہ سے پیدا ہونے کا امکان ہے کو روک دے گا کیونکہ یہ ممالک افغانستان میں ایک طویل پروکسی جنگ میں الجھ جائیں گے۔ وہ پاکستان کے بلوچستان شمالی علاقہ جات اور افغان سرحد پر جاری بد امنی کو مزید ہوا دے گا۔ پشتون اوربلو چ فیکٹرمیں تیزی پیدا کرے گا لیکن پاکستان کے آگے یورپ افریقہ اورمڈل ایسٹ کے وسائل اورپیچھے چائنہ بنگلہ دیش انڈیا‘ روس اورروس کے زیر اثر ممالک جن کو چائنا خوش قسمتی سے روڈ اینڈ بیلٹ پروگرام سے جوڑ رہا ہے۔ پاکستان تجارتی حب بن رہا ہے اس منصوبہ کو افغان خانہ جنگی کے ذریعے نقصان پہنچائے گا امریکہ نے صرف حکمت عملی تبدیل کی ہے۔ وہ افغانستان میں اپنی پالیسی کے ذریعے موجود رہے گا۔
پاکستان کی افغان پالیسی کا اگر جائزہ لیا جائے تو آپ کو حیرت ہوگی کہ اس پا لیسی اور اسلامائزیشن کامعمار ذوالفقار علی بھٹو تھا۔ پاکستان کی افغان پالیسی ایک خود مختار اور آزاد افغانستان ہے۔ جس پر پاکستان دشمن فورسز قابض نہ ہوں پاکستان اور افغانستان قدرتی طورپر اسی طرح جڑے ہوئے ہیں اس پالیسی کے لئے پاکستان نے بے پناہ قربانی دی ہے۔
بھٹو نے شہنشاہ ایران سے مل کر اور افغانستان میں سردار داؤد کے انقلاب کی حمایت کرکے تینوں ممالک کا ایک مسلم بلاک بنانے کی کوشش کی تھی شہنشاہ ایران اورذوالفقار علی بھٹو نے اس مقصد کے لئے کابل کادورہ کیا اورکابل یونیورسٹی میں بھی اسلامی قیادت کے سٹوڈنٹ لیڈر پیدا کیے جو بعد میں جہادی لیڈر بنے۔ ان میں برہان الّدین ربانی‘ صبغت اللہ‘ گلبدین حکمت یار‘ یونس خالص‘احمدشاہ مسعود تھے جبکہ روس کے حامی بائیں بازو کے لیڈر نور محمد ترکئی‘حفیظ اللہ امین ببرک کارمل ”شعلہ وطن“ نام کے ایک اخبار اور تنظیم سے وابستہ تھے۔ امریکی گروپ میں زلمے خلیل زادہ‘ حامد کرزئی‘ اشرف غنی وغیرہ تھے۔یہ1970اور1980ء کی دہائی کے کابل یونیورسٹی کے لیڈر ابھی تک قائم ہیں۔ پاکستان کے حامی جمعیت اسلامی اتحاد اوردیگر گروپ بھٹو نے بنوائے تھے۔ ان تینوں ممالک کے بلاک بننے اور روس مخالف گروپ کے کابل میں آجانے کے رد عمل میں روس نے افغانستان میں مسلح مداخلت کی۔ شہنشاہ ایران اور ذوالفقار علی بھٹو بھی ختم کردئیے گئے لیکن ہمارے دفاعی ادارے اس پالیسی سے پیچھے نہ ہٹ سکے۔ بھٹو کو امریکی خواہش پرختم کرکے اس پالیسی کے ذریعے امریکیوں کو یرغمال بناکرروسی ریچھ کو زخم خوردہ کرکے ماسکو تک بھگا دیا یہ ایک انتہائی گہری پیچیدہ ناقابل فہم اورمروجہ دفاعی طریقوں سے ہٹ کرپالیسی ہے اس میں اس کو بنانے والے بھی قربان ہوگئے۔
9/11کے بعد امریکہ افغانستان پرقبضہ کرکے ہمارے بارڈر پر روس کی طرح28ممالک کے اتحاد کے ساتھ آگیا ہم کس طرح برداشت کرسکتے تھے کہ ایک مسلمان ملک محکوم ہو جائے اور ہماری خودمختاری اور ایٹمی اثاثوں کوخطرہ پیدا ہوجائے ہم نے اسی پیچیدہ اور ناقابل فہم پالسی کے ذریعے ایک دفعہ پھر امریکہ کویرغمال بنالیا ہم امریکہ کے سامنے لیٹ گئے اوربظاہر اپنی خود مختاری اور اور افغانستان میں اپنے حامی جہادی گروپوں کی قربانی دے کر ہم امریکہ کے اندر گھس گئے۔ اب امریکہ کو سمجھ آیاہے اوراس نے حکمت عملی تبدیل کرلی ہے۔ شام کی طرح افغانستان مختلف ٹکڑوں اوردھڑوں میں تقسیم کر رہا ہے اور علاقائی ممالک کو جنگ میں مصروف کررہاہے اور پاکستان کو مشکلات پیش آئیں گی جب امریکہ اقوام متحدہ سے مینڈیٹ لے گا اور ہمیں پابندیوں کاسامنا ہوگا۔ افغانستان طاقتورجنگجو دھڑے امریکہ سے تعاون کرکے اور ایران کی مدد سے زیادہ طاقتور ہوگئے ہیں۔ مثلاً ہرات میں اسماعیل خان کی حزب وحدت خلیلی کی جنبش ملی۔ شمال میں شوریٰ نظاررشید دوستم کی ازبک اور ترکی فیکٹر کے ساتھ اوراحمد شاہ کادھڑایہ سارے طالبان اور پاکستان مخالف ہیں افغان فوج زیادہ تر ان پرمشتمل ہے امریکہ کے اتحادی بھی ہیں پاکستان کوشش کررہاہے کہ کوئی قابل قبول حل نکل آئے لیکن یہ ناممکن ہے۔
افغانستان ٹکڑوں میں تقسیم ہورہا ہے اوروہاں کوئی صورتحال ہو ہماری افغانستان کے ساتھ سرحد اور افغان بلوچ علاقوں میں بدامنی پیدا کی جائے گی اس کا حل علاقائی ہم آہنگی ہے جوکہ روس‘چین‘ ایران اور انڈیا کے ایک پیج پر آنے سے ہوگی اورریہ خطہ اقتصادی ترقی کرے گا۔اگر ایسا ہو جائے یعنی انڈیا پاکستان میں صلح سے دونوں ممالک استحکام ہوگا اوردونوں ممالک کے90 فیصد مسائل حل ہوجائیں گے۔ انڈیا‘ چین‘برما‘بنگلہ دیش روسی ممالک3ارب آبادی والے ممالک کے بذریعہ ریل اورٹرک کے گیس اورتیل مشرق وسطیٰ افریقہ اور یورپ کو پاکستان کے ذریعے جارہے ہیں خوش قسمتی سے چائنہ ان کو ملا رہاہے۔ افغانستان کا حل انڈیا پاکستان میں صلح اور علاقائی ممالک کی اقوام متحدہ کے ذریعے افواج کی تعیناتی ہے جو افغانستان مستحکم نظام کی ضمانت ہے۔
(کالم نگارسیاسی وسماجی اورمعاشی امورپرلکھتے ہیں)
٭……٭……٭

محمدنعیم قریشی
دس جولائی کے روز پاکستان کے معروف اخبار روزنامہ ”خبریں“ میں پینٹاگون کے بیان کی لگی شہ سرخی نے غالباً سب ہی کو چونکا دیا ہے جس میں امریکا عالمی قوتوں کو خبردار کررہا ہے کہ دنیا میں تیسری عالمی جنگ چھڑنے کاخدشہ ہے،اس بیان میں امریکی محکمہ دفاع کی جانب سے تشویش کا اظہار کیا گیا ہے کہ چین ایک ایسا بمبار تیارکررہاہے جو چین کو زمینی،سمندری اور ہوا کہ ذریعے اسلحہ فائر کرنے کی صلاحیت دے گاجبکہ ایک جگہ یہ بھی لکھا تھا کہ روس اور چین دس سال سے جدید اسلحہ بنارہے ہیں،قارئین کرام! میں سمجھتا ہوں کہ امریکا کا یہ بیان دنیا بھر میں خوف پیدا کرنے کی ایک سازش توہوسکتاہے مگر اس کاحقیقت سے کوئی تعلق نہیں کیونکہ امریکا خود اقرار کررہاہے کہ اب بڑی طاقتوں کے پاس ایسے ہتھیار موجود ہیں جو ایک نئی عالمی جنگ میں ایک دوسرے کی تباہی کا سبب بن سکتے ہیں،امریکا تو چند ایک ملکوں کی جانب اشارہ کررہاہے جبکہ حقیقت تو یہ ہے کہ نیوکلیئر بم صرف ایک امریکا کے پاس ہی نہیں ہے بلکہ یہ روس،چین، اسرائیل، انڈیا، نارتھ کوریا سمیت پاکستان کے پاس بھی موجود ہے بلکہ ان ممالک میں تو اب اس سے بھی زیادہ خطرناک ہتھیاروں پر کام ہورہا ہے وقت کے ساتھ ساتھ ان خطرناک ہتھیاروں کی ٹیکنالوجی میں بھی بے پناہ اضافہ ہورھاہے،میں سمجھتا ہوں کہ امریکا کو شاید اس بات کا دکھ ہے کہ دنیا اس قسم کا اسلحہ کیوں بنارہی ہے یعنی وہ خود بنالے تو ٹھیک ہے کوئی دوسرا اپنی حفاظت کے لیے ایسا کوئی قدم نہ اٹھائے! بظاہر تو ایسا ہی لگتاہے کہ امریکا دنیابھر میں بڑھتی ہوئی ایٹمی قوتوں سے خوفزدہ ہوچکاہے اور ان قوتوں کے سامنے اپنی طاقت کو کم ہوتا ہوادیکھ رہاہے،لہذاہم ماضی کی جانب دیکھیں تو ہمیں معلوم ہوگا کہ پہلی اور دوسری عالمی جنگوں سے ہمیں سوائے تباہی،خون خرابہ اور ہلاکتوں کے کچھ نہ ملا ہے کیونکہ دنیا اب یہ بھی جان چکی ہے کہ اس طرح کی بڑی جنگوں سے مسائل اور معاملات حل نہیں ہوتے لہٰذا امریکی محکمہ دفاع کی جانب سے اس قسم کی بات کرنا کوئی دانشمندی نہیں ہے۔اس سے قبل بھی امریکی وزیر خارجہ ہنری کسنجر نے نومبر2017میں ایک امریکی جریدے کو انٹریو دیتے ہوئے پوری دنیا کو تشویش میں مبتلا کردیاتھا جس میں کہاگیا تھا کہ تیسری عالمی جنگ کا راستہ ہموار رہورہاہے،اور ایران سے اس نقطہ جنگ کا آغاز ہوگا اور اس جنگ میں اسرائیل بھی شامل ہوگا، اور امریکا کی جانب سے ماضی میں ہم نے دیکھا کہ عراق میں موجود ایران کی ایک پاور فل شخصیت جسے ایرانی بہت مانتے تھے قاسم سلیمانی کو ایک ڈرون حملے میں ماردیا گیا،جو کہ امریکی صدر کا براہ راست حکم تھا اس ڈرون نے ایک خو دمختار ریاست اور اس کی طاقت کو للکارا تھاجس پر ایران نے بھی امریکا سے کڑا بدلہ لینے کا اعلان کیا تھا،لہٰذا اس قسم کے بیانات کا اگر بغور مطالعہ کیا جائے تو یہ بات واضح ہوجائے گی کہ امریکاخود ہی اس تیسری عالمی جنگ کی راہ ہموارکررہاہے جسے اسلحے کی دوڑ اور پوری دنیا میں اپنی طاقت کو منوانے کابخار لاحق ہے۔
دوسری جانب ماضی کی دو بڑی جنگوں کو چلانے میں بھی ایسے ہی طاقتور ممالک کا بنیادی کردار تھا جو ابھی تک تباہیوں کے اثرات محسوس کرتے ہیں اور یہ جان چکے ہیں اس میں کسی ایک ملک کی جیت ہوہی نہیں سکتی ماسوائے ہر سو تباہی کے ہر چند کہ دنیا ابھی دوسری جنگ عظیم کے زخم نہیں بھول پائی ہے خود امریکا کے عوام بھی نائن الیون کا خوف ابھی تک سر پر لیئے بیٹھے ہیں۔اس طرح امریکا سمیت جاپان جرمنی اور برطانیہ جیسے ممالک میں آج بھی ایسے لوگ مل جائیں گے جوجنگ کا نام سنتے ہی خوفزدہ ہوجاتے ہیں اور محفوظ جگہوں پر چھپنے کی کوشش کرتے ہیں۔ ان تمام باتوں کو سامنے رکھتے ہوئے سوال تو امریکا سے ہی کیا جاسکتا ہے کہ اگر تیسری جنگ ہو بھی گئی تو کیا امریکا اس کو آگے بڑھائے گا۔؟ آج کے دور میں ایسے خوفناک ہتھیار وجود میں آچکے ہیں جو گزشتہ جنگوں میں بھی نہیں تھے اور جو ہتھیار آج ہیں اس کا استعمال اگر ہوتا ہے توکسی بھی چھوٹے یا بڑے ملک کا بخیریت رہنا ممکن ہی نہیں ہے اور یہ بات ان تمام طاقتور ممالک کو اچھی طرح معلوم ہے کہ تیسری عالمی جنگ کے حتمی نتائج صرف تباہی ہے جس میں مارنے والا اور دفاع کرنے والا کوئی بھی نہیں بچے گا، یہ ہی وجہ ہے کہ اس وقت سپر طاقتیں اپنے اپنے سیاسی انداز میں محدود جنگوں کا طریقہ اختیار کیئے ہوئے ہیں یعنی پراکسی واراور غیر ریاستی عناصر کے ذریعے اپنے مخالف ملکوں میں عدم استحکام پیدا کرنا سوشل میڈیا کا استعمال اور خفیہ کارروائیاں کرکے اپنے مقاصد کو حاصل کرنا ان طریقوں میں شامل ہے،اس کے لیے اپنے ناپسندیدہ ممالک پر اقتصادی پابندیاں لگانایا پھر کسی اور ملک کے سیاسی تنازعوں میں دخل اندازی دے کر اپنی مرضی کی حکومتیں بنانا اب طاقتور ممالک کا سیاسی حربہ یا طریق کار بن چکاہے ان طاقتور ممالک میں اس قسم کی حرکتیں کرنے میں امریکا سرفہرست رہاہے جو ماضی میں پاکستان کی حکومتیں بنانے اور بگاڑنے میں اپنا اہم کرداراداکرتارہاہے جو بیس سال سے افغانستان میں اپنے مقاصد کے حصول میں لگا رہا یہ اور بات ہے کہ وہ اپنے لیے کوئی فائدے نہیں حاصل نہیں کرسکاہے لہٰذا اس ناکامی کے زمرے میں بھی امریکا کا یہ بیان دیکھا جاسکتاہے اور ممکن ہے کہ اس شکست کی وجہ سے ایشیاء کے ساتھ امریکا کے کچھ علاقوں میں سیاسی فسادات کا خطرہ ہو اور اس خدشے نے خود امریکا کو ہی خوفزدہ کیا ہو کیونکہ اس قسم کے جھگڑوں سے بڑی طاقتور قوتیں فائدہ اٹھانے کی کوشش کرسکتی ہیں یعنی جو یہ چاہیے گی کہ متاثرہ علاقوں میں ان کی مرضی کی حکومتیں اور قوانین بن سکیں اور ان بڑی طاقتوں کا اقتصادی تحفظ ہو اور ان کے مخالفین کو وہاں جگہ نہ مل سکے،لہذا میری نظر میں اس قسم کی علاقائی جنگیں ہوسکتی ہیں جن کے اثرات بین الاقوامی ہونگے جس سے پوری دنیا عدم استحکام کا شکار ہوسکتی ہے،اوراس تحریر میں جن چھوٹی چھوٹی محدود جنگوں کا ذکر کیا گیا ان میں افغانستان کی جنگ سب کے سامنے ہے جب کہ دیگر علاقائی جنگوں میں سیریا،عراق،شام،یمن اور لیبیا میں سیاسی خلفشار موجود ہے اور ان ملکوں کو عدم استحکام اور نقصان پہچانے میں بھی امریکا سمیت دیگر بڑی طاقتوں کا اہم کردار ہے۔
آخر میں یہ ہی کہوں گا کہ اب دنیا ایک نئے دور میں داخل ہوچکی ہے۔ ماضی کی جنگوں کی نسبت ہتھیار ہی نہیں بدلے دنیا کا نقشہ بھی تبدیل ہوچکاہے اس لیے اس نئے دور میں کسی بھی عالمی جنگ کا اندیشہ خاصہ مشکل دکھائی دیتاہے مگر جنگی جنون اور پوری دنیا میں ٹھیکیدار بننے کا شوق رکھنے والے ممالک کی وجہ سے یہ تیسری جنگ ناممکن بھی نہیں ہے کیونکہ ایک کہاوت بہت مشہور ہے کہ طاقت کا گھمنڈ آدمی کو اندھا کردیتاہے۔
(کالم نگار مختلف امورپرلکھتے ہیں)
٭……٭……٭

لیفٹیننٹ جنرل(ر)نعیم خالد لودھی
افغانستان کی صورتحال روز بروز تبدیل ہورہی ہے اور ہر طرح کے تجزیہ نگار اپنی اپنی سمجھ بوجھ کے مطابق آراء پیش کررہے ہیں۔ اکثر یہ دیکھا گیا ہے کہ جو بھی ہمارا ذہنی رجحان ہو ہم اپنا تبصرہ اس کے مطابق پیش کردیتے ہیں۔ کچھ لوگ ذہنی طور پر طالبان کے خلاف کہوں یا یہ کہوں کہ وہ ان کی سوچ سے مطابقت نہیں رکھتے لہٰذا وہ ہر واقعے کو اس عینک سے دیکھتے ہیں اور حالات وواقعات کو توڑ مروڑ کر اپنی سوچ کے مطابق پیش کردیتے ہیں۔ یہی حال دوسری طرف کے لوگوں کا بھی ہے جو طالبان کی حمایت میں زمین وآسمان کے قلابے ملا رہے ہیں۔ ان حالات میں اصل صورتحال کا معلوم کرنا نہایت مشکل ہوگیا ہے لیکن کچھ ایسے اشارے بھی ملتے ہیں جن پر سب متفق ہیں۔ آج ہم ایک ایسی چیزوں کا ذکر زیر نظر کالم میں کریں گے جو کچھ یوں ہیں۔
1۔پہلی بات تو یہ ہے کہ جس پر لوگ قریب قریب متفق ہیں وہ یہ ہے کہ امریکہ اور اس کے اتحادی افغانستان سے سیاسی اور معاشی ہزیمت کا شکار ہو کر افغانستان سے باامر مجبوری نکل رہے ہیں۔
2۔یہ کہ افغان طالبان کی جرأت‘ اولی العزمی اور عسکری مہارت کے سبھی لوگ معترف ہیں۔
3۔افغانستان میں فوجی توازن بڑے پیمانے پر افغان طالبان کے اس وقت حق میں ہے جب تک کہ کوئی بیرونی قوت افغان حکومت کو سہارا نہ دے اور یہ بات بھی سبھی مانتے ہیں کہ افغان طالبان نے بہت تیزی سے ملک میں آدھے سے زیادہ حصہ پر اپنا تسلط قائم کرلیا ہے۔
4۔ابھی تک گھمسان کی جنگ کے بجائے افغان طالبان نے بہت سا علاقہ گفت وشنید اور مقامی لوگوں کی رضامندی سے حاصل کیا ہے جس کا یہ مطلب بھی بنتا ہے کہ افغان طالبان کو بہت بڑے پیمانے پر افغان عوام کی حمایت بھی حاصل ہوتی جارہی ہے۔
5۔جب ہم افغانستان کے ہمسایہ ممالک پر نظر ڈوراتے ہیں تو یہ بات ابھر کر سامنے آتی ہے کہ وہ سب جنگ کو ہوا دینے کے بجائے قیام امن کی کوششوں میں مصروف ہیں۔ خاص طور پر پاکستان اور ایران کے رویوں میں بہت بڑی تبدیلی نظر آرہی ہے۔
6۔وسطیٰ ایشیائی ریاستیں بھی لگ بھگ اسی راستے پر گامزن ہیں۔
7۔یہ بھی دیکھنے میں آرہا ہے کہ چین اور روس افغانستان کے امن میں دلچسپی کا اظہار کررہے ہیں اور وہ یہاں سرمایہ کاری کرنے کے بھی متمنی ہیں۔
اوپر بیان کردہ نکات کے ساتھ اگر یہ حقائق بھی شامل کر لیے جائیں کہ افغان طالبان کے وفود نے چین‘ روس‘ ایران وغیرہ کے دورے بھی شروع کردیئے ہیں اور ان کے نمائندے ذبیح اللہ مجاہد اور سہیل شاہین کو سنیں تو انسان حیرت زدہ رہ جاتا ہے کہ وہ کس قدر لچک اور نرمی کا مظاہرہ کررہے ہیں۔
دو‘ تین مزید باتیں توجہ طلب ہیں کہ طالبان بار بار اس بات کا اعادہ کررہے ہیں کہ وہ حکومت سازی کے عمل اور مستقبل میں حکومتی ڈھانچے میں اور لوگوں کی شمولیت اور ان سے مشاورت بھی چاہتے ہیں۔ انہوں نے یہ بھی کہا ہے کہ وہ اقلیتوں کے حقوق اور ان کے تحفظ کے ضامن بھی ہوں گے‘ تمام سفارتخانے محفوظ رہیں گے‘ خواتین اپنی ملازمتوں وغیرہ پر جا سکیں گی۔ بچوں کی تعلیم کا سلسلہ بھی منقطع نہیں کیا جائے گا غرضیکہ طالبان کے حوالے سے دنیا بھر کے جو بھی شکوک وشبہات ہیں ان کا وہ تسلی بخش جواب دے رہے ہیں اور ماضی کی غلطیوں کے ازالے کا وعدہ بھی کررہے ہیں۔
ایک خبر یہ بھی سننے میں آئی ہے کہ برطانوی حکومت نے یہ اعلان کیا ہے کہ طالبان کی حکومت اگر قائم ہو بھی جائے تو وہ ان کے ساتھ تعلقات قائم کریں گے۔ لہٰذا تمام قرآئن اور اندازے اس سمت کی طرف اشارہ کرتے ہیں کہ آئندہ افغانستان میں بننے والی حکومت میں طالبان سب سے بڑے حصہ دار ہوں گے اور دنیا ان کو تسلیم کرنے کیلئے بھی تیار نظر آتی ہے اور اگر کوئی خانہ جنگی ہوئی بھی تو وہ مختصر دورانیے کی ہوگی۔ چین اور روس جیسے ممالک جب سرمایہ کاری کریں گے تو تمام خطہ ترقی کے راستے پر چل پڑے گا۔ پاکستان اس سے بے پناہ استفادہ کر سکے گا۔ نہ صرف یہاں پرامن کی صورتحال بہتر ہو جائے گی بلکہ سی پیک اور باقی کے ترقیاتی منصوبے بھی تیزی سے آگے بڑھیں گے۔ اس کی ایک وجہ تو یہ ہوگی کہ آنے والی افغان حکومت حتیٰ الامکان پاکستان دشمن قوتوں (مثلاً بی ایل اے‘ تحریک طالبان پاکستان‘ داعش وغیرہ) کو اپنی سرزمین استعمال نہیں کرنے دے گی۔ اس کے علاوہ چین‘ روس اور دیگر ممالک کی سرمایہ کاری بھی اس خطہ میں ترقی کا باعث بنے گی اور اس بات کا بھی قوی امکان ہے کہ کچھ مغربی ممالک (جرمنی‘ برطانیہ وغیرہ اور کچھ مڈل ایسٹ کے ممالک جن میں سعودی عرب‘ یو اے ای‘ قطر وغیرہ شامل ہیں) بھی یہاں پر سرمایہ کاری میں دلچسپی کا اظہار کر سکتے ہیں۔
لب لباب میری معروضات کا یہ ہوگا کہ تمام قوتوں نے تاریخ سے سبق شاید لیا ہوگا۔ نہ تو افغان طالبان آج سے20سال پہلے والے طالبان ہیں اور نہ ہی پاکستان اور ایران اور دیگر ہمسایہ ممالک پہلے والی سوچ رکھتے ہیں اور سیاسی اور معاشی خلا پُر کرنے والے چین اور روس جیسے ممالک بھی موجود ہیں۔
لہٰذا جو لوگ افغانستان میں امن نہیں چاہتے مثلاً بھارت‘ منشیات فروش‘ اسلحے کے سوداگر داعش‘ ٹی ٹی پی وغیرہ بہت کمزور ہیں ان قوتوں کے مقابلے پر جو امن کیلئے کوشاں ہیں ان میں سب سے آگے افغان عوام جن کو پوری تائید حاصل ہے‘ پاکستان‘ ایران‘ چین اور روس کی لہٰذا میری دانست میں جس قیامت صغریٰ کا نقشہ پیش کیا جارہا ہے وہ انشاء اللہ بپا نہیں ہوگی اور یہ خطہ امن اور خوشحالی کے سفر پر تیزی سے رواں دواں ہونے والا ہے۔
(کالم نگار سابق کورکمانڈر اور وفاقی
سیکرٹری دفاع رہے ہیں)
٭……٭……٭

ضیا بلوچ
جس طرح کہ ہر شخص بخوبی جانتا ہے کہ آج کل آزاد کشمیر میں انتخابی مہم زوروشور سے جاری ہے۔ دنیا کی اس حسین وادی کا موسم اور پھل ہی نہیں اس کے لوگ بھی خوبصورت ہیں۔ کشمیریوں کی شاندار روایات اور ان کے رویے بھی بہترین ہیں۔ یہ زبردست مہمان نواز ہیں اور آج کل انتخابی مہم کی وجہ سے ان پاکستانی سیاستدانوں کی میزبانی کر رہے ہیں جن کے نزدیک “گالی دینا ان کا کلچر ہے”۔ کشمیر میں انتخابی مہم چلانے والے پاکستانی مہمان اپنے اس کلچر کا خوب مظاہرہ کر رہے ہیں۔ کشمیر میں انتخابی مہم سیاست دانوں کی نئی نسل چلا رہی ہے۔
راحت اندوری نے کہا تھا
نئے کردار آتے جا رہے ہیں
مگر ناٹک پرانا چل رہا ہے
پیپلز پارٹی کے سربراہ بلاول بھٹو زرداری نے کشمیر میں مہم کا آغاز کیا لیکن کسی ضروری کام کے باعث انہیں فوری امریکہ جانا پڑ گیا اب آصفہ بھٹو ان کی جانشینی کے لیے تیار ہیں۔ویسے پیپلز پارٹی کے لیے لمحہ فکریہ ہے کہ بارہا اقتدار میں رہنے والی پاکستان کی بڑی سیاسی جماعت کے پاس ایک بھی لیڈر نہیں جو بلاول کے بعد کشمیر میں جا کر انتخابی مہم چلا سکے. دوسری طرف مسلم لیگ ن کا بھی یہی حال ہے۔شہباز شریف کو چاہنے کے باوجود بھی فرنٹ فٹ پر نہیں آنے دیا جا رہا اور انہیں قیادت کے حوالے سے مسلسل پیچھے دھکیلا جا رہا ہے. مریم نواز اپنے والد کی وراثت کو بلا شرکت غیرے سنبھالے ہوئے ہیں اور شہباز شریف دور بیٹھے کہہ رہے ہیں۔
ہم وفا کر کے بھی تنہا رہ گئے
رسا چغتائی کا شعر ہے
عشق میں بھی سیاستیں نکلیں
قربتوں میں بھی فاصلہ نکلا
تحریک انصاف کی طرف سے وزراء علی امین گنڈاپور،مراد سعید و دیگر انتخابی جلسوں کو اس انداز میں گرما رہے ہیں کہ ذولفقار علی بھٹو کو غدار،نواز شریف کو ڈاکو،مریم نواز کو ڈاکو رانی جیسے گھٹیا خطابات دئیے جا رہے ہیں. اور تو کچھ نہیں ہو رہا بس سیاسی ماحول مزید آلودہ اور تعفن زدہ ہو رہا ہے۔ جواب میں وفاقی وزیر علی امین گنڈاپور کو متوالے اور جیالے ”گنداپور“ کہہ کر اپنے مخصوص سیاسی کلچر کی ترجمانی کر رہے ہیں۔شیخ رشید تحریک انصاف کی الیکشن مہم کو بیک فٹ پر رہ کر پروان چڑھا رہے ہیں۔
گویا خوب موج مستی ہو رہی ہے۔اظہر عنایتی نے کہا تھا
وہ تازہ دم ہیں نئے شعبدے دکھاتے ہوئے
عوام تھکنے لگے تالیاں بجاتے ہوئے
وزیراعظم عمران خان نے آزاد کشمیر میں تین جلسوں سے خطاب کرنا ہے لیکن حیرت انگیز طور پر مریم نواز‘ عمران خان کی آمد سے قبل ہی ان کے لیے پلیٹ فارم تیار کر رہی ہیں۔ اتنا تذکرہ حکومتی وزراء نے عمران خان کے کشمیر آنے کا نہیں کیا جتنا مریم نواز عوام کو یہ ترغیب دینے میں کر رہی ہیں کہ عمران خان کشمیر آئیں تو ان کا استقبال نہ کرنا۔ ن لیگی لیڈر کے پُرجوش ہونے سے لگتا ہے کہ عمران خان کے آزاد کشمیر کے جلسے نہ صرف بڑے بلکہ تاریخی ہوں گے۔
سیاست دانوں سے میری گزارش ہوگی کہ جم کے اور ٹکا کے انتخابی مہم چلائیں مخالفین کو خوب رگیدیں کیونکہ ہمیں اچھا لگے یا نہیں پر یہی ہمارا سیاسی کلچر ہے لیکن خدارا اخلاقیات کا کچھ لحاظ ضرور کریں. وہ یہ بھی سوچ لیں کہ وہ ایک دوسرے کی سیاسی جماعتوں سے ہی نکل کر آئے ہیں… اور پھر انہوں نے جلد یا بدیر انہی میں واپس جانا ہے… بقول بشیر بدر
دشمنی جم کر کرو لیکن یہ گنجائش رہے
جب کبھی ہم دوست ہو جائیں تو شرمندہ نہ ہوں
دوسری طرف آزاد کشمیر کے عوام سے کہوں گا کہ یہ سب تماشا 25 جولائی کو ختم ہو جانا ہے۔مہمانوں نے واپس چلے جانا ہے لیکن آپ نے ایک ساتھ رہنا ہے… مخالفتیں اتنی آگے نہ لے جائیں کہ واپسی کا راستہ نہ رہے۔ ویسے بھی خادم ندیم کا شعر ہے کہ
ان سے امید نہ رکھ ہیں یہ سیاست والے
یہ کسی سے بھی محبت نہیں کرنے والے
(کالم نگار قومی و سیاسی امور پر لکھتے ہیں)
٭……٭……٭