اسرائیل کی دہشت گردانہ کارروائیوں میں سال 2021ء کے دوران 313 فلسطینی شہید ہوئے جبکہ صہیونی ریاست نے درجنوں مکانات مسمار کرکے 900 سے زائد فلسطینیوں کو بے گھر کردیا۔
انسانی حقوق کی ایک اسرائیلی تنظیم نے اپنی رپورٹ میں انکشاف کیا ہے کہ اسرائیل ن گزشتہ سال 300 سے زیادہ فلسطینیوں کو شہید کیا، جو 2014ء کے بعد سے ایک سال میں فلسطینیوں کی سب سے زیادہ شہادتیں ہیں، اس دوران مارا جانیوالا ہر پانچواں شخص بچہ تھا۔
منگل کو جاری رپورٹ میں مزید بتایا گیا ہے کہ گزشتہ سال کے دوران اسرائیلی سیکیورٹی فورسز کی جانب سے ’مہلک، غیراخلاقی اور کھلے عام فائرنگ کی پالیسی‘ کے استعمال کے نتیجے میں مقبوضہ فلسطینی علاقوں میں 71 بچوں سمیت 313 فلسطینی شہید ہوئے۔
رپورٹ کے مطابق ان شہادتوں میں سے 70 فیصد افراد حماس سے مئی میں ہونے والی جنگ کے دوران مارے گئے، کئی روز تک جاری رہنے والی اس کشیدگی کے دوران مقبوضہ مغربی کنارے اور مشرقی بیت المقدس میں بھی 77 فلسطینی شہید ہوئے تھے۔
انڈیپینڈنٹ کی رپورٹ کے مطابق بی تسیلم نامی فلاحی ادارے نے بتایا ہے کہ 2021ء میں تقریباً 900 فلسطینیوں کو بے گھر کردیا گیا، اسرائیل کی جانب سے اس سال فلسطینیوں کے گھروں کی مسماری 5 سال کی بلند ترین سطح پر رہی۔
تنظیم نے یہ بھی کہا کہ اسرائیل کی جانب سے مقبوضہ مغربی کنارے اور مشرقی بیت المقدس میں سینکڑوں رہائشی مکانات کو مسمار کئے جانے کے بعد گذشتہ سال 895 فلسطینی، جن میں 463 بچے بھی شامل ہیں، بے گھر ہو گئے۔ یہ 2016 کے بعد فلسطینیوں کے مسمار کیے گئے مکانات کی سب سے زیادہ تعداد ہے۔
واضح رہے کہ عام طور پر اسرائیل عمارتوں کے اجازت ناموں کی عدم موجودگی کا حوالہ دیتے ہوئے باقاعدگی سے فلسطینیوں کے مکانات مسمار کرتا ہے تاہم انسانی حقوق کی تنظیموں کا کہنا ہے کہ فلسطینیوں کے لیے یہ اجازت نامے حاصل کرنا تقریباً ناممکن ہے چاہے یہ تعمیر ان کی ذاتی ملکیتی زمین پر ہی کیوں نہ کی گئی ہو کیوں کہ اجازت ناموں کے بغیر تعمیر کرنے کے علاوہ ان کے پاس کوئی چارہ نہیں بچتا۔
بی تسیلم کی رپورٹ میں بتایا گیا ہے کہ 14مئی 2021ء مقبوضہ مغربی کنارے میں 2002ء کے بعد سب سے ہلاکت خیز دن تھا جس میں 13 فلسطینی جاں بحق ہوئے۔ رپورٹ میں یہ بھی کہا گیا ہے کہ اس جرم میں اسرائیلی آباد کار بھی شامل تھے۔
گروپ کے مطابق پچھلے سال یہودی آبادکاروں کی جانب سے فلسطینیوں پر تشدد میں اضافہ ریکارڈ کیا گیا، 2021ء میں ایسے 336 واقعات کی تحقیق کی گئی جبکہ 2020ء میں ان واقعات کی تعداد 251 تھی۔
