اسلام آباد(نامہ نگار خصوصی ) وفاقی وزیر مواصلات عبدالعلیم خان نے نیشنل ہائی وے اتھارٹی کو مانسہرہ سے ناران تک 123 کلومیٹر شاہراہ کو ماڈل منصوبے کے طور پر تیار کرنے کے لیے فیزیبلٹی پیش کرنے کی ہدایت کر دی ہے۔ انہوں نے کہا کہ یہ تین لین کا موٹروے کا مجوزہ منصوبہ نہ صرف سیاحت کے فروغ بلکہ چین تک تجارتی روابط مضبوط بنانے میں بھی سنگ میل ثابت ہو سکتا ہے۔وفاقی وزیر مواصلات عبدالعلیم خان کو اجلاس میں مانسہرہ، ناران، جھالکنڈ، چلاس شاہراہ کے مختلف امور اور منصوبے پر پیش رفت کے حوالے سے تفصیلی پریزینٹیشن دی گئی۔ عبدالعلیم خان نے ہدایت کی کہ اس منصوبے کے تمام پہلووں کا جائزہ لے کر قابلِ عمل اور جامع رپورٹ تیار کی جائے تاکہ اس اہم شاہراہ کو جدید تقاضوں کے مطابق بنایا جا سکے۔ وفاقی وزیر مواصلات عبدالعلیم خان کی زیر صدارت نیشنل ہائی وے اتھارٹی کے خصوصی اجلاس میں اہم شاہراہوں کی تعمیرسمیت ادارے کے اہم امور کا جائزہ لیا گیا۔وفاقی وزیر مواصلات نے کہا کہ گورو نانک ایکسپریس وے کے منصوبے کو انٹرنیشنل ٹینڈرنگ کے مرحلے میں لے جانے کا فیصلہ بھی کیا گیا۔ عبدالعلیم خان نے کہا کہ گورو نانک ایکسپریس وے سکھ کمیونٹی کے لیے مذہبی، تاریخی اور روحانی اعتبار سے خصوصی اہمیت کا حامل منصوبہ ہوگا، اس لیے اس کی تعمیر میں عالمی معیار کو ملحوظ خاطر رکھا جائے گا۔انہوں نے کہا کہ گورو نانک ایکسپریس وے کے لیے عالمی سرمایہ کاری لائی جائے گی اور برطانیہ، کینیڈا اور امریکہ میں مقیم سکھ برادری کو اس منصوبے پر سرمایہ کاری کی دعوت دیں گے۔ وفاقی وزیر نے کہا کہ منصوبے کو جدید انفراسٹرکچر، بین الاقوامی معیار اور سرمایہ کاری کے بہترین مواقع سے ہم آہنگ کیا جائے گا۔اجلاس میں راولپنڈی سے پشاور تک جی ٹی روڈ کے مختلف حصوں پر جاری تعمیراتی و ترقیاتی کاموں کا بھی جائزہ لیا گیا۔ وفاقی وزیر مواصلات عبدالعلیم خان نے این ایچ اے حکام کو ملتان، مظفرگڑھ، میانوالی شاہراہ کا تعمیراتی کام آئندہ دو ماہ میں مکمل کرنے کا ٹاسک دیا۔عبدالعلیم خان نے ہدایت کی کہ این ایچ اے جاری منصوبوں کو کم سے کم وقت میں مکمل کرے اور تمام منصوبوں کی ڈیڈ لائن پر تکمیل یقینی بنائی جائے۔ انہوں نے واضح کیا کہ شاہراہوں پر شہریوں کی حفاظت سے بڑھ کر کوئی ترجیح نہیں ہو سکتی۔وفاقی وزیرمواصلات نے این ایچ اے حکام کو تمام نئی اور زیرِ تعمیر شاہراہوں پر سیفٹی فیچرز100 فیصد یقینی بنانے کی ہدایت کرتے ہوئے کہا کہ روڈ سیفٹی پر کسی صورت سمجھوتہ نہیں کیا جائے گاجبکہ پنڈی بھٹیاں، فیصل آباد موٹروے ایم-4 کی توسیع کے منصوبے میں حفاظتی جنگلے کی تعمیر کا فیصلہ بھی کیا گیا۔وفاقی وزیر مواصلات عبدالعلیم خان نے مزید ہدایت کی کہ نئی شاہراہوں کے دونوں اطراف مسافروں کی سہولت کے لیے ریسٹ ایریاز اور واش رومز تعمیر کیے جائیں جبکہ نئے مکمل ہونے والے منصوبوں کو ہر لحاظ سے محفوظ، خوبصورت اور عوام دوست بنایا جائے۔وفاقی وزیر مواصلات نے نئی شاہراہوں اور موٹرویز کی تعمیر میں گرین بیلٹس کو لازمی حصہ بنانے کی ہدایت بھی کی۔ انہوں نے این ایچ اے حکام کو ہدایت کی کہ شاہراہوں کے اطراف ہارٹیکلچر کو باقاعدہ منصوبوں کا حصہ بنایا جائے تاکہ جدید انفراسٹرکچر کے ساتھ ماحول دوست اور خوبصورت شاہراہیں یقینی بنائی جا سکیں۔عبدالعلیم خان نے کہا کہ قومی شاہراہوں اور موٹرویز کی تعمیر و ترقی کا مقصد صرف سفری سہولیات میں اضافہ نہیں بلکہ محفوظ، خوبصورت اور پائیدار انفراسٹرکچر کی فراہمی بھی ہے۔ انہوں نے کہا کہ این ایچ اے تمام جاری منصوبوں کی رفتار مزید تیز کرے اور مقررہ مدت کے اندر ان کی تکمیل یقینی بنائے۔اجلاس کو وفاقی سیکرٹری مواصلات، چیئرمین این ایچ اے اور کے پی کے اور پنجاب سے این ایچ اے کے سینئر افسران نے اہم امور پر بریفنگ بھی دی۔
