آج یا کل یہ حکومت ختم ہو کر ہی رہے گی: شیخ رشید

لاہور: (ویب ڈیسک) سابق وفاقی وزیر داخلہ شیخ رشید نے کہا ہے کہ آج گرے یا کل، یہ حکومت ختم ہوکر ہی رہے گی اور اسے گرنے سے کوئی نہیں بچا سکتا ہے۔
ان خیالات کا اظہار سابق وفاقی وزیر داخلہ نے سماجی رابطے کی ویب سائٹ ٹویٹر پر اپنے ایک پیغام میں وزیراعظم کے ریلیف پیکج پر رد عمل دیتے ہوئے کیا۔
انہوں نے کہا ہے کہ عوام چوروں کے فرسودہ نظام کے خلاف جہاد کررہے ہیں جو ایک ووٹ کی اکثریت اور 20 کروڑ کے ساتھ بھی اپنی حکومت نہیں بچا سکتے۔ آج گرے یا کل، یہ حکومت ختم ہوکر ہی رہے گی اور اسے گرنے سے کوئی نہیں بچا سکتا ہے۔
شیخ رشید نے کہا کہ جس ملک کا وزیراعظم منی لانڈرنگ کیس پر گخر کرے اور ادارے اس کے سامنے ہاتھ جوڑ کر کھڑے ہوں تو اس کا اللہ ہی نگہبان ہے۔
ان کا کہنا تھا کہ پاکستان کی معیشت تباہ حال ہے اور ملک ڈیفالٹ ہونے کے قریب ہے، اس کی بہتری کے لئے جلد اقدامات کرنے کی ضرورت ہے ورنہ معاشی تباہی ہمارے دروازے پر دستک دے رہی ہے۔ پاکستان کو معاشی بدحالی سے بچانے کے لئے جلد ہی عدلیہ اور سیاستدانوں کو بڑے اور اہم فیصلے کرنے ہونگے ۔ حکومت کی جانب سے عوام کو دی جانے والی جھوٹی تسلی ملک کی معیشت کو بہتر نہیں بنا سکتی ہے۔