اسلام آباد: (ویب ڈیسک) پاکستان تحریک انصاف (پی ٹی آئی) کے چیئرمین عمران خان نے کہا ہے کہ پاکستان کو مزید دلدل میں گرنے سے بچانے کے لیے واحد راستہ انتخابات ہیں۔
چیئرمین پی ٹی آئی عمران خان کی زیرصدارت اجلاس ہوا جس میں ملک کی مجموعی سیاسی صورتحال کا جائزہ لیا گیا۔ اجلاس میں 2 جولائی کو تاریخی جلسے کے انعقاد پر گفتگو کی گئی اور حکومتی اتحادیوں کی قومی اسمبلی میں تقاریر کے متن کا بھی جائزہ لیا گیا۔
عمران خان نے پارٹی ذمہ داران کو مہنگائی پر عوام کی ترجمانی کی خصوصی ہدایت کی۔
اس موقع پر عمران خان نے کہا کہ حکومت نے خود کو ریلیف دینے کے لیے عوام کو تکلیف میں مبتلا کر رکھا ہے اور 2018 میں پی ٹی آئی کو اقتدار ملا تو معیشت دیوالیہ پن کے کنارے کھڑی تھی۔
انہوں نے کہا کہ عالمی مالیاتی ادارے (آئی ایم ایف) کی کڑی شرائط کے باوجود عالمی مہنگائی کا بوجھ عوام پر نہیں ڈالا گیا تھا لیکن امپورٹڈ کٹھ پتلیوں نے 9 ہفتے میں عوام سے اپنی غلامی کی قیمت وصول کی۔
عمران خان نے کہا کہ تجربہ کار چوروں کے زیر سایہ حال کی طرح معیشت کا مستقبل بھی تاریک ہے اور میں نے کہا تھا کہ کھڑی کی گئی معیشت سیاسی عدم استحکام کا بوجھ برداشت نہیں کر پائے گی۔
انہوں نے کہا کہ 2 جولائی کو اسلام آباد میں عوام کے ساتھ مل کر سازش کے خلاف احتجاج کریں گے جبکہ پاکستان کو مزید دلدل میں گرنے سے بچانے کے لیے واحد راستہ انتخابات ہیں۔
پاکستان کو مزید دلدل میں گرنے سے بچانے کیلئے واحد راستہ انتخابات ہیں، عمران خان
