نئی دہلی: (ویب ڈیسک) بھارت سے ایک انوکھی آفر نے سب کو اپنی طرف متوجہ کر لیا ہے جہاں پر ایک بیکری کی طرف سے آفر کی گئی ہے کہ ایک سموسہ کھائیں جس کے بدلے میں ایک لاکھ سے زائد پاکستانی روپے انعام پائیں۔
تفصیلات کے مطابق دنیا بھر میں عام طور پر کسی بھی چیز کو کھانے کے لیے اس کی قیمت ادا کرنی پڑتی ہے لیکن ایک سموسہ کھانے کے عوض 50 ہزار روپے انعام کی پیشکش کی جائے تو ہر کوئی چیلنج قبول کرنے کے لیے تیار ہو گا۔
شہری ایسی خبر کو مذاق سمجھ رہے ہوں گے لیکن یہ حقیقت ہے اور ایسی شاندار پیشکش بھارتی ریاست اتر پردیش کے شہر میرٹھ کی بیکری کی جانب سے دی گئی ہے۔
بھارتی میڈیا کے مطابق بیکری کی جانب سے 8 کلو گرام وزنی سموسے کو تیار کرنے کے لیے آلو، دالیں، پنیر اور مصالحہ جات کا استعمال کیا گیا ہے اور اسے عام سموسوں کی طرح تیل میں فرائی کر کے بنایا گیا ہے۔
بیکری کی جانب سے سموسہ کھانے والے شخص کے لیے 50 ہزار بھارتی روپے (ایک لاکھ پاکستانی روپے سے زائد )انعام کا اعلان کیا گیا ہے اور بڑی تعداد میں لوگ سموسے کو دیکھنے کے لیے بیکری کا رخ کر رہے ہیں۔
تاہم بیکری مالک شبھمن نے کہا کہ تاحال کوئی بھی شخص سموسہ کھا کر انعام حاصل کرنے میں کامیاب نہیں ہو سکا ہے جبکہ بیکری مالک کا کہنا ہے کہ وہ بہت جلد 10 کلو گرام وزنی سموسہ بھی تیار کرنے کا ارادہ رکھتے ہیں۔
ایک سموسہ کھائیں، پائیں ایک لاکھ سے زائد پاکستانی روپے انعام
