اسلام آباد: (ویب ڈیسک) ملک بھر میں یوم دفاع آج بھرپور جوش و جذبے سے منایا جا رہا ہے۔
صدر مملکت عارف علوی نے یوم دفاع وشہدا کے حوالے سے قوم کے نام پیغام جاری کرتے ہوئے کہا کہ پاکستان عالمی اور علاقائی امن کے لیے پر عزم ہے، پاکستان پر امن بقائے باہمی کی پالیسی پر عمل پیرا ہے،امن کی خواہش کو ہماری کمزوری ہر گز نہ سمجھا جائے۔
عارف علوی نے کہا ہم اپنی قومی اور بین الاقوامی ذمہ داریوں سے بخوبی آگاہ ہیں، ہماری مسلح افواج کسی بھی قسم کے حالات سے نمٹنے کے لیے تیار ہے، یوم دفاع و شہدا ہمیں اس بے مثال جرات اور بہادری کی یاد دلاتا ہے جس کا مظاہرہ مسلح افواج اور قوم نے دشمن کے ناپاک عزائم کو ناکام بنا کر کیا تھا۔
صدر نے مزید کہا کہ آزمائش کی گھڑی میں افواج پاکستان نے بری، بحری اور فضائی جنگ بے خوفی سے لڑی، قوم کا ہر شہری مادر وطن کی حفاظت کے لیے اٹھ کھڑا ہوا، 6 ستمبر غیر متز لزل عزم، جذبہ حب الوطنی، عظیم قربانی کی علامت ہے، دفاع وطن کی خاطرجانوں کی قربانی دینے والے شہدا کو سلام عقیدت جبکہ اپنے پیاروں کی قربانی دینے والے شہدا کے لواحقین کو بھی سلام پیش کرتا ہوں۔
دوسری جانب وزیراعظم شہباز شریف نے بھی یوم دفاع و شہدا پاکستان کے موقع پر پیغام جاری کرتے ہوئے کہا ہے کہ 6 ستمبر کا دن دھرتی کے بہادر بیٹوں کی عظیم قربانی کے جذبے کی یاد کے طور پر منایا جاتا ہے، 57 سال قبل ہماری بہادر افواج نے ثابت کر دیا کہ مادرِ وطن کے دفاع کے لیے ہمہ وقت تیار ہیں، قوم اس سر زمین کے بہادر بیٹوں کو بھرپور خراج عقیدت پیش کر رہی ہے۔
شہباز شریف نے کہا ہے کہ یہ ہیروز سخت موسموں میں مادرِ وطن کی سرحدوں کو بیرونی اور اندرونی خطرات سے محفوظ رکھ رہے ہیں، ہماری بہادر مسلح افواج نے دہشت گردی کے عفریت کو شکست دے کر 1965 کی جنگ کے قابل فخر ورثے کو آگے بڑھایا۔
انہوں نے کہا کہ آپریشن ردالفساد کو کامیابی سے منطقی انجام تک پہنچانے پر عسکری قیادت کو مبارک باد پیش کرتا ہوں، حالیہ سیلاب میں ہزاروں لوگوں کی جانیں بچانے میں مسلح افواج اور دیگر اداروں کے اہلکاروں کے کردار کو سراہتا ہوں۔
وزیراعظم نے مزید کہا کہ پاکستان مشکل معاشی صورتحال کے باوجود اپنے دفاع کی مضبوطی سے غافل نہیں رہ سکتا، مقبوضہ کشمیر جنوبی ایشیا کی دو ایٹمی طاقتوں کے درمیان فلیش پوائنٹ ہے، مقبوضہ کشمیر کا اقوام متحدہ کی قراردادوں کے مطابق حل علاقائی امن اور ترقی کے لیے ضروری ہے۔
