امریکی صدر ڈونلڈ ٹرمپ نے کہا ہے کہ امریکا اور ایران کے درمیان مثبت اور نتیجہ خیز مذاکرات جاری ہیں اور امریکا 3 نومبر کو ہونے والے وسط مدتی انتخابات سے قبل ایران پر کوئی حملہ نہیں کرے گا۔
ٹرمپ نے سوشل میڈیا پلیٹ فارم ٹروتھ سوشل پر بیان میں کہا کہ امریکا ایران کے ساتھ بات چیت کر رہا ہے، تاہم ایران کے خلاف امریکی بحری ناکہ بندی بدستور برقرار رہے گی۔ انہوں نے دعویٰ کیا کہ آبنائے ہرمز کے ذریعے تیل کی ترسیل جاری ہے۔
ٹرمپ نے واضح کیا کہ 3 نومبر کے وسط مدتی انتخابات سے پہلے ایران کے خلاف امریکی فوجی حملہ نہیں ہوگا۔ ان کا کہنا تھا کہ ایران معاشی اور عسکری طور پر انتہائی خراب صورتحال سے دوچار ہے، تاہم واشنگٹن دباؤ برقرار رکھے گا۔
دوسری جانب ایران اور امریکا کے درمیان مذاکرات میں آبنائے ہرمز، جوہری پروگرام اور امریکی بحری ناکہ بندی سمیت اہم معاملات زیر بحث ہیں۔ ایرانی وزیر خارجہ عباس عراقچی نے بھی کہا ہے کہ تہران امریکی تجویز کا جائزہ لے رہا ہے اور آئندہ دنوں میں جواب دے سکتا ہے۔
