اسلام آباد: (ویب ڈیسک) انسداد دہشتگردی کی عدالت نے کار سرکار میں مداخلت کے کیس میں چیئرمین پاکستان تحریک انصاف اور سابق وزیراعظم کو طلبی کا سمن جاری کر دیا۔
اسلام آباد کی انسداد دہشتگردی کی عدالت کے جج راجہ جواد عباس حسن نے کیس کی سماعت کی، اس موقع پر سابق وزیراعظم عمران خان کے وکیل بابر اعوان اور پراسیکیوٹر پیش ہوئے۔
پی ٹی آئی چیئرمین کے وکیل بابر اعوان کا کہنا تھا کہ عمران خان زخمی ہیں جس کے باعث پیش نہیں ہو سکتے۔
عمران خان کے وکیل نے طبی بنیادوں پر اپنے مؤکل کی حاضری سے استثنیٰ کی درخواست بھی کی جس پر عدالت نے کہا کہ عمران خان کی زمان پارک سے ایک ویڈیو جاری ہوئی جس میں وہ پیدل چلتے نظر آئے۔
عدالت نے بابر اعوان سے مکالمہ کیا کہ آپ چیئرمین پی ٹی آئی کی مستقل ضمانت پر دلائل دیں، وہ 15 فروری کو آئیں یا نہ آئیں ہم ضمانت پر فیصلہ دے دیں گے۔
عدالت نے سابق وزیراعظم عمران خان کی حاضری سے استثنیٰ کی درخواست کو مسترد کرتے ہوئے انہیں 15 فروری کو طلبی کے سمن جاری کر دیئے۔
بعدازاں عدالت نے کیس کی سماعت 15 فروری تک ملتوی کرتے ہوئے عمران خان کو حاضری یقینی بنانے کا حکم دے دیا۔
