پنڈی : (ویب ڈیسک) ایچ بی ایل پاکستان سپر لیگ (پی ایس ایل ) 8 کے 29 میچ میں پشاور زلمی نے اسلام آباد یونائیٹڈ کو جیت کیلئے 180 رنز کا ہدف دے دیا۔
پنڈی میں کھیلے جارہے میچ میں اسلام آباد یونائیٹڈ کے کپتان شاداب خان نے ٹاس جیت کر پشاور زلمی کو پہلے بیٹنگ کی دعوت دی ، پشاور زلمی مقررہ اوورز میں 8 وکٹوں کے نقصان پر 179 رنز بناپائی۔
پشاور زلمی کی جانب سے اوپننگ بیٹر صائم ایوب ٹیم کو اچھا آغاز فراہم نہ کرسکے اور تین گیندیں کھیل کر فضل الحق فاروقی کی گیند پر صفر رنز پر ہی پویلین لوٹ گئے جس کے بعد محمد حارث نے 39 گیندوں پر79 رنز کی شاندار اننگز کھیلی اور شاداب خان کی گیند پر حسن علی کو کیچ دے بیٹھے،پشاور زلمی کی جانب سے راجا پاکسا 41، ٹام کوہلر 12 اور حسیب اللہ خان 10 رنز بنا کر آؤٹ ہوئے۔
اسلام آباد یونائیٹڈ کی جانب سے فضل حق فاروقی نے 1، حسن علی نے 3، فہیم اشرف 1 شاداب خان نے 2 اور محمد وسیم نے ایک وکٹ حاصل کی۔
اسلام آباد کے خلاف میچ میں پشاور زلمی کے کپتان بابر اعظم طبیعت ناساز ہونے کے باعث ٹیم کو دستیاب نہیں ہیں، بابر کی جگہ ٹام کوہلر کیڈمور ٹیم کی قیادت کررہے ہیں۔
دوسری جانب اسلام آباد یونائیٹڈ کے وکٹ کیپر بیٹسمین اعظم خان انجرڈ ہونے کے باعث اسکواڈ میں شامل نہیں ہیں ، واضح رہے کہ لاہور قلندرز کے خلاف میچ کے دوران اعظم خان کے بائیں ہاتھ کی انگلی میں چوٹ لگی تھی۔
پی ایس ایل 8 ، پشاور کا اسلام آباد کو جیت کیلئے 180 رنز کا ہدف
