اسلام آباد(پریس ریلیز) ایریٹڈ بیوریج انڈسٹری کی فروخت میں،فروری2023کے منی بجٹ میں مزید7فیصد فیڈرل ایکسائز ڈیوٹی(ایف ای ڈی)کے نفاذ کے بعد 35تا40فیصد کی کمی ریکارڈ کی گئی ہے۔اس وقت ایریٹڈ بیوریج انڈسٹری مجموعی طور پر20فیصد فیڈرل ایکسائز ڈیوٹی کے بوجھ تلے دبی ہوئی ہے۔13سے20فیصد کے اس 50فیصد اضافہ کے باعث نہ صرف مینو فیکچرنگ کمپنیوں کے کاروبار مشکل میں پڑ گئے ہیں بلکہ روزگار کے ہزاروں مواقع بھی داؤ پر لگنے کا خدشہ ہے۔ اگر ریگولیٹر ی کی یہی شرح برقرار رہی تو متعدد فیکٹریاں بند ہونے کا خدشہ ہے،ان پلانٹس کی بندش سے حکومت کی کارپوریٹ اور ٹیکس کی مد میں ہونے والی آمدن متاثر ہوسکتی ہے،جس کا تخمینہ 6تا8ارب روپے سالانہ تک ہے۔
پاکستان کی مشروبات کی صنعت،20فیصد ایف سی ڈی کے ساتھ،دنیا میں سب سے زیادہ ٹیکس ادا کرنے والی صنعتوں میں سے ایک ہے،جو کہ خوراک اور مشروبات کی صنعت پر اوسط ٹیکس سے زیادہ ٹیکس ادا کررہی ہے۔
ملک میں زرمبادلہ کے کمی کے مسائل کے باوجود،ایریٹڈبیوریج انڈسٹری نے 20کروڑ ڈالر کی سرمایہ کاری کی،جس نے ملکی زرمبادلہ کے ذخائر کو بہتر بنانے میں مدد کی،تاہم حالیہ اقدامات کے باعث حکومت کو اس صنعت سے حاصل ہونے والی آمدن میں خاطر خواہ کمی کا سامنا کرنا پڑ سکتا ہے۔
اسٹیٹ بینک کی بورڈ آف ڈائریکٹرز کی 23-2022کی ششماہی رپورٹ میں شائع کردہ اعداد و شمار کے مطابق متعدد شعبوں میں منفی نمو ریکارڈ کی گئی ہے۔مالی سال 2022کی پہلی ششماہی کے مقابلہ میں مالی سال2023کی پہلی ششماہی کے دوران مشروبات کی صنعت کی نمو 5فیصد سے گھٹ کر منفی 8.3فیصد کی سطح پر آگئی۔
پاکستان بزنس کونسل،امریکن بزنس کونسل،متعدد چیمبرز آف کامرس اور تجارتی اداروں کی جانب سے حکومت کو ان اقدامات کے منفی نتائج سے بھی آگاہ کیا جاچکا ہے۔ان ایسوسی ایشنز نے سینیٹ کمیٹی کے چیئرمین اور کنوینر برائے خزانہ و ریونیو سینیٹر سلیم مانڈوی والا کے سامنے بھی اپنی سفارشات پیش کی ہیں،کوکا کولا کو بھی 23مئی2023کو منعقدہ اس مشاورتی اجلاس میں صنعت کے خدشات سے آگاہ کرنے کیلئے مدعو کیا گیا تھا،کمپنی نے فروری 2023میں عائد کئے گئے اس امتیازی ٹیکس کے خاتمہ کیلئے ایک کیس پیش کیا،کیونکہ یہ ٹیکس چینی کی فی کھپت پر لاگو نہیں ہوتا۔یہ صنعت ملکی چینی کا محض6فیصد استعمال کرتی ہے،اس کے باوجود اس صنعت پر یہ ٖغیر متناسب ٹیکس عائد کیا گیا۔
بیوریج سیکٹر اپنے شفاف اور تعمیل کرنے والے آپریشنز پر فخر کرتا ہے اور حکومت پر زور دیتا ہے کہ وہ اپنی ٹیکس پالیسی پر نظر ثانی کرے،خاص کر منی بجٹ میں عائد7فیصد ٹیکس فوری طور پر واپس لیا جائے،کیونکہ حکومت کے ابتدائی اعلان کے مطابق یہ ٹیکس عارضی طور پر عائد کیا گیا تھا۔ایک منصفانہ اور وسیع البنیاد ٹیکس نظام پاکستان کے معاشی استحکام اور ترقی کیلئے فائدہ مند ثابت ہوگا۔
کوکا کولا اور مشربات بنانے والی دیگر کمپنیوں کی جانب سے ایف ای ڈی کے خاتمہ کی اپیل
