پنجاب یونیورسٹی ایک مرتبہ پھر میدان جنگ بن گئی جہاں دو طلبا گروپوں کے درمیان رات گئے تصادم ہوا جس کے نتیجے میں متعدد طلبا زخمی ہوگئے۔
تفصیلات کے مطابق طلبا گروپوں میں تصادم کا واقع یونیورسٹی کے ہوسٹلز میں پیش آیا جہاں رات گئے یونیورسٹی میں ڈنڈا بردار گھومتے پھرتے رہے جبکہ تصادم سے قبل ڈنڈا بردار ہوسٹلز کے کمروں کو چیک کرتے رہے۔
پنجاب یونیورسٹی کی فضا میں خوف وہراس پھیل گیا جس کی وجہ سے ہوسٹلز میں موجود طلبا کمروں میں محصور ہوگئے جبکہ پولیس کی بھاری نفری یونیورسٹی پہنچ گئی اور طلبہ کو طبی امداد کے لیے اسپتال منتقل کر دیا گیا۔
یاد رہے کہ چند روز قبل بھی پنجاب یونیورسٹی کے طلبا تنظیموں پختون کونسل اور جمعیت کے طلبا کا جھگڑا ہوا تھا۔ پختون کونسل کے طلبا کلچرل ڈانس کے لیے ساؤنڈ سسٹم لائے تھے جبکہ جمعیت کے طلبا نے ان کو منع کیا اور ساؤنڈ سسٹم بھی توڑ دیا تھا۔
