وزیراعلیٰ سندھ مراد علی شاہ نے پاکستانی نژاد امریکی ڈاکٹرز کے ہمراہ ملیر میں حسن سلیمان میموریل اسپتال کا سنگ بنیاد رکھا۔ ان کا کہنا تھا کہ منصوبہ پسماندہ افراد کو مفت صحت کی سہولیات فراہم کرنے کی طرف اہم پیش رفت ہے۔
سنگ بنیاد رکھنے کی تقریب میں صوبائی وزرا، نامور ڈاکٹرز، مخیر حضرات اور دیگر رہنماؤں نے شرکت کی، سنگ بنیاد کی تقریب سے خطاب کرتے ہوئے وزیراعلیٰ سندھ نے بتایا کہ منصوبہ پاکستانی امریکی ڈاکٹرز اور حکومت سندھ کی مشترکہ کاوشوں کا نتیجہ ہے منصوبہ انسان دوستی اور بین الاقوامی تعاون کا زبردست نمونہ ہے۔
مراد علی شاہ نے اسپتال کو امید کی کرن قرار دیا اور وعدہ کیا کہ جتنا فنڈز جمع ہوگا اتنا ہی حصہ حکومت سندھ ڈالے گی انہوں نے امریکا میں مقیم پاکستانی برادری کی انتھک کوششوں اور بھرپور تعاون کی تعریف کی اور اسے متاثرکن قرار دیا۔
حسن سلیمان میموریل اسپتال کے صدر ڈاکٹر اقبال ظفرنے اسپتال کی تعمیر کےلیے بین الاقوامی تعاون پر روشنی ڈالی اور کہا کہ اس سے پاکستانی امریکیوں کو اپنے وطن کے ساتھ جڑنے کا بہانہ مل گیا ہے۔ انہوں نے اسپتال کو ملیر کے عوام کےلیے لائف لائن قرار دیا۔
منصوبے کے چیئرپرسن ڈاکٹر ایس ایم طارق رفیع نے امید اور تشکر کے جذبات کا اظہار کرتے ہوئے صدر زرداری، وزیراعلیٰ مراد علی شاہ کی غیرمشروط حمایت کا شکریہ ادا کیا۔ انہوں نے زور دیا کہ اسپتال پسماندہ افراد کے لیے جائے پناہ ثابت ہوگا جہاں سے روشن مستقبل کا آغاز ہوگا۔
حسن سلیمان میموریل اسپتال 312 بستروں پر مشتمل ہوگا اور یہ دو سال میں مکمل ہوگا، 2026 میں مریضوں کے علاج کا آغاز ہوجائےگا۔ اسپتال میں ایمرجنسی امداد ، دل کے آپریشن، عارضہ قلب ، بچوں اور خواتین کے لیے خصوصی علاج کی سہولیات سمیت بڑے پیمانے پر مفت علاج کی سہولیات دستیاب ہوں گی۔
