2025 میں کسی بھی وقت زیر سمندر موجود ایک آتش فشاں پھٹنے کے قریب ہے۔
ماہرِ ارضیات ولیم چاڈویک نے پیش گوئی کی ہے کہ اوریگون کے ساحل سے 470 کلومیٹر دور سمندر کے نیچے ایک کلومیٹر گہرائی میں ایک آتش فشاں جسے Axial Seamount کہا جاتا ہے، خطرناک سرگرمیوں کا اشارہ دے رہا ہے۔
چاڈوک اور ان کے ساتھیوں نے واشنگٹن ڈی سی میں امریکن جیو فزیکل یونین کے اجلاس میں اپنے نتائج کی اطلاع دی۔
پچھلی دہائی سے متعدد آلات اس زیر سمندر آتش فشاں کی نگرانی کر رہے ہیں جس میں سمندری فرش پر کیبل کے ذریعے ڈیٹا وصول کرنا، جھٹکوں کو محسوس کرنا، ابھار آنا، جھکاؤ اور ریئل ٹائم ڈیٹا کی فراہمی شامل ہے۔
اسکریپس انسٹی ٹیوشن آف اوشینوگرافی میں ارضیاتی ماہر، مارک زمبرج نے کہا کہ یہ کرہ ارض پر سب سے بہترین جانچے جانے والا زیر سمندر آتش فشاں ہے۔
نومبر میں Axial کی ایک خاص کارروائی نے چاڈویک کی توجہ اپنی جانب مبذول کروائی تھی۔ Axial کی سطح تقریباً اتنی ہی اونچائی تک پہنچ گئی تھی جو 2015 میں اس کے پھٹنے سے کچھ عرصہ پہلے تھی۔ ابھار اس بات کی علامت ہے کہ میگما زیر زمین جمع ہو گیا ہے اور دباؤ بنا رہا ہے۔
