واٹس ایپ میں اکثر نئے فیچرز کا اضافہ کیا جاتا ہے اور اب ایک ایسی ہی دلچسپ اپ ڈیٹ اس میں کی جا رہی ہے۔
Wabetainfo کی رپورٹ میں بتایا گیا کہ واٹس ایپ میں ایک ایسے فیچر کا اضافہ کیا جا رہا ہے جس سے ٹیکسٹ کو دیگر افراد سے چھپانا ممکن ہو جائے گا۔
درحقیقت وہ ٹیکسٹ اس وقت تک نظر نہیں آئے گا جب تک اس پر خصوصی طور پر کلک نہیں کیا جائے گا۔
یہ فیچر سوشل میڈیا سائٹ ریڈیٹ کے ایک فیچر سے ملتا جلتا ہے جس میں اسپائلر فارمیٹنگ آپشن کے ذریعے پوسٹ میں مخصوص ٹیکسٹ کو چھپا دیا جاتا ہے اور اسے دیکھنے کے لیے کلک کرنے کی ضرورت ہوتی ہے۔
یہ نیا فیچر ابھی واٹس ایپ کے آئی او ایس ڈیوائسز کے نئے بیٹا (beta) ورژن میں دیکھنے میں آیا ہے۔
یہ فیچر گروپ چیٹس کے لیے بہت زیادہ کارآمد ثابت ہوگا جہاں کچھ افراد مخصوص ٹی وی شوز یا فلموں کے بارے میں تازہ ترین تفصیلات جاننا چاہتے ہیں جبکہ کچھ کو اسپائلر پسند نہیں ہوتا۔
یہ فیچر چونکہ ابھی بیٹا ورژن میں ہے تو یہ کہنا مشکل ہے کہ اسے کب تک تمام صارفین کے لیے متعارف کرایا جاسکتا ہے۔
مگر یہ ضرور واضح ہے کہ اس فیچر کو واٹس ایپ میں کافی زیادہ پسند کیا جائے گا۔
رپورٹ کے مطابق اس فیچر کو ابھی صرف ٹیکسٹ میسج کے لیے ہی استعمال کیا جاسکتا ہے، تصاویر اور ویڈیوز کے لیے نہیں۔
