ایبٹ آباد : ایئر چیف مارشل ظہیر احمد بابر سدھو کا کہنا ہے کہ معرکہ حق میں دشمن پاکستان کی طاقت اور ہنرمندی دیکھ کردنگ رہ گیا۔
تفصیلات کے مطابق پاک فضائیہ کے سربراہ ایئر چیف مارشل ظہیر احمد بابر سدھو نے پاکستان ملٹری اکیڈمی کاکول میں پاسنگ آؤٹ پریڈ کی پروقار تقریب سے خطاب کرتے ہوئے کہا کہ پاکستان ایک امن پسند ملک ہے لیکن اپنی دھرتی پر کسی بھی قسم کی جارحیت کا منہ توڑ جواب دینے کی بھرپور صلاحیت رکھتا ہے۔
ایئر چیف مارشل نے پاک فوج کی پیشہ ورانہ مہارتوں کو سراہتے ہوئے کہا معرکہِ حق اور ‘بنیان المرصوص’ میں پاکستان آرمی کی حکمت عملی کو پوری دنیا نے دیکھا، مئی میں دشمن پاکستان کی طاقت اور ہنرمندی دیکھ کر دنگ رہ گیا تھا۔
ان کا کہنا تھا کہ پاک فضائیہ نے نہ صرف دشمن کے جہاز گرائے بلکہ دفاعِ وطن کی ایک نئی تاریخ رقم کی۔
امن کے قیام اور کشمیر پر پاکستان کے موقف کو واضح کرتے ہوئے انہوں نے کہا پاکستان تنازعات کا حل مذاکرات کے ذریعے نکالنے پر یقین رکھتا ہے۔ عالمی سطح پر امن کے لیے سیاسی و عسکری قیادت کی کاوشیں قابلِ ستائش ہیں۔
انھوں نے مزید کہا کہ پاکستان بھارتی غیر قانونی زیرِ قبضہ کشمیر کے بھائیوں کی اخلاقی اور سفارتی حمایت جاری رکھے گا۔ مسئلہ کشمیر کا حل کشمیری عوام کی امنگوں کے مطابق ہونا ناگزیر ہے۔
پاس آؤٹ ہونے والے افسران سے گفتگو کرتے ہوئے ایئر چیف کا کہنا تھا آپ کی اولین ذمہ داری ملک کی سلامتی اور جغرافیائی حدود کا تحفظ یقینی بنانا ہے، پی ایم اے کاکول دنیا کی بہترین عسکری اکیڈمیوں میں سے ایک ہے۔ مجھے کیڈٹس میں خواتین کی شمولیت اور دوست ممالک کے کیڈٹس کی کامیابی دیکھ کر دلی خوشی ہو رہی ہے۔
تقریب کے دوران کیڈٹس نے لہو گرما دینے والا مارچ پاسٹ کیا، جس کے بعد ایئر چیف نے پریڈ کا معائنہ کیا اور بہترین کارکردگی دکھانے والے کیڈٹس میں اعزازات تقسیم کیے۔
