پی آئی اے کا ایاٹا سیفٹی آڈٹ کامیابی سے مکمل، سرٹیفکیٹ 2028 ء تک مؤثر

کراچی (این این آئی) قومی ایئرلائن پاکستان انٹرنیشنل ایئرلائنز (پی آئی اے) نے انٹرنیشنل ایئر
ٹرانسپورٹ ایسوسی ایشن (ایاٹا) کا سخت اور رسک بیسڈ آپریشنل سیفٹی آڈٹ کامیابی سے مکمل کرلیا۔ ذرائع کے مطابق ایاٹا نے پی آئی اے انتظامیہ کو آڈٹ میں کامیابی سے آگاہ کر دیا ہے جس کے بعد قومی ایئرلائن کا آپریشنل سیفٹی آڈٹ ستمبر 2028 تک مؤثر رہے گا۔ رواں سال ایاٹا کی جانب سے کئے گئے آڈٹ میں پی آئی اے کے آپریشنل سیفٹی سے متعلق مختلف شعبوں اور امور کا تفصیلی جائزہ لیا گیا۔ آڈٹ کے دوران بین الاقوامی حفاظتی معیارات پر ایئرلائن کی کارکردگی اور ان پر عملدرآمد کا بھی جائزہ لیا گیا۔ پی آئی اے ترجمان کے مطابق قومی ایئرلائن کا اگلا آپریشنل سیفٹی آڈٹ ستمبر 2028 میں ہوگا۔