ایم کیو ایم کا اورنگی ٹاؤن میں اسکول کی دیوار گرنے سے ہلاکتوں پر اظہار افسوس

کراچی (این این آئی) متحدہ قومی موومنٹ پاکستان کے حق پرست اراکین اسمبلی نے اورنگی ٹاؤن میں سرکاری اسکول کی خستہ حال دیوار گرنے
کے نتیجے میں 5 افراد کے جاں بحق اور متعدد کے زخمی ہونے پر گہرے دکھ اور افسوس کا اظہار کرتے ہوئے واقعے کی شدید مذمت کی ہے۔اپنے مشترکہ بیان میں انہوں نے کہا کہ اسکول کی خستہ حال دیوار کا گرنا محض حادثہ نہیں بلکہ سندھ حکومت کی غفلت اور نااہلی کا نتیجہ ہے۔ انہوں نے کہا کہ گزشتہ ڈیڑھ دہائی سے سندھ میں برسراقتدار پیپلز پارٹی کی حکومت کراچی کے تعلیمی اداروں اور بنیادی ڈھانچے کی بہتری پر توجہ دینے میں ناکام رہی ہے۔حق پرست اراکین اسمبلی نے کہا کہ محکمہ تعلیم اور بلدیاتی اداروں کے فنڈز کے استعمال میں مبینہ بے ضابطگیوں کا خمیازہ شہریوں کو بھگتنا پڑ رہا ہے۔