پنجاب میں 17ستمبر تک دفعہ 144نافذ

لاہور(اپنے سٹاف رپورٹر سے)حکومت پنجاب
نے صوبے بھر میں امن و امان برقرار رکھنے اور عوام کے جان و مال کے تحفظ کیلئے 13سے 17ستمبر تک دفعہ 144کے تحت پابندیاں عائد کردی ہیں۔محکمہ داخلہ پنجاب کی جانب سے پابندیوں کا باقاعدہ نوٹیفکیشن جاری کردیا گیا۔ محکمہ داخلہ کے مطابق قانون نافذ کرنے والے اداروں اور انٹیلی جنس ایجنسیوں کی جانب سے انتہائی حساس رپورٹس موصول ہوئی ہیں، جن میں کالعدم دہشت گرد تنظیموں کی جانب سے عوامی اجتماعات اور ریلیوں کو نشانہ بنانے کی منصوبہ بندی کی نشاندہی کی گئی ہے۔نوٹیفکیشن کے مطابق صوبے میں کسی بھی عوامی مقام، شاہراہ یا کھلی جگہ پر 5یا اس سے زائد افراد کے اکٹھا ہونے، جلوس نکالنے، جلسے، دھرنے اور مظاہرے کرنے پر پابندی ہوگی۔عوامی مقامات پر ہر قسم کے ہتھیار لے جانے اور ان کی نمائش پر بھی مکمل پابندی عائد کی گئی ہے، جبکہ غیر قانونی اجتماعات، ریلیوں یا مظاہروں میں شرکت کے لیے لوگوں کو اکسانے یا ترغیب دینے والوں کے خلاف بھی قانونی کارروائی کی جائے گی۔محکمہ داخلہ کے مطابق پابندی کا اطلاق مساجد اور دیگر عبادت گاہوں، نمازِ جنازہ، تدفین اور شادی بیاہ کی تقریبات پر نہیں ہوگا، عدالتیں، حکومتی ادارے اور باضابطہ انتظامی اجازت نامے (این او سی)کے بعد منعقد ہونے والی تقریبات بھی پابندی سے مستثنیٰ ہوں گی۔ ڈیوٹی پر مامور قانون نافذ کرنے والے اداروں، انٹیلی جنس ایجنسیوں اور سکیورٹی فورسز کے اہلکار بھی ان پابندیوں سے مستثنی ہوں گے۔ترجمان محکمہ داخلہ کے مطابق عوام کے جان و مال کا تحفظ حکومت پنجاب کی اولین ترجیح ہے، پابندیوں کا بنیادی مقصد ممکنہ ناخوشگوار واقعات کی روک تھام اور صوبے میں امن و سکون برقرار رکھنا ہے۔
دفعہ 144 نافذ