نادرا نے پیدائش، وفات اور شادی کے سرٹیفکیٹ گھر بیٹھے حاصل کرنیکی سہولت متعارف کرادی

کراچی (این این آئی) نیشنل ڈیٹابیس
رجسٹریشن اتھارٹی (نادرا) نے شہریوں کے لیے نئی سہولت متعارف کرا دی جس کے تحت پیدائش، وفات، شادی اور طلاق کے سرٹیفکیٹس کی ڈپلیکیٹ کاپیاں گھر بیٹھے حاصل کی جاسکیں گی، شہریوں کو اس مقصد کے لیے نادرا دفتر جانے کی ضرورت نہیں ہوگی۔ نادرا حکام کے مطابق متعلقہ یونین کونسل سے پہلے جاری کیے گئے سرٹیفکیٹ کی ڈپلیکیٹ کاپی اب پاک آئی ڈی موبائل ایپ کے ذریعے حاصل کی جاسکتی ہے۔ اس سہولت کا مقصد شہریوں کو سرٹیفکیٹس کے حصول کے لیے دفاتر کے غیر ضروری چکروں سے بچانا اور خدمات تک رسائی آسان بنانا ہے۔ حکام نے بتایا کہ اگر کسی شہری کا پیدائش، وفات، شادی یا طلاق کا سرٹیفکیٹ متعلقہ یونین کونسل سے پہلے جاری ہوچکا ہے اور اسے دوبارہ حاصل کرنا مقصود ہو تو پاک آئی ڈی موبائل ایپ کے ذریعے درخواست دی جاسکتی ہے۔ شہری متعلقہ یونین کونسل سے رجوع کرکے بھی سرٹیفکیٹ حاصل کرسکتے ہیں۔ نادرا کے مطابق یہ سہولت سندھ اور پنجاب کی تمام یونین کونسلز، اسلام آباد، خیبر پختونخوا کے تمام اضلاع جبکہ بلوچستان کے منتخب اضلاع میں دستیاب ہے۔ نادرا حکام نے شہریوں کو ہدایت کی ہے کہ سرٹیفکیٹس کے حصول کے لیے پاک آئی ڈی موبائل ایپ کی سہولت سے فائدہ اٹھائیں۔ مزید معلومات اور رہنمائی کے لیے نادرا کی ہیلپ لائن 1777 پر رابطہ کیا جاسکتا ہے۔